Кентау қалалық емханасында Сүт безі қатерлі ісігінің алдын алу мақсатында онколог, маммолог және хирург дәрігерлерінің қатысуымен ашық есік күні өтті. Ашық есік күнінде сүт безі Ультрадыбыстық зерттеуі (УЗИ) түсіріліп, мамандар кеңестерін берді. Дәрігерлер 80-нен астам тұрғынды қарап, тексеру жүргізді. Жалпы Кентау қалалық емханасында бұндай ашық есік күндері әр тоқсан сайын ұйымдастырылып отырады. Негізгі мақсаты – ауруларды ерте диагностикалап, асқынулардың алдын алу болып табылады.
Сүт безінің қатерлі ісігі – бір бірінен ағымы және ісікке қарсы әсерге сезімталдығы бойынша ерекшеленетін әр түрі бар қатерлі ісік. «Сүт безінің қатерлі ісігі өзінің аты айтып тұрғандай қатерлі обыр болып табылады. Егер де сүт безінің қатерлі ісігі диагнозы қойылса, ол ешқашан да қатерсіз деп саналмайды. Ол тек қатерлі нақты диагноз болып табылады. Қатерлі ісік аурулары өздерін аса білдірте бермейді. Олардың белгілерінің барлығы жасырын түрде өтеді. Сүт безінің симптомдары тек ІІІ-IV сатысына өткен кезде ғана өздерінің белгілерін бере бастайды,-дейді маммологтар.
Ісіктің түріне байланысты ем таңдалады. Қазақстанда орта есеппен қатерлі ісікпен 3500-ге жуық әйел анықталады. Олардың 1400-і өкінішке орай қайтыс болады. Бұл 45%-ға жуық болып есептеледі. Бүгінгі таңда 5 жылдық өміршеңдік 54% құрайды. Аурушаңдықтың үдеу шыңы 58-61 жастағы әйелдерге келеді. Алайда қатерлі ісік барлық жас топтарында анықталады. Соңғы кезде сүт безі қатерлі ісігінің жасаруы байқалуда, тіпті 40 жасқа дейін де анықталады.
Сүт безі қатерлі ісігі кезінде тағы қандай белгілер байқалуы мүмкін??
Егер сіз:
— бір сүт безі екіншісінен визуальды ерекшеленетінін;
— сүт безінде қызарудың пайда болғанын;
— емшек ұшы өзгергенін, оның қатты, ісіп немесе тартылып қалғанын;
— емшек ұшынан қан кеткенін;
— сүт безі терісінде шұңқырдың пайда болғанын анықтасаңыз, дереу маммологқа қаралуыңыз қажет.
— Сүт безі қатерлі ісігі әдетте қай жерде орналасады?
— Сүт безінің кез келген бөлігінде болуы мүмкін. Тіпті сүт безінен тыс жерлерде, мысалы, қолтық асты немесе сүт безінен жоғары қабырға арасында орналасуы мүмкін. Скрининг кезінде сүт безінен тыс орналасқан осындай ісікті көрмей қалу әбден мүмкін. Себебі ол сурет аймағына кірмей қалады. Сондықтан маммологқа жылына 1 рет бару керектігін тағы да айтқым келеді. Өйткені дәрігер сүт безін, одан тыс аймақты сипап, ісікті анықтай алуы мүмкін.
