Қазақстан Республикасы Қорғаныс министрлігі тәрбие мен идеологиялық жұмыс департаментінің ұйымдастыруымен жыл сайын дәстүрлі түрде өткізілетін Х Халықаралық “Айбын-2024” әскери патриоттық жастар жиынында Түркістан облысының намысын қорғаған «Арыс» әскери патриоттық клубының жастары ағымдағы жылы да жүлделі ІІ орынмен оралды.
Алматы қаласында өткен жастар жиынына Өзбекстан, Белоруссия, Ресей, Әзірбайжан, Қырғызстан мемлекеттері мен Қазақстан Республикасының Астана, Алматы, Шымкент және де басқа аймақтарынан келген жастар бақ сынасты.
Аталған халықаралық жарысқа Арыс қаласының білім бөліміне қарасты білім беру ұйымдарының АӘЖТД пәнінің жетекшілері Ербол Аймұрзаев пен Молдабай Сүйіндіков дайындаған командасының №32 Әліби Жангелдин, Садықбек Адамбеков, Мұхтар Әуезов, Сұлтанбек Қожанов, Жұмабек Тәшенов және Жиделі жалпы орта білім беретін мектептерінің жастары жаттықтырылды.
Үздіктердің қатарынан көрінген жеңімпаз жастарды Арыс қаласының білім бөлімінің басшысы Әшімхан Тілеуханұлы, әдіскерлер мен білім беру ұйымдарының ұстаздары қарсы алды.
Айта кетсек, бұл арыстық команданың алғашқы жеңістері емес, үздік жетекшілер дайындаған жастар қатарынан 5 жыл үштіктің қатарынан көрініп келеді.
Атап өту керек, Кеңес Одағының Батыры, №1 Халық қаһарманы, Қазақстанның тұңғыш Қорғаныс министрі армия генералы Сағадат Нұрмағамбетовтың туғанына 100 жыл толуына орай ұйымдастырылған іс-шара әскери-патриоттық клубтар, әскери мектептер мен училищелер тәрбиеленушілері арасында ерекше әсер қалдырды.
Әскери-патриоттық жиынға Әзірбайжан, Беларусь, Қазақстан, Қырғызстан, Өзбекстан және Ресей құрамаларынан 750 адам қатысты.
Қазақстан командалары атынан өңірлерден, ҚР Қарулы күштерінің, басқа да әскерлер мен әскери құралымдардың әскери-патриоттық клубтарынан, ҚР Қорғаныс министрлігінің астаналық әскери колледжінен, «Жас ұлан» республикалық мектептерінен, «Арыстан» мамандандырылған лицейінен және облыстық әскери мектеп-интернаттардан жарысқа қатысты.
Жас патриоттар жарысының аяқталу рәсімінде Қорғаныс министрінің орынбасары, генерал-майор Шайх-Хасан Жазықбаев сөз сөйледі.
– Тиянақты дайындалған іс-шара өз мәресіне жетті. Бұл сайыс ақыл-ой, күш-қуат дайындығын, командада қалай жұмыс істеуді көрсетті. Жаңа достар, қызықты кездесулер мен тәжірибелер мәңгі есте қалады деп ойлаймын. Сендерге сәттілік тілеймін және өркендей беріңдер, – деді министрдің орынбасары.
Марапаттау рәсіміне «Қарулы Күштер ардагерлері» РҚБ төрағасының орынбасары отставкадағы генерал-майор Марат Нағұманов қатысты. Өз сөзінде ол жиынның халықаралық деңгейі жастардың Жеңіс батырларына деген құрметі мен ұрпақтар сабақтастығын көрсететінін атап өтті. Түрлі ел өкілдерінің жиынға қатысуы осындай сайыстарға әскерге дейінгі жастардың дайындық сапасын арттыруға септігін тигізеді.
Жиын ережесі бойынша бас жүлдені «Күшіміз бірлікте» финалдық ойынында жеңімпаз атанған алады. Оған өз санатында үздік деп танылған командалар қатысқанын айта кету керек. Бұл тартысқа толы сайыста Қарағанды қаласындағы Талғат Бигелдинов атындағы «Жас ұлан» республикалық мектебінің құрамасы жеңіске жетті. Осы команданың капитанына «Айбын-2024» X халықаралық әскери-патриоттық жастар жиынының бас жүлдесі табысталды.
Ұйымдастырушылар санаттар бойынша жарыстың барлық түрін қорытындылады. Қатысушы мемлекеттер командалары арасында бірінші орынды Қазақстанның намысын қорғаған Сағадат Нұрмағамбетов атындағы Қорғаныс министрлігі әскери колледжінің кадеттері олжалады. Екінші орында – Өзбекстан құрамасы, үшінші орында – Белоруссиядан келген Минск Суворов әскери училищесінің командасы.
Өңірлер санатында Ақмола облысының «Айбын» әскери-патриоттық клубы, екінші орында Түркістан облысының «Арыс» командасы, үшінші орында Абай облысының «Абай қырандары» командасы жеңіске жетті.
Қарулы күштердің, басқа да әскерлер мен әскери құралымдардың әскери-патриоттық клубтары арасында Десанттық-шабуылдау әскерлерінің «Жас десантшылар» командасы, екінші орында – «Оңтүстік» өңірлік қолбасшылығының «Болашақ», үшінші орында – Әуе қорғанысы күштерінің «Бес қару» командасы үздік деп танылды.
Республикалық мектептер мен облыстық әскери интернаттар ішінде бірінші орынды Қарағанды қаласының «Жас ұлан» республикалық мектебі, екінші орынды Абай облысы Семей қаласының «Жас ұлан» арнайы ерлер мектеп-интернаты, үшінші орынды Алматы облысының «Арыстан» мамандандырылған лицейі иеленді.
Жарыс жеңімпаздары кубоктармен, медальдармен, дипломдармен және естелік сыйлықтармен марапатталды.
«ANYQ.KZ»-ақпарат.
