Түркістан облысы: Денсаулық сақтау саласындағы түйіткілдер талқыланған штаб отырысы өтті

Түркістан облысында денсаулық сақтау саласында жүйелі жұмыстар атқарылып келеді. Түркістан облысы әкімі орынбасары Бейсенбай Тәжібаевтың төрағалығымен атқарылып жатқан жұмыстардың барысы кеңінен талқыланған штаб отырысы өтті. Оған жауапты сала басшылары мен мамандары, сонымен қатар онлайн режимде аудан һәм қала әкімдерінің орынбасарлары қатысты.

Күн тәртібінде адам папиллома вирусына қарсы вакцинацияның маңыздылығы және оны енгізу, Түркістан облысы бойынша міндетті әлеуметтік медициналық сақтандыру жүйесіне D және Е санатындағы сақтандырылмаған халықты тарту және дәрілік заттарды маркерлеу мәселелері талқыланды.

Қазақстанда жатыр мойны обыры әйелдер арасындағы онкологиялық аурулар статистикасы бойынша сүт безі обырынан кейін екінші орында тұр.

Қазақстанда күн сайын жатыр мойны обырының 5 жаңа жағдайы тіркеледі, осы аурудан күніне екі әйел көз жұмады. Сондықтан бүкіл әлемдегі онкологтар кейіннен қатерлі ісік тудыратын АПВ (адам папилломасы вирусы) қарсы вакцинациялауға шақырады.

Адам папилломасы вирусынан (АПВ) туындаған аурулар жасырын басталатын, созылмалы тұрақты ағымы бар ауруларға жатады және инфекцияның кіру қақпасы аймағында қатерсіз және қатерлі ісіктермен көрінеді.

АПВ — адам папилломасы вирусы. Бұл адамның ауыз қуысы мен жыныс мүшелерінің терісі мен шырышты қабығына әсер ететін байланысты вирустардың 200-ден астам түрі. Көп жағдайда бұл инфекция 2-3 жылдан кейін өздігінен өтеді және көбінесе адам үшін ешқандай белгілері байқалмай өтеді. Кейбір жағдайларда, АПВ-ның онкогендік түрлері ағзада қалып қойған жағдайда, бұл әртүрлі органдардың қатерлі ісігіне әкеледі. Ең алдымен – жатыр мойны обырына әкеледі. 100% жағдайда жатыр мойны обырының себебі АПВ-ның онкогенді түрлері (16, 18, 31, 33, 45, 52 және 58 түрлері) болып табылады.

Инфекция қоздырғышының көзі ауру адам немесе тасымалдаушы болып табылады.

Вирустың таралуының үш жолы бар – жыныстық, жанасу-тұрмыстық (тері шағын жарақаттары арқылы) және перинаталдық (анадан балаға). Әдетте, адамдарда иммунитет, әсіресе, әлсіреген сәтте, мысалы, тұмау және басқа жұқпалы аурулардан кейін пайда болады. Денеге бір рет енгеннен кейін вирус иммунитеттің төмендеуімен мезгіл-мезгіл өзін көрсете отырып, онда қалады.

АПВ қарсы екпе — қазақстандық әйелдерді жатыр мойны обыры мен басқа да онкологиялық аурулардың дамуынан қорғаудың заманауи және барынша тиімді (тиімділіктің 95% — ға жуығы) тәсілі.

АПВ қарсы екпе иық дельтоидына стандартты 0,5 мл көлемде бұлшықет ішіне енгізіледі. Екпеге қарсы көрсетілімдер болмаған жағдайда дәрігердің қарауынан кейін 6 ай аралықпен екі рет жүргізіледі.

АПВ қарсы екпе үшін Дүниежүзілік денсаулық сақтау ұйымымен сертификатталған және тиімділігі мен қауіпсіздігін дәлелдеген «Мерк Шарп және Доум» (АҚШ) компаниясы шығарған 4 валентті «Гардасил» вакцинасы қолданылады.

Зерттеушілер 11 жылдан астам уақыт бойы екі валентті және төрт валентті екпелермен егілген адамдарды бақылай отырып, уақыт өте келе қорғаныс деңгейінің төмендейтіні туралы ешқандай дәлел таппады. Сарапшылардың көбі екпе өмір бойы қорғауды қамтамасыз ете отырып, бірнеше онжылдықтар бойы тиімді болады деп санайды. АПВ қарсы екпе әйелдердің репродуктивті функциясына әсер етпейді және бедеулікті тудыруы мүмкін емес, бұл әлемнің дамыған елдеріндегі көптеген жылдар бойы жүргізілген клиникалық зерттеулерден дәлелденді. Бұл бірде-бір клиникалық дәлелденген фактісі жоқ қоғамда белсенді түрде таралған жалпы қате түсініктердің бірі.

АПВ қарсы алғашқы екпе 2006 жылы тіркелген. Бұл оның осы уақытқа дейін барлық қажетті клиникалық сынақтардан өткенін білдіреді. Қазіргі уақытта 2006 жылы екпе алғандардың арасында қорғаныс деңгейі төмендемейді, сондықтан ревакцинация жүргізудің қажеттілігін көрсететін фактілер жоқ. Болашақта ревакцинация (екпенің қосымша дозасын жүргізу) қажет болуы мүмкін екенін білу үшін зерттеулер жалғасуда.

Бүгінгі таңда АПВ қарсы екпелер 15 жылдан астам уақыт бойы қолданылып келеді және әлемнің 135 елінде, соның ішінде Өзбекстан, Қырғызстан, Түрікменстанда жүргізіледі.

АҚШ пен Австралия сияқты көптеген елдер оны жатыр мойны обырына қарсы ұлттық бағдарламаларына енгізді. Скринингтік бағдарламалармен бірге бұл елдердегі жатыр мойны обырының жиілігі мен өлімін айтарлықтай азайтуға көмектесті.

АПВ алдын алу жолдары:

Жыныстық қатынаста тек бір жыныстық серіктес болғаны дұрыс. Бұл әдіс жыныстық жолмен берілетін барлық инфекциялардан, оның ішінде АПВ-дан қорғауға мүмкіндік береді.
Тосқауыл контрацепциясын қолдану – жеңіл, қолжетімді, бірақ әрқашан инфекциядан 100% қорғай бермейді. Науқас тіпті зақымдалған теріге тиген кезде де вирус жұқтыруы мүмкін.
Мерзімді профилактикалық тексерулер. Қыздар гинекологиялық тексеруден тұрақты түрде өтуі керек. Осылай аурудың алғашқы белгілерін анықтап, оны емдеуді уақтылы бастауға болады.
Вакцинация – тиімді және ыңғайлы профилактикалық әдіс! Вакцинация ерлерге де, әйелдерге де жасалуы мүмкін. Ғалымдардың пікірінше, 11-13 жас аралығындағы қыздарды вакцинациялау жатыр мойны обырының даму қаупін 90% — дан астамға төмендетеді.

ҚР Денсаулық сақтау министрлігінің мәліметі бойынша 2024 жылдың қыркүйегінен бастап 11 жастағы қыздарды АПВ жоғары онкогенді түрлеріне қарсы 4 валентті вакцинамен егу жоспарлануда. АПВ вакцинасы 6 айлық аралықпен 2 рет егіледі. АПВ-ға қарсы 2 валентті вакцина 16, 18 типті антигендерінен және 4 валентті вакцина 6, 11, 16, 18 типті антигендерінен тұрады. Қолданыстағы вакциналардың тиімділігі өте жоғары.

Адам папиллома вирусына қарсы вакцинациялау ҚР Ұлттық егу күнтізбесіне енгізілді, екпе ата-аналардың ақпараттық келісімімен, тегін жүргізілетін болады.

Айта кету керек, АПВ вакцинасын әлемнің 110-нан астам елінде, оның ішінде Өзбекстан және Қырғызстан Республикалары сияқты көршілес елдерде егуде.

2006 жылдан бастап бірінші АПВ вакцинасы енгізілгеннен бері бүкіл әлем бойынша 100 миллионнан астам адам егілді, 270 миллионнан астам вакцина дозасы енгізілді. Әлемнің 135 елінде АПВ-ға қарсы вакцинация қыздарға, ал кей жағдайда ұлдарға арналған жоспарлы вакцинация күнтізбесі аясында жүргізіледі. Дүниежүзілік денсаулық сақтау ұйымының еуропалық аймағындағы 45 ел АПВ вакцинасын енгізді, жыл сайын көптеген ел енгізеді. Бұрын АПВ вакциналарын енгізген елдер, атап айтқанда, Австралия, Бельгия, Ұлыбритания, Германия, Дания, Жаңа Зеландия, Норвегия, АҚШ, Швеция және Швейцария вакцинацияның оң әсерін көрсете білді. АПВ вакцинасын қолдану деңгейі жоғары елдерде АПВ инфекциясы мен жатыр мойны патологиясы көрсеткіштерінің айқын төмендеуі байқалады. Көрші елдерден АПВ егу бағдарламасы 2019 жылдан бастап Түрікменстан, Қырғызстан, Өзбекстан, Армения, Грузия және Молдовада жүзеге асырылуда.

Ал міндетті әлеуметтік медициналық сақтандыру жүйесі 2020 жылғы 1 қаңтарда іске қосылды. Оны енгізудің арқасында денсаулық сақтау саласын қаржыландыру 2 есе өсті. МӘМС жүйесі іске қосылғанға дейін, 2019 жылы тегін медициналық көмектің кепілдік берілген көлеміне шамамен 1 трлн теңге бөлінді. Ал 2023 жылы халыққа көрсетілетін медициналық көмекті қаржыландыруға 2,5 трлн теңгеден астам, оның ішінде ТМККК бойынша – 1,4 трлн, МӘМС бойынша – 1 трлн теңгеден астам қаражат қарастырылған. МӘМС есебінен денсаулық сақтауды қаржыландырудың айтарлықтай өсуі медициналық көмектің қолжетімділігін жақсартуға мүмкіндік берді.

МӘМС жүйесінің негізгі принциптері:

әлеуметтік бағдар – мемлекет 15 жеңілдік санатындағы 11 миллион азаматқа жарна төлейді;
ортақ жауапкершілік — халықтың денсаулығы үшін мемлекет, жұмыс берушілер және азаматтар жауапты;
медициналық көмекке тең қолжетімділік — әрбір сақтандырылған азамат төленетін жарналардың мөлшеріне қарамастан, медициналық көмектің қажетті көлемін алуға құқығы бар;
ақша пациенттің артынан жүреді — пациент медициналық қызметті алу үшін өз қалауы бойынша медициналық ұйымды таңдай алады. Ол Қордың өнім берушісі болуы тиіс;
пациенттің құқығын қорғау — Қор медициналық ұйымдарға көрсетілген медициналық көмектің сапасы мен көлеміне мониторинг жүргізілгеннен кейін ғана медициналық қызметтер үшін ақы төлейді.

МӘМС жарналарын тұрақты төлейтін және «САҚТАНДЫРЫЛҒАН» мәртебесі бар азаматтар медициналық қызметтердің неғұрлым кең тізбесін қосымша төлемсіз-ақ ала алады.

Міндетті әлеуметтік медициналық сақтандыру тізбесіне мыналар кіреді:

Амбулаториялық жағдайдағы медициналық көмек (ауруларды диагностикалау және емдеу):

профилактикалық медициналық қарап-тексерулер (ТМККК бойынша көрсетілетіндерді қоспағанда);
МСАК дәрігерлерінің жолдамасы бойынша бейінді мамандардың қабылдауы және консультациясы;
бейінді мамандардың созылмалы аурулары бар адамдарды динамикалық бақылауы;
халықтың жекелеген санаттарына шұғыл және жоспарлы нысанда стоматологиялық көмек көрсету;
тізбеге сәйкес диагностикалық қызметтер, оның ішінде зертханалық диагностика;
тізбе бойынша басқа рәсімдер мен манипуляциялар;

Стационарды алмастыратын жағдайларда мамандандырылған, оның ішінде жоғары технологиялық медициналық көмек ( ТМККК шеңберінде ауруларды емдеу жағдайларын қоспағанда); сондай-ақ елдегі эпидемиологиялық жағдайдың нашарлауына әкелетін аурулар кезінде және оларға күдік туындаған жағдайларда үйдегі стационардың қызметтері.
Жоспарлы нысандағы стационарлық жағдайларда мамандандырылған, оның ішінде жоғары технологиялық медициналық көмек (ТМККК шеңберінде ауруларды емдеу жағдайларын қоспағанда).
Шұғыл нысандағы стационарлық жағдайда мамандандырылған көмек, оның ішінде тәуліктік стационар жағдайында емдеуді талап етпейтін диагноз қойылғанға дейін тәуліктік стационардың қабылдау бөлімшесінде емдеу-диагностикалық іс-шаралар жүргізу (ТМККК шеңберінде ауруларды емдеу жағдайларын қоспағанда).
Медициналық оңалту.
Патологиялық-анатомиялық диагностика.
Өлімнен кейінгі донорды дайындау.
МӘМС жүйесінде көмек көрсетілген кезде дәрілік заттармен және медициналық бұйымдармен қамтамасыз ету:

денсаулық сақтау ұйымдарының дәрілік формулярларына сәйкес стационарлық және стационарды алмастыратын жағдайларда мамандандырылған, оның ішінде жоғары технологиялық медициналық көмек;
уәкілетті орган бекітетін белгілі бір аурулары (жай-күйлері) бар азаматтардың жекелеген санаттары үшін дәрілік заттардың, медициналық бұйымдардың тізбесіне сәйкес амбулаториялық жағдайларда медициналық-санитариялық алғашқы және мамандандырылған медициналық көмек.

МӘМС төлемдері бойынша ставкалар өзгеріссіз қалды, бірақ 2024 жылдың 1 қаңтарынан бастап елімізде ең төменгі жалақы (ЕТЖ) мөлшері ұлғайды. Ол бірнеше төлемнің көлеміне әсер етті. Әлеуметтік медициналық сақтандыру қорында үстіміздегі жылы қазақстандықтар медсақтандыру үшін қанша төлеу керектігін айтып берді.

Жұмыс берушілер қызметкер үшін жалақының 3% мөлшерінде аударымдар жүргізеді, бұл ретте салық салынатын ай сайынғы табыс 10 ЕТЖ (2024 жылы 850 000 теңге) аспауға тиіс, яғни жұмыс берушінің аударымдарының ең жоғары төленетін сомасы айына 25 500 теңгені құрайды.

Бұл қаражат қызметкердің жалақысынан ұсталмайды, оларды жұмыс беруші кәсіпорын есебінен төлейді.

Азаматтық-құқықтық сипаттағы шарты негізінде қызмет көрсететін жалдамалы жұмыскерлер мен қызметкерлер МӘМС-ке ай сайынғы табысының 2% мөлшерінде жарна төлейді. Салық салу объектісі барлық жұмыс орындарынан айына 10 ЕТЖ (2024 жылы 850 000 теңге) аспауы тиіс, яғни қызметкердің жалақысына қарай, төлейтін ең жоғары жарнасы 17 000 теңгені құрайды.

Жеке кәсіпкерлер 1,4 еселенген ЕТЖ-дан 5% төлейді. 2024 жылы: (1,4 * 85 000) * 5% = 5 950 теңге.

Егер жеке кәсіпкер есептілікті «нөлмен» тапсырса, бірақ өз қызметін ресми түрде тоқтатпаса, онда ол Салық кодексі талап еткендей жарналарды төлеуді жалғастыруы керек екенін есте ұстаған жөн. Әйтпесе, қарыз пайда болады.

Дербес төлеушілер ең төменгі жалақының 5% көлемінде, яғни 4 250 теңге жарна төлейді.

Естеріңізге сала кетейік, МӘМС жүйесінде сақтандырылу үшін өткен 12 айдың берешегін жабу керек немесе алдағы 1 жылға жарна төлеуге болады. Бұл жағдайда төлемді әр айға жеке-жеке төлеген жөн.

1 қаңтардан БЖТ қолданылу мерзімі аяқталғандықтан, өзін-өзі жұмыспен қамтығандар мәртебені екі жолмен ала алады:

— жеке кәсіпкер ретінде тіркелу және жарналарды ЖК ретінде төлеу;

— жарналарды дербес төлеуші ретінде төлеу.

Мемлекет 15 жеңілдік санатына кіретін азаматтар үшін 2024 жылы 5852,63 теңге жарна төлейді.

ЕКІ ЖЕРДЕ ЖҰМЫС ЖАСАСА, ЖАРНАЛАРДЫ ҚАЛАЙ ТӨЛЕЙДІ?

Кейбір азаматтар екі жерде жұмыс істейді. Бұл жағдайда төлемдерді есептеу үшін шекті табысты ескеру керек – ол 10 ЕТЖ (2024 жылы 850 000 теңге).

МӘМС-ке аударымдар әр жұмыс орнынан аударылады, бірақ 25 000 теңгеден аспауы керек. (850 000 теңгенің 3%).

Ал жарналарды есептеу кезінде барлық жұмыс орынанан түсетін ортақ табысы ескеріледі, яғни әр айға жарна 17 000 теңгеден аспауы тиіс (850 000 теңгенің 2%).

Қызметкер төлемдерді дұрыс есептеу үшін бірінші жұмыс орнынан екіншісіне анықтама тапсыру керек.

Мысалы, қызметкер А ұйымынан 550 000 теңге жалақы алса, Б ұйымынан 400 мың теңге түседі. Оның ортақ табысы 950 000 теңге, яғни, шекті салық салынатын кірістен жоғары.

Бұл жағдайда бірінші жұмыс беруші 11 мың теңге көлемінде жарна ұстап, 16 500 теңге көлемінде аударым жасайды.

Екінші жұмыс орнында оған 6 000 теңге (жарнаның ең жоғары мөлшері 17 мыңнан төленген11 000 теңге жарнаны шегергенде) жарна төлейді.

Аударымдардың мөлшері 18 000 теңгені құрайды (аударымдарды есептеу үшін табыс қосылмайды).

Сондай-ақ, ресми қызметінен бөлек, жеке бизнесі бар жеке кәсіпкерлер де бар. Бұл жағдайда қызметкердің жалақысынан қажетті жарналар мен аударымдар төленеді әрі Салық кодексі талап еткендей жеке бизнесі үшін төлеуі қажет.

Ал үшінші мәселеге келсек, 2024 жылдың 1 шілдесінен бастап барлық дәрілік заттар міндетті түрде таңбалануға жатады. Дәрілік заттарды цифрлық таңбалау жүйесі әрбір дәрілік заттың қаптамасында өнімнің түпнұсқалығын тексеруге болатын бірегей data matrix цифрлық кодтарын пайдалануды көздейді, оны сканерлер, деректерді жинау терминалдары, POS терминалдар және телефон камералары арқылы сканерлеуге болады.

Қазақстанда дәрілік заттарға цифрлық таңбалауды енгізудің негізгі себебі – саудаға келіп түскен контрафактінің жоғары көрсеткіші мен дәрілік заттарды елге заңсыз әкелу жағдайларының көп болуына байланысты халықтың денсаулығына тікелей қауіп төндіруі. Сондай-ақ, дәрілік заттарды цифрлық таңбалау әрбір дәрінің қозғалысын онлайн бақылауға, сұранысты бағалауға және қажетті резервтерді қалыптастыруға мүмкіндік береді. Бұл мұқтаж адамдардың барлығын дәрі-дәрмекпен қамтамасыз етуге мүмкіндік береді.

Дәрілік заттарды таңбалау және қадағалау жүйесінде жұмыс істеу үшін дәріханалар ақпараттық жүйеде дәрілік заттарды қабылдауы қажет. Ол үшін жеке компьютер, деректерді жинау терминалы немесе ұялы телефон (iOS немесе Android негізіндегі смартфон) болса жеткілікті. Дәріхана қызметкері дәрі-дәрмекті сатқан кезде кодты оқуға арналған сканері бар бақылау-касса машинасын, POS-терминалын немесе ұялы телефонды пайдалана отырып, ақпараттық жүйеде дәрілік затты айналымнан алуы қажет.

Тауарларды таңбалау және қадағалаудың бірыңғай операторы қызметкерлері дәрілік заттарды сату үшін дәріханаларға не істеу қажет екенін еске салады:

Бақылау-кассалық машинаның (БКМ) болуы. Бұл ретте бақылау-касса машиналарының міндетті болуы таңбалауға байланысты емес және Қазақстан Республикасы Қаржы министрінің 2018 жылғы 16 ақпандағы №208 бұйрығына сәйкес Қазақстан Республикасында 2018 жылдан бастап қолданысқа енгізілді.
Таңбалау және қадағалау ақпараттық жүйесінде таңбаланған дәрілік препаратты айналымнан қабылдау және шығару үшін бақылау-кассалық машиналармен үйлесімді 2D сканерін алыңыз (2D сканерлерінің орташа құны 13 мың теңге).
Бақылау-касса машинасы болмаған жағдайда, таңбаланған дәрілік затты мобильді бақылау-касса машиналары (WebKassa, Rekassa және т.б.) немесе ұялы телефон арқылы сатуға және айналымнан шығаруға болады.

Сондай-ақ, қазіргі уақытта таңбаланған дәрілік заттарды айналымнан шығару мүмкіндігі Freedom Bank және Halyk Bank сияқты бірқатар екінші деңгейлі банктердің төлем терминалдары арқылы жүзеге асыруға болады.

Қадағалау функциясынан басқа, тегін Naqty Onim қосымшасы тұтынушыларға өнімнің дәріхана сөрелеріне дейін толық жолын, сатып алынған дәрінің Денсаулық сақтау министрлігі белгілеген шекті рұқсат етілген бағаға сәйкес келетінін білуге мүмкіндік береді. Қазақстанда дәрі-дәрмек бағасы жылына екі рет бекітіледі. Егер таңбалау кодын сканерлегеннен кейін сатып алушы дәрінің жарамдылық мерзімі өтіп кеткенін немесе дәрі-дәрмектің құны рұқсат етілген бағасынан жоғары екенін анықтаса, онда ол шағымды қосымшада қалдыра алады.

Бүгінде дәрі-дәрмектерді міндетті цифрлық таңбалау Ресейде енгізілген, сондай-ақ АҚШ-та және Еуропалық Одақ елдерінде, Түркия, Оңтүстік Корея, Үндістан, Қытай, Италия және Аргентинада белсенді түрде енгізілуде.

Дәрі-дәрмектерді таңбалауды енгізу барысында әр ел бірқатар оң әсерлер көрді. Фармацевтикалық таңбалау – бүкіл экономиканы цифрландыру бойынша үлкен жобаның бөлігі, бұл бүкіл ел үшін үлкен маңызға ие.

Қазақстанда дәрілік заттарды таңбалау жүйесі кезең-кезеңмен енгізіледі.

Мысалы, Ресей Федерациясында таңбалаудың бірінші кезеңі 2018 жылы басталды және 2021 жылға қарай олар дәрі-дәрмектердің барлық тізімін міндетті таңбалауға көшті. Дәрі-дәрмектерді таңбалауды тиімді енгізудің сәтті мысалы болып табылатын Түркияда дәрі-дәрмектерді міндетті түрде таңбалауға дайындық 8 жылға созылды.

Дүниежүзілік денсаулық сақтау ұйымының мәліметтері бойынша, дамушы елдердегі дәрі-дәрмектің әрбір оннан бір пакеті контрафактілік болып табылады. Таңбалау, өз кезегінде, тұтынушыларға емделу үшін сатып алынған дәрі-дәрмектің түпнұсқалығы мен жарияланған сапасына кепілдік береді.

Цифрлық таңбалаудың арқасында цифрлық платформа, дәрі-дәрмек нарығы айналымына қатысушылардың бірыңғай тізілімі, дәрі-дәрмектердің бірыңғай каталогы құрылады, нақты уақыт режимінде ел ауқымында дәрі-дәрмек айналымының статистикасын алуға мүмкіндік пайда болады. Контрагенттердің қағаз жүзінде өзара іс-қимылынан алшақтап, мемлекеттік органдар арасындағы өзара іс-қимыл жеңілдетілетін болады.

Міндетті таңбалау мен қадағалауды енгізу контрафактілік және жалған өнімдердің айналымынан қорғаудың негізгі құралдарының бірі бола отырып, сатып алушыға сатып алынатын дәрі-дәрмектердің түпнұсқалығын өз бетінше тексеруге мүмкіндік беретін, дәрі-дәрмектердің «ағынының» шығындарын едәуір төмендететін, дәрі-дәрмектердің қалдықтары бойынша ақпаратты шоғырландыруды жеңілдететін, сондай-ақ өндірушіден пациентке дейінгі дана-дана қаптаманың жеке есебін қамтамасыз ететін дәрі-дәрмек айналымын неғұрлым ашық етеді.

Медициналық дәрі-дәрмектерді цифрлық таңбалау және қадағалау жүйесін енгізу – бұл сапалы медициналық көмекке қол жеткізуді және контрафактіліктен қорғауды қамтамасыз етуге бағытталған қадам.

Жауапты сала басшыларының баяндамасын тыңдаған облыс әкімінің орынбасары жұмысты тиісті деңгейде ұйымдастыру жөнінде бірқатар тапсырма берді.

– Жұмыс барысын білесіздер. Нақты іс-шара жоспарын, жұмыс алгоритмін жасау керек. Сол бойынша құзырлы органдармен бірлесе тиісті жұмыс жүргізіңіздер. Орын алған кемшіліктерді реттеу керек. Мәселелерді бірлесе шешіңіздер, – деді Бейсенбай Тәжібаев.

Тұрғындарды міндетті әлеуметтік медициналық сақтандыру (МӘМС) жүйесінде сақтандыру бойынша ілгері басу бар. Жауапты мамандар тарапынан жүргізілген анықтау және ақпараттық-түсіндіру жұмыстарының нәтижесінде «Е» категориясы бойынша міндетті әлеуметтік медициналық сақтандыру жүйесінде сақтандырылмаған басқа аймақтарға және шет мемлекеттерге қоныс аударған, тұрғылықты мекенжайда нақты тұрмайтын 1288 адам анықталып, олардың тізімі ақпараттық жүйеде өзектендіру үшін ішкі істер департаментіне жолданған.

Сонымен қатар «Д» категориясындағы азаматтардың тізіміне талдау жасалынды. Жүргізілген жұмыстардың нәтижесінде аталған жүйеге 2006 адам тіркеліп, 700-ге жуық адам жұмысқа орналастырылды. Сонымен қатар 5 мыңнан астам адам басқа өңірлерге және шет мемлекеттерге көшіп кеткені анықталды. Бұл азаматтарды базадан шығару жұмыстары жүргізіліп жатыр.

«ANYQ.KZ»-ақпарат.