Түркістан облысының әкімі Дархан Сатыбалдының тапсырмасына сәйкес Жетісай ауданына инвестиция тарту жұмыстарын жүйелі, қарқынды жүзеге асыру мақсатында Жетісай ауданында бірқатар жобалар жүзеге асырылу үстінде.
Биыл жыл соңына дейін ауданға жалпы 40,8 миллиард теңгеге инвестиция тарту жоспарланса, биылғы бірінші тоқсанда 4148,9 миллион теңгені құраған негізгі капиталға бағытталған инвестицияның 3866,1 миллион теңгесі бюджеттік емес инвестициялар болып табылады. Бұл көрсеткіш өткен жылдың тиісті кезеңімен салыстырғанда 6,1 есе, ал жоспардан 5,4 есе артық орындалып отыр.
Жыл соңына дейін ауданда жалпы соммасы 8,2 миллиард теңгені құрайтын 29 инвестициялық жобаны іске асырып, 625 жаңа жұмыс орнын ашу жоспарланса, оның 6,6 миллиард теңгесі білім, денсаулық, спорт, туризм секілді қызмет көрсету саласындағы 23 жобаға, 1,5 миллиард теңгесі өндірістік санаттағы 5 жобаға бағытталатын болады.
Нақтырақ айтар болсақ, Жетісай қаласында жылына 500 мың жұп аяқкиім шығаратын «Ұлықбек» аяқкиім цехы жобасының құрылысы жүргізіліп жатса, құны 350 миллион теңгені құрайтын «Тоқыма емес мата өндірісі» цехының құрал-жабдықтары орнатылуда. Жоба аясында жылына 1,8 миллион тоқыма емес мата өндіру көзделуде.
Сонымен қатар, Ш.Ділдәбеков ауылдық округінде іске қосылуы жоспарланған 300 миллион теңгелік «Бетон зауыты» жобасының құрылыс-монтаж жұмыстары толығымен аяқталып, құжаттандыру жұмыстары жүргізілуде. Зауыт іске қосылған соң сағатына 100 текше метр бетон өндіріледі.
Аудан кәсіпкерлерінің жеке инвестициялық салымдары есебінен Мақталы ауылдық округінен құны 100 миллион теңгені құрайтын «Мақталы Жер» ЖШС-нің «Бақша өнімдерін қайта өңдеу цехы» жобасы, Ж.Ералиев ауылдық округінде «Тұран Мақта» ЖШС-нің 300 миллион теңге болатын 10 мың тонналық «Мақта шикізатын өңдеу зауыты» жобасы іске асырылатын болады.
— Ауданға инвестиция салуға ниетті кез-келген кәсіпкерге аудан әкімдігі тарапынан барынша қолдау көрсетуге, жан-жақты сүйемелдеуге, кәсіпорын салушы азаматтарды қажетті инфрақұрылымдармен толықтай қамтамасыз етуге мүдделіміз, — дейді Жетісай ауданының әкімі Серік Мамытов.
Айта кетейік, өткен жылы жүргізілген жұмыстардың нәтижесінде ауданда негізгі капиталға бағытталған инвестиция көлемі 15053,9 миллион теңгеге жеткен. Оның 8771,6 миллион теңгесі бюджет есебінен болса, 6133,3 миллион теңгесі жеке қаражат есебінен тартылған.
«ANYQ.KZ»-ақпарат.
