Бүгін Отырар ауданы әкімі Әбдіғали Жүнісов Қоғам, Қарғалы ауылдық округтерінде болып, ауылды ағын сумен қамтамасыз ететін Д.Алтынбеков каналын қалпына келтіру жұмыстарымен танысты.
Ағын судың тапшылығы Қарғалы, Отырар елді мекендеріндегі шаруалардың көптен бергі көтеріп келе жатқан мәселесі болатын. Әсіресе шілде-тамыз айларында жоғарыдан келетін ағын судың төмен қарай жүруіне ұйық-шөгінділердің жиналуы кедергі келтіріп, қиындықтар туғызып келген. Аталған мәселелерді мүмкіндігінше шешу мақсатында ағымдағы жылы Д.Алтынбеков каналының Қарғалы-Отырар елдімекендері тұсындағы 2 шақырымы ұйық-шөгінділерден тазаланса, бүгін міне 1 шақырым айналма каналды қазу жұмыстары басталды.
Сонымен қатар аудан басшысы каналдың су өткізу қабілеті төмендеген 1 шақырымға жуық бөлігінен ағын суды кедергісіз өткізу мақсатында «Қазсушар» РМК-ы тарапынан қазылып жатқан айналма каналдың және Сырдария өзенінің кері тепкісінен Д.Алтынбеков каналына қосымша су беретін «Қызыл-Ту» насос станциясындағы 4-дана СНП-500 электрлі насостарын орналастыру жұмыстарының барысымен танысты.
Аудан әкімі Әбдіғали Айтжанұлы тиісті сала мамандарына соңғы жылдары орын алып отырған су тапшылығын ескере отырып, келген суды тиімді, ысырапсыз пайдалану мақсатында барлық мүмкіндіктерді қарастыруды тапсырып, аталған мәселе өзінің тікелей бақылауында болатындығын ескертті.
«ANYQ.KZ-ақпарат»
