Асқазанын кішірейткен науқас 15-80 кг-ға дейін салмақ жоғалтады.
Алайда дәрігерлер бұл ота соңғы шара, деп түсіндірді. Басқа амалдар таусылған кезде ғана пышақтың астына жатудың мағынасы бар. Түркістан облыстық клиникалық аурухананың жоғары санатты хирург- дәрігері Жеңіс Серғазиннің айтуынша, салмақ жоғалту операцияларының бірнеше түрлері бар. Асқазанды кішірейту операциясы, яғни лапароскопиялық бариатрия пациент жасына, ағзасына байланысты жасалады. Сәйкесінше, нәтижелері де әртүрлі. Соңғы жылдары семіздікке шалдыққан азаматтардың саны артуда.
«Семіздікке шалдыққан науқас бірден операцияға жіберілмейді. Бұл емдеудің қатаң көрсеткіштері болуы керек. Әдетте, алдымен диета және дене шынықтырумен айналысу керек. Кейде психокоррекция қолданылады. Егер мұның бәрі көмектеспесе, онда хирургияға жүгінуге болады. Әдетте операция дене салмағының индексі 35-тен асатын науқастарға жасалады. Бұл көрсеткішті формула бойынша есептеуге болады», — дейді хирург.
Түркістандық дәрігерлер салмағы 135 кг келетін науқасқа ота жасады. 47 жастағы азамат семіздіктен басқа, артериялық гипертензияға шалдыққан. Қосымша шағымдары да көп. Дәрігерлердің айтуынша, отадан кейінгі он күн ішінде науқас 10 келі салмақ жоғалтып, өзін әлдеқайда жақсы сезінеді.
Түркістан облысы Қоғамдық денсаулық басқармасы баспасөз қызметінің мәліметінше, 2017 жылдан бастап облыстық клиникалық ауруханада осындай 48 ота жасалған.
«ANYQ.KZ» — ақпарат
