Ғылым және жоғары білім министрі Саясат Нұрбек 2024 жылы өтетін Ұлттық бірыңғай тестілеуге қатысты мәлімдеме жасады.
«Құрметті болашақ студенттер! Сіздер үшін ҰБТ-2024 өзгеріссіз қалатынын қуана хабарлаймын. Тестілеуде тек екі пәнді тапсырасыздар: Қазақстан тарихы (20 тапсырма, шекті балл – 5) және оқу сауаттылығы (10 тапсырма, шекті балл – 3). Тапсырмаларды орындау уақыты — 70 минут. Ал шығармашылық емтихандардың өзі жоғары оқу орындарында өтеді», — деді ол.
Министрдің айтуынша, мұндай шешім өтініш берушілердің өздерінің және тиісті ведомстволардың тілектері негізінде қабылданған.
«Қорытындылай келе, былтыр Ғылым және жоғары білім министрлігі негізгі ҰБТ-ны екі рет тапсыру және үздік нәтижемен гранттар беру үшін конкурсқа қатысу мүмкіндігін ресми түрде бекіткенін еске саламын. Егер ақылы негізде оқу үшін ҰБТ-ны тапсырудың тағы үш мүмкіндігін ескерсек (қаңтар, наурыз, тамыз) 2024 жылғы талапкерлер тестілеуден бес рет өте алады», — деп қорытындылады Саясат Нұрбек.
Айта өтейік, 136 мың адам қаңтар айында өтетін тестілеуден өтуге ниет білдірді. ҰБТ 15 қаңтар мен 10 ақпан аралығында өтеді. Атап өтсек, талапкерлер өтініш беру барысында олар тестілеу күнін, уақытын және орнын өздері таңдады.
«ҰБТ барысында калькулятор, химиялық элементтердің периодтық жүйесі (Менделеев кестесі) және тұздардың ерігіштік кестесі компьютер экранында көрсетіледі. Тест тапсырушылар тестілеу аяқталғаннан кейін 30 минут ішінде апелляцияға өтініш бере алады. Сертификат апелляциялық комиссияның шешімінен кейін талапкердің жеке кабинетінде қолжетімді болады», — дейді Ұлттық тестілеу орталығының директоры Руслан Емелбаев.
ҰБТ-дағы пәндердің саны өзгеріссіз қалады, яғни үшеуі міндетті және екеуі таңдау бойынша. Алайда «Оқу сауаттылығы» мен «Математикалық сауаттылық» міндетті пәндерінен тапсырмалар саны 5 сұраққа қысқарады. Ал бейіндік пәндердің сұрақтар саны артып, 40 тест тапсырмасынан тұратын болады.
Бейіндік пәндерде берілген тізімнен сәйкестікті анықтауға арналған 5 тапсырма қосылады. Осылайша, ҰБТ тапсырмалар саны өзгеріссіз қалады, жалпы 120 сұрақ. Оның ішінде «Қазақстан тарихынан» 20 тапсырма, «Оқу сауаттылығынан» 10 тапсырма, «Математикалық сауаттылықтан» 10 тапсырма және екі бейіндік пән бойынша 40 тапсырма. Жоғары балл – 140, ол да өзгеріссіз қалды.
Тестілеу уақыты – 4 сағат (240 минут). Бұл ретте ерекше білім беру қажеттіліктері бар балалар үшін ұсынылатын қосымша 40 минут уақыт сақталатынын айта кету керек.
«ANYQ.KZ»-ақпарат.
