Түркістан облысында су нысандарын күтіп ұстау басты назарда тұр

“Тұран су” ШЖҚ МКК қызметкерлері кәсіпорын теңгеріміндегі су қоймалары мен бөгеттерді, су нысандарын күтіп ұстау міндетін жүйелі түрде жүзеге асырып келеді. Осыған сәйкес мекеме мамандары кезекті мәрте ағын су нысандарын күл-қоқыстан тазартып абаттандыру жұмыстары арқылы канал аумақтарын ретке келтірді.

Бұл күнгі тазалық жұмыстарына мекеме мамандары белсенді түрде ат салысса стратегиялық маңызға ие су нысандары мен тоспаларының темір жабдықтары әктеп-сырланып канал жиектерінің шөптері де шабылды. Айта кету керек мұндай тазалық шаралары жыл сайын дәстүрлі түрде өз жалғасын тауып отыр. Ал мұндай тазалық шаралары су нысандарының қалтқысыз жұмыс жасауына оң әсерін тигізетіндігі анық. Әрі тазалық сақтай отырып сапалы қызмет көрсету — мекеме ұжымының басты мақсаты!

Тазалық демекші, бүгін Сарыағаш ауданында өткен жалпыаудандық тазалық акциясына аудан тұрғындары мен кәсіпкерлік нысандар біркісідей атсалысып, белсенділік танытты.

Атап айтқанда, Сарыағаш қаласындағы Шәмші гүлзары, Қабланбек көшелерінің тұрғындары ерекше белсенділік танытып, көше бойындағы арық-атыздарды қоқыстан тазартып, ағаш көшеттерін суғарып, әктеу-сырлау жұмыстарын жүргізді.

Ауданның көркейіп, гүлденуіне әрбір тұрғын бей-жай қарамай, қоқыс-қалдықтарды кез келген жерге тастамастан, таза ұстауға ат салысуы қажет. Өйткені, ортақ үйіміздің көркеюі өз ауламызды таза ұстаудан басталатыны белгілі. Сенбілік барысында осыны жастарға сабақ еткен тұрғындар қаймағы бұзылмас ынтымақ пен бірліктің ерен үлгісін көрсетті.

Сонымен қатар, тазалық шарасына кәсіпкерлік нысандар да белсене атсалысты. Сарыағаш қаласындағы «Карима» сауда орталығы мен Көктерек кентіндегі «Сарыағаш» ЕОК ЖШС, «Арман», «Сая», «Алтын Шаңырақ», «Маржан-су», «Байқоңыр» шипажайларының жұмысшылары өз аумағында тазалық жұмыстарын жүргізіп, ретсіз тасталған қоқыстарды тазалап, көшеттер мен гүлдерді суғарып, әктеу-сырлау жұмыстарын жүргізіп, қураған ағаш бұталарын ретке келтірді.

Жалпыаудандық тазалық акциясына ардагерлер қатысып, қаланы көгалдандыру, Саялы Сарыағаш-Сырлы Келес аллеясына гүлдер отырғызу, көшеттерді суғарып абаттандыру жұмыстарына өз үлестерін қосты.

— Туған жерге қамқорлықпен қарау-әр азаматтың борышы. Әсіресе айналаның тазалығы — тұрғындар денсаулығы үшін де, ұрпақ тәрбиесі үшін де керек, өте маңызды іс. Сондықтан біз ауданды көгалдандыруға, тазалау және көркейту жұмыстарына әрдайым атсалысамыз. Өткен жолы аллея аумағын жасыл ағаш шарбағымен қоршаған болсақ, міне бүгін абаттандыру жұмыстарын жүргізіп отырмыз, — деді ардагер Мейірбек Бекарыстанов.

Қалыптасқан дәстүр бойынша әр көктем сайын мекеме ғимараты мен іргелес жатқан аумақтарды ретке келтіру жұмыстары жүргізіледі. Тазалық акциясына жедел жәрдем қызметкерлері қатысып, өз аумақтарын шөптен тазарту, бейберекет тасталған қоқыстарды жинау, қураған ағаш бұталарын ретке келтіріп, әктеу-сырлау жұмыстарын жүргізді.

1 мамыр — Қазақстан халықтар бірлігі күніне орай бүгін аудан аумағын қоқыстан тазарту, көшет отырғызу, ақтау-сырлау жұмыстары, көше бойларын және арық-атыздарды ретке келтіру, қураған ағаш бұталарын кесу мақсатында жалпыаудандық тазалық акциясы өтті. Аудан көлемінде жүргізілген тазалық акциясына аудан әкімі аппаратының қызметкерлері мен дербес бөлім мамандары 13 көп қабатты тұрғын үй маңында егілген көшеттерді суғарып, тазалық жұмыстарын жүргізіп, өздеріне бөлініп берілген секторларды қоқыстан тазалады. Сонымен қатар, қала, кент және ауылдық округ әкімдері мен мамандары өз аумақтарында санитарлық-тазалық жұмыстарын жүргізіп, тазалық акциясына белсене қатысты. Жалпы тазалық акциясына 20-дан аса техникалар жұмылдырылды.

Тазалық жұмыстары тұрғындардың қоршаған ортаны таза ұстауға, экологиялық мәдениет қалыптастыруға және ауданның санитарлық жағдайын жақсартуға оң әсерін тигізуде. Адам денсаулығының айнымас бір бөлігіне айналған табиғат тазалығын қалыптастыруға бағытталған аталмыш шара алдағы уақытта да өз жалғасын табатын болады. «Тазалық жинаған жерде емес, сақталған жерде болады» дегендей, әрбір тұрғынды өз ауласының тазалығына көңіл бөліп, қоршаған ортаны ластамай, тазалық акциясының алдағы науқанына да белсенді атсалысуға шақырамыз.

«ANYQ.KZ»-ақпарат.