Бүгін Ордабасы ауданының әкімі Нұрбек Бадырақов Жеңіс ауылдық округінің тұрғындарымен кездесіп, жылдың басынан атқарылған және алдағы уақытта атқарылатын жұмыстар туралы баяндама жасады.
Жеңіс ауылдық округінің ауыл шаруашылығы саласына жыл басынан бері 24 миллион теңге инвестиция тартылған. Ауылдық округте тамшылатып суғару әдісі 15 гектарға ендірілген. 3829 гектар жер игерілген. Егістік жерлерге картоп, мақта, мал азығы, көкөніс, дәнді жүгері, бақша егілген.
Дихан ауылына газ құбырын тарту үшін сәулет-жоспарлау тапсырмасы әзірлену үстінде.
Осы жылы Жеңістегі су мұнарасына баратын жолға, айналасына тас төселеді. Сонымен қатар, Жеңіс ауылындағы С.Сейфуллин көшесі орташа жөндеуден өтеді.
Аудан басшысы осы және тағы да басқа жұмыстарға кеңінен тоқталып, тұрғындардың сауалдарына жауап берді.
Сонымен қатар бүгін аудан әкімі Нұрбек Бадырақов бекітілген кестеге сәйкес Бөген ауылдық округінің тұрғындарымен де кездесті. Аудан басшысы бөгендіктерді жыл басынан атқарылған жұмыстардан және алдағы жоспарлар туралы құлағдар етті.
Кемер ауылындағы 40-тан астам үйге ауыз су құбырын тарту (1 шақырым 200 метр) жұмыстары осы айда басталып, шілдеде аяқтау жоспарланған.
4766 тұрғыны, 712 үйі бар Бөген ауылын газбен қамту жұмыстары 2024 жылы толық аяқталады. Қазіргі таңда 260 үй келісім шартқа тұрып, 20-сы үйіне құбыр тартқызып үлгерген. Ал, Кемер ауылының газ жүйесі бойынша құжаттар салалық басқармаға қаржы қарастыруға ұсынылған.
Биыл Бөген ауылындағы Ақалтын көшесіне, Кемер ауылындағы Береке, Бірлік көшелеріне жарықтандыру құрылғылары орнатылатын болады.
Бөгендегі Ы.Алтынсарин көшесі (қиылыс көшелер) орташа жөндеуден өткізілетін болады. Сондай-ақ стрит воркаут пен балалар ойын алаңшасын орнату жоспарлануда.
”Ауылдық денсаулық сақтауды жаңғырту» Ұлттық пилоттық жобасы аясында 2023 жылға іске асыру жоспарына Бөген елді мекенінен Дәрігерлік амбулатория құрылысы енгізілген. Оның құрылысына жобалық-сметалық құжаттама әзірлеуге қаржы қаралған.
Негізгі қолға алынатын жұмыстар туралы толыққанды ақпарат берген аудан басшысы тұрғындардың сауалдарына жауап беріп, олар маңыздылығына қарай шешімін табатынын жеткізді.
«ANYQ.KZ»-ақпарат.
