Түркістан облысының Төлеби ауданындағы Бірінші Мамыр жалпы білім беретін мектебінде қазіргі таңда 20-ға жуық ұлттың (қазақ, орыс, өзбек, түрік, әзірбайжан, шешен, күрд, татар, украин, тәжік, авар, кәріс, неміс, ұйғыр, иран, қытай, тағы басқа) балалары оқып жүр. Бұл мектептің ұжымы да көпұлтты.
– Бірлігі жарасқан Бірінші Мамыр жалпы білім беретін мектебінің 219 ұстазы 1803 оқушыға қазақ және орыс тілінде сапалы білім, саналы тәрбие беруде. Ауылдық округіміз де, осы округтің әкімшілік орталығы болып табылатын елдімекен де Бірінші Мамыр деп аталатындықтан, осында орналасқан 90 жылға жуық тарихы бар мектебімізге де Бірінші Мамыр деген атау берілген. Мұны біздің мектеп ұжымы да, оқушыларымыз да мақтан етеді. Олардың барлығы елімізде жыл сайын аталып өтетін 1 мамыр мейрамын, яғни Қазақстан халқының бірлігі күні мерекесін асыға күтеді. Жылда аталмыш мерекенің қарсаңында мектебімізде Қазақстанда тұрып жатқан түрлі этностардың бірлігін, ынтымағын, достығын, татулығын дәріптейтін тартымды сынып сағаттары, тәрбиелік мәні зор, қызықты кластан тыс іс-шаралар ұйымдастырылады, – дейді Бірінші Мамыр жалпы білім беретін мектебінің директоры Бекжан Баймұсаев.
Қазақтықтың қаймағы сақталған, мемлекеттік тіл тұғырына қонған Түркістан өңірінде осындай ерекше мектеп бар. Бірлігі жарасқан өңір халқы елдің дамуы мен тұрақтылығына үлестерін қосып келеді.
Еске салайық, Бірінші Мамыр (2006 жылға дейін – Первомаевка) — Түркістан облысы Төле би ауданындағы ауыл, Бірінші Мамыр ауылдық округі орталығы. Аудан орталығы – Леңгір қаласынан оңтүстікке қарай 11 шақырым жерде, Бадам өзенінің бойында орналасқан. 1961 жылы құрылған “Первомайский” көкөніс-сүт кеңшарының орталығы болды. Оның негізінде Первомаевкада ӨК, ЖШС, шаруа қожалықтары ұйымдастырылды. Ауылда орта мектеп, мәдениет үйі, кітапхана, фельдшерлік-акушерлік пункт жұмыс істейді. Бірінші Мамыр ауылына жақын Ақмешіт, Қырыққыз сияқты табиғаты көрікті туристік жерлер бар.
«ANYQ.KZ»-ақпарат.
