Түркістан қаласында күннің күрт ысуына байланысты төтенше жағдайлар қызметінің өрт сөндірушілері балаларға арналған ерекше сергіту шарасын ұйымдастырды. Арнайы өрт сөндіру техникасының көмегімен су шашылып, аптап ыстықтан сая іздеген балаларға көтеріңкі көңіл-күй мен жазғы демалыстың жарқын сәттері сыйланды.
Іс-шараның басты мақсаты – балалардың жазғы демалысын қызықты әрі қауіпсіз өткізуге жағдай жасау, тұрғындар арасында қауіпсіздік мәдениетін қалыптастыру және құтқарушылар мен халық арасындағы өзара сенімді нығайту болды.
Шара барысында балалар өрт сөндіру техникасымен жақын танысып, құтқарушылардың күнделікті қызметі, олардың жауапты әрі қауіпті жұмысы туралы қызықты мәліметтер алды. Сондай-ақ өрт сөндірушілер балалардың сұрақтарына жауап беріп, төтенше жағдай кезінде қалай әрекет ету керектігін түсіндірді.
Сонымен қатар, төтенше жағдайлар қызметінің мамандары тұрғындарға жаз мезгіліндегі қауіпсіздік талаптарын тағы бір мәрте еске салды. Атап айтқанда, су айдындарында тек рұқсат етілген орындарда ғана шомылу, күннің ең ыстық уақытында ұзақ жүрмеу, балаларды қараусыз қалдырмау және күн өтудің алдын алу шараларын сақтау қажеттігі түсіндірілді.
Мамандардың айтуынша, мұндай профилактикалық іс-шаралар балалардың қауіпсіздік туралы түсінігін қалыптастырып қана қоймай, құтқарушылардың қоғаммен ашық байланысын нығайтуға және төтенше жағдайлардың алдын алуға да ықпал етеді.
Мемлекет басшысы Қасым-Жомарт Тоқаев азаматтардың өмірі мен денсаулығын қорғау, қауіпсіздік мәдениетін қалыптастыру және профилактикалық жұмыстарды күшейту – мемлекеттік саясаттың басым бағыттарының бірі екенін үнемі айтып келеді. Осыған сәйкес Үкімет пен Төтенше жағдайлар министрлігі жазғы кезеңде халықтың қауіпсіздігін қамтамасыз етуге ерекше назар аударып, еліміздің барлық өңірінде судағы қауіпсіздік, өрттің алдын алу және аптап ыстық кезіндегі сақтық шаралары бойынша кең ауқымды түсіндіру жұмыстарын жүргізуде. Түркістан облысында да құтқарушылар профилактикалық рейдтермен қатар халықпен етене байланыс орнатуға бағытталған тағылымды акцияларды тұрақты ұйымдастырып келеді. Түркістан қаласында өткен бұл сергіту шарасы – балаларға қуаныш сыйлаған мерекелік бастама ғана емес, қауіпсіздік мәдениетін ерте жастан қалыптастыратын тәрбиелік мәні зор акция. Өйткені адам өмірі мен денсаулығын сақтау – әрбір мемлекеттік органның ғана емес, бүкіл қоғамның ортақ жауапкершілігі.
«ANYQ.KZ»-ақпарат.
