Қожа Ахмет Ясауи атындағы Халықаралық қазақ-түрік университеті Медицина факультетінің бітіруші түлектеріне диплом табыстау рәсімі өтті. Салтанатты шарада университетіміздің ректор өкілі, профессор Женгиз Томар, Жауапты хатшы Гүлнар Абайқызы Байсенкул және Медицина факультетінің деканы Ықылас Сүйіндікұлы Молдалиев құттықтау сөз сөйлеп, бітіруші түлектерге ақ жол тіледі. Биылғы жылы 322 түлек Медицина факультетінен түлеп ұшты. Факультет деканы Ықылас Молдалиев осы уақытқа дейін аталмыш факультететті 5500-ден астам түлек бітіріп, еліміз бен алыс жақын шетелдерде медицина саласында жемісті еңбек етіп жүргенін айтып өтті.
Айта кетейік, түлектер Түркістан қаласындағы орталық Медицина факультетінде бакалавр дәрежесінде 5 жыл білім алды. Ендігі жерде Шымкент кампусындағы 2 жылдық интернатурада білімдерін жетілдіріп, толық санатты маман иесі атанады. Бүгінгі шара барысында студенттік шағында оқуда озат, қоғамдық шараларға белсене араласып жүрген бітіруші түлектер университет ректорының Алғыс хатымен марапатталды.
Бес жылдық білімнің жемісі саналатын дипломды табыстау сәтін тағатсыздана күткен білімгерлердің қуанышында шек жоқ еді. Өз кезегінде студенттер сапалы білім беруге барлық жағдайды жасаған оқу ордамызға, оқытушы-профессорлар құрамына алғыстарын жеткізді.
Іс-шара бітіруші түлектер үшін арнайы дайындалған концерттік бағдарламаға ұласты. Кеш соңында түлектер ұстаздары мен оқу орнына деген алғысын әнмен жеткізді.
