Түркістан қаласының әкімі Әзімбек Пазылбекұлы қала аумағындағы абаттандыру және санитарлық тазалық жұмыстарының жай-күйімен танысып, жауапты сала басшыларымен көшпелі жиын өткізді.
Алдымен қала басшысы Әкімшілік-іскерлік орталығындағы Түркістан облысының құрылыс басқармасы тапсырысымен абаттандырылып, көгалдандырылған №13, 30, 32, 34 және 36 көшелердің жай-күйі бойынша аралады. Нысандардағы жүргізіліп жатқан қалпына келтіру жұмыстарының сапасы мен мерзіміне ерекше назар аударылды.
Қазіргі таңда күннің аптап ыстығығында аллеялардың суарылуы мен аталған көшелердегі арам шөптерді тазарту, көгалдар мен жасыл желектерді күтіп-баптау, қураған ағаштарды қалпына келтіру, жарық бағаналарын ретке келтіру бағытында жұмыстар жүргізілуде. Қала әкімі барлық анықталған кемшіліктерді толық жойып, нысандарды талапқа сай қалыпқа келтіргеннен кейін ғана қала теңгеріміне қабылдау жұмыстарын жүргізуді тапсырды. Сондай-ақ жауапты мекемелерге барлық жұмыстарды осы айдың соңына дейін толық аяқтауды міндеттеді.
Сонымен қатар, Әкімшілік-іскерлік орталығындағы №30 көшеде орналасқан бау-бақша аумағын арам шөптерден толық тазарту, жасыл аймақты күтіп-ұстау жұмыстарын жеделдету жөнінде нақты тапсырмалар берілді.
Көшпелі жиын барысында қала аумағындағы тазалық пен қоғамдық тәртіп мәселесіне де ерекше назар аударылды. Әзімбек Пазылбекұлы жеке кәсіпкерлік нысандардың иелері мен жер пайдаланушылардың өздеріне тиесілі аумақтарды таза ұстап, абаттандыру қағидаларын қатаң сақтаудың маңызын атап өтті. Осы талаптарды орындамаған, рұқсатсыз қоқыс тастаған немесе санитарлық талаптарды бұзған тұлғаларға қолданыстағы заңнамаға сәйкес әкімшілік шаралар қолданылып, айыппұл салу жұмыстары жүргізілетін болады.
Бұдан бөлек, «Жасыл Түркістан» КММ мен тазалыққа жауапты мекемелерге Әкімшілік-іскерлік орталығындағы көшелерді арам шөптерден тазарту, жол жиектерін ретке келтіру және санитарлық тазалық жұмыстарын күшейтілген режимде жалғастыру тапсырылды.
“Қала аумағында тазалық пен көріктендіру жұмыстарын жүйелі түрде жүргізу – тұрғындарға қолайлы әрі жайлы орта қалыптастырудың маңызды бағыты. Бұл жұмыстар қала басшысының тұрақты бақылауында болып, жауапты мекемелердің үйлесімді іс-қимылы арқылы кезең-кезеңімен жүзеге асырылатын болады.
Қаланың көркі – оның тазалығы мен күтіміне тікелей байланысты. Қаланың тазалығы тек коммуналдық қызметтердің ғана емес, барша тұрғындар мен кәсіпкерлердің ортақ жауапкершілігі. Өкінішке қарай, кейбір кәсіпкерлік нысандардың айналасында тазалық талаптарының сақталмайтыны, қоқыстың ретсіз төгілетіні кездеседі. Мұндай заң бұзушылықтарға енді ешқандай жеңілдік болмайды. Қолданыстағы заңнама аясында тиісті әкімшілік шаралар қабылданады. Түркістан – еліміздің рухани әрі туристік орталығы. Сондықтан қаламыздың әрбір көшесі, әрбір қоғамдық кеңістігі тұрғындарға жайлы, ал қала қонақтарына көрікті болуы тиіс. Бұл бағыттағы жұмыстар тұрақты бақылауымда болады”, — дейді шаһар басшысы.
Президент Қасым-Жомарт Тоқаев соңғы жылдары қалалардың тазалығы мен абаттандырылуын коммуналдық мәселе ғана емес, қоғамдық мәдениет пен елдің өркениеттік даму деңгейін айқындайтын маңызды көрсеткіш ретінде бағалап келеді. Мемлекет басшысы «Таза Қазақстан» жалпыұлттық бастамасы аясында: «Тазалық – бір күндік науқан емес, әр азаматтың өмір салтына айналуы керек» деп атап өтіп, көгалдандыру, қоғамдық кеңістіктерді күтіп ұстау және қоршаған ортаға жауапкершілікпен қарау әрбір тұрғынның азаматтық парызы екенін бірнеше рет айтты.
Осы саясат аясында 2026 жылғы 1 шілдеден бастап елді мекендерді абаттандырудың жаңартылған қағидалары күшіне енді. Жаңа талаптарға сәйкес, жеке және заңды тұлғалардың өздеріне тиесілі әрі іргелес аумақтарды күтіп ұстауға қатысты жауапкершілігі нақтыланып, санитарлық талаптарды бұзу, рұқсатсыз қоқыс төгу, жасыл желекке зиян келтіру сияқты құқық бұзушылықтарға бақылау күшейтілді. Бұл өзгерістердің мақсаты – жазалау емес, қоғамда тазалық мәдениетін қалыптастыру және әр азаматтың ортақ кеңістікке деген жауапкершілігін арттыру.
Түркістан үшін бұл талаптардың маңызы ерекше. Соңғы жылдары тарихи шаһарда жаңа әкімшілік-іскерлік орталық, саябақтар, гүлзарлар, қоғамдық кеңістіктер, туристік нысандар мен тұрғын үй кешендері бой көтеріп, қаланың келбеті түбегейлі өзгерді. Осындай ауқымды инвестициялардың ұзақ мерзім бойы тиімді қызмет етуі оларды тұрақты күтіп-баптауға, сапалы күтімге және инженерлік инфрақұрылымды уақтылы қалпына келтіруге тікелей байланысты. Сондықтан абаттандырылған нысандарды талапқа сай қабылдау, жасыл желекті күтіп-ұстау және мердігерлердің жауапкершілігін күшейту – тиімді мемлекеттік басқарудың маңызды құрамдас бөлігі.
Бүгінде Түркістан Қазақстандағы ең қарқынды дамып келе жатқан туристік қалалардың біріне айналды. Жыл сайын тарихи шаһарға миллиондаған турист келеді. Сондықтан қаланың тазалығы, көшелердің күтімі, жасыл аймақтардың жағдайы мен қоғамдық кеңістіктердің сапасы тек тұрғындардың өмір сүру жайлылығына ғана емес, өңірдің туристік тартымдылығы мен инвестициялық беделіне де тікелей әсер етеді. Әлемдік тәжірибе көрсеткендей, заманауи қалалардың бәсекеге қабілеттілігі ең алдымен қауіпсіздігімен, тазалығымен және өмір сүруге қолайлы ортасымен бағаланады.
Осы тұрғыдан алғанда, кәсіпкерлер мен жер пайдаланушылардың өз аумақтарын күтіп ұстауына қойылатын талаптардың күшеюі де — заңдылық. Қоғамдық кеңістіктің тазалығы тек коммуналдық қызметтердің міндеті емес. Ол – бизнес, тұрғындар және жергілікті билік арасындағы ортақ жауапкершіліктің көрсеткіші. Әсіресе тарихи-мәдени мұрасы мол Түркістан сияқты халықаралық туристік орталық үшін бұл қағида ерекше маңызға ие.
Сондықтан қаладағы абаттандыру мен санитарлық тазалықты күшейтуге бағытталған көшпелі бақылаулар – жай ғана коммуналдық тексеріс емес. Бұл Президент Қасым-Жомарт Тоқаевтың «Таза Қазақстан», «Заң және тәртіп» және «Әділетті Қазақстан» бастамаларының жергілікті деңгейде жүйелі іске асырылып жатқанын көрсететін нақты қадам. Өйткені таза әрі күтімді қала – тұрғындардың өмір сапасын арттыратын, туристерге қолайлы орта қалыптастыратын және өңірдің тұрақты әлеуметтік-экономикалық дамуына негіз болатын маңызды фактор. Түркістанның бүгінгі келбеті мен ертеңгі беделі әрбір көшенің тазалығынан, әрбір жасыл желектің күтімінен және әр азаматтың ортақ жауапкершілігінен басталады.
«ANYQ.KZ»-ақпарат.
