Қожа Ахмет Ясауи атындағы Халықаралық қазақ-түрік университетінің ректоры Жанар Амангелдіқызы Темірбекова Тоғызқұмалақтан ІІ Азия Кубогінің жеңімпаздарын қабылдады. Биылғы жылдың 24-30 маусым күндері аралығында Көкшетау қаласында өткен байрақты бәсекеде университетіміздің студенттері мен магистранты сынға түсіп, шеберліктерімен дараланды. Жарыста үш шәкіртіміз жеңіс тұғырына көтеріліп, мерейімізді үстем етті. Атап айтқанда, қыздар арасында студентіміз Фариза Серікбай екінші орын, Лобар Досметова үшінші орынды иеленді. Ерлер арасында магистрант Димрал Сайед Мурсалин екінші орынды еншіледі. Жалпы, классика, блиц және рапид түрлері бойынша өткізілген Азия кубогіне 11 елден 184 спортшы қатысты.
Кездесуде ректор жеңімпаз шәкірттерімізді зор табыстарымен құттықтады. Ауқымды да маңызды жарыста білімгерлеріміздің топ жаруы – университетіміз үшін үлкен мәртебе екендігін атап өтті. Жанар Амангелдіқызы ұлттық ойындарымызды жаңғыртып, дамыту мақсатында университетіміз қабырғасында «Түркі халықтарының зияткерлік ойындары» орталығы ашылғанын тілге тиек етті. Жуырда тұсауы кесілген орталық алдағы кезеңде тұтас Түркі әлемінің ұлттық ойындарын үйрететін ұстаханаға айналатынын жеткізді. Университет басшысы студенттеріміздің шеберлік шыңдауы мен түрлі деңгейдегі жарыстарға қатысуын қамтамасыз етуді үнемі назарда ұстайтынын мәлімдеді. Ректор бұл бағытта қыркүйек айында Ақтөбе қаласында өтетін Әлем чемпионатына студенттерімізді қатыстыруға ықпал жасайтынын жеткізді.
«Түркі халықтарының зияткерлік ойындары» орталығының жетекшісі Қашымхан Боранбайұлы Дәуренқұлов жан-жақты қолдау көрсетіп отырған университет басшылығына алғыс білдірді. Тоғызқұмалақтан ІІ Азия Кубогіне университетіміз атынан сегіз шәкірт қатысқанын және жарыс барысын баяндады. Дүниежүзілік тоғызқұмалақ федерациясының президенті Әлихан Мұхамедияұлы Бәйменовтің ыстық сәлемін жеткізіп, арнайы жолдаған Алғыс хатын табыстады.
Жеңімпаз студенттеріміз кіл жүйрік жарысқан зияткерлік сайыста тәжірибе толыстырғандарын айтып, қолдау көрсеткен басшылыққа алғыстарын жеткізді. Шәкірттеріміз ұлттық ойындар бәсекелері университетіміз қабырғасында ұйымдастырылса деген тілектері мен ұсыныс-пікірлерін ортаға салды.
Жүздесу қорытындысында ректор жеңімпаздарымызға жүлделі орын дипломдарын тапсырып, алдағы бәсекелерде табыс тіледі.
