Шымкент қаласындағы денсаулық сақтау басқармасына қарасты қалалық перзентханада күрделі жөндеу жұмыстары жүргізілуде.
Бұл жұмыстарға жергілікті бюджет есебінен 1,7 млрд теңге қаржы бөлінген. Бүгінге дейін қаржының 50 пайызы игеріліп, тиісті жұмыстар атқарылған. Денсаулық сақтау министрі Елжан Біртанов мегаполиске жасаған сапары аясында құрылыс алаңын да аралап көрді.
Ағымдағы жылы перзентхананың 6 корпусында күрделі жөндеу жұмыстарын жүргізу жоспарланған. Қазіргі уақытта 2 корпустың құрылысы толық аяқталыпты. Бас мердігер компания «Строи.ком Прогресс» ЖШС-гі ғимаратты ағымдағы жылдың қазан айына дейін аяқтап, пайдалануға тапсыруды көздеп отыр.Жөндеу жұмыстарынан кейін ғимараттың материалдық-техникалық жағдайы 100 пайыз жаңартылады. Ана мен балаға сапалы медициналық көмек көрсету мүмкіндігі артады. Босану үйінде жылына орташа есеппен 9 мың босандыру болса, жөндеу жұмыстары аяқталғаннан кейін ол көрсеткіш 10 мыңнан асады деп күтілуде.
Қазіргі таңда жүкті әйелдер қалалық перзентхананың ескі ғимаратында қажетті медициналық көмек алуда. Жөндеу жұмыстары аяқталысымен жаңа бөлімшелерге көшіріледі.
«ANYQ.KZ»-ақпарат.
