Сауран ауданы құрылғалы бері жастар саясатын белсенді түрде жүзеге асырып келеді. Қазіргі таңда ауданда 14-35 жас аралығындағы жастар саны 33 404 адамды құрайды, бұл аудан халқының 32,1%-ын алады. Осы уақыт ішінде аудандық Жастар ресурстық орталығы жастардың әлеуметтік, мәдени және кәсіби дамуына арналған көптеген маңызды шараларды ұйымдастырып, жастарды қолдауға бағытталған жұмыстарды атқарды.
Жастар – еліміздің болашағы, рухани тәуелсіздігіміздің негізі. Ал, жастар саясаты мен азаматтық қоғамды қалыптастыруға өз үлесін қосқан, ғылым, саясат, өнер, спорт және басқа да салаларда жетістіктерге жеткен жастарды қолдау мақсатында «Жыл үздігі-2024» байқауы ұйымдастырылды. Аудан әкімі Мақсат Таңғатаров марапаттау рәсімінде кәсіби және қоғамдық қызметте жоғары жетістіктерге жеткен жастарды және жастар ұйымдарының көшбасшыларын алғыс хаттармен және арнайы сыйлықтармен марапаттады.
“Бүгін біз үшін маңызды әрі ерекше күн. Сауран ауданында өз саласында үздік нәтиже көрсеткен, еңбегімен өзгелерге үлгі болған азаматтарды атап өтіп, оларды марапаттау үшін жиналып отырмыз. Бүгінгі “Жыл үздігі” шарасы — біздің ауданымыздағы әрбір еңбеккердің, әрбір азаматтың жасампаз еңбегінің бағаланатын сәті.
Құрметті марапатқа ие болған азаматтар! Сіздер өз жұмыстарыңызда жоғары жетістіктерге жетіп, ауданымыздың дамуына елеулі үлес қосып келесіздер. Сіздің қажырлы еңбегіңіз бен кәсібилігіңіз – ауданымыздың өркендеуінің кепілі. Біз сіздердің осы табыстарыңызды атап өтіп, алдағы уақытта да үлкен жетістіктерге жетулеріңізге тілектеспіз!”- деді аудан әкімі Мақсат Таңғатаров.
Осы орайда «Жыл үздігі-2024» байқауының жеңімпаздарының атын атап, түсін түстей кетейік:
- «Үздік жас мұғалім» – Табынбаев Олжас Құрбанәліұлы;
- «Үздік жас ЖРО маманы» – Сәрсенбаев Асан Сейдуллаұлы;
- «Үздік жас спортшы» – Тұрсынбай Елдар Жұмамұратұлы;
- «Үздік жас кәсіпкер» – Мавленов Элзод Лазизович;
- «Үздік жас жыл белсендісі» – Жақып Ақбөпе Маратқызы;
- «Үздік жас медицина қызметкері» – Аяғанова Айдана Байдуллақызы;
- «Үздік мемлекеттік қызметкер» – Сайлау Жанболат Бауыржанұлы;
- «Үздік жас отбасы» – Бейсенбиевтер отбасы;
- «Үздік жас полиция қызметкері» – Абдіқадір Рамазан Қойшыбайұлы;
- «Үздік жас ақын» – Бұхарбаев Ердәулет Айнабекұлы;
- «Үздік талантты жас» – Бәйтен Айнұр Дәулетқызы;
- «Үздік жас көшбасшы» – Ермахан Арайлым Саматқызы;
- «Үздік жас студент» – Бахтияров Диербек Улуғбекұлы;
- «Үздік жас мәдениет қызметкері» – Омарқұлов Рахымжан Суанханұлы;
- «Үздік жас шығармашылық ұжым» – «Ташенев домбырашылары» ұжымы, жетекшісі Әбілдахан Ұлжалғас Жұмабекқызы;
- «Үздік жас ерікті» – Нұрынбетов Алмат Балтабайұлы;
- «Үздік жас оқытушы» – Усаров Бехруз Мунирович.
Барша жеңімпаздарды және жетістіктерге жеткен аудан жастарын шын жүректен құттықтап, болашақта да жастарға сенім артып, олардың елдің өркендеуі жолындағы еңбегіне жеміс тілейміз!
Байқау демекші, естеріңізде болса, биыл Сауран ауданының үш жылдық мерейтойына орай, Сауран аудандық Жастар ресурстық орталығының ұйымдастыруымен «Сауран таланттары-2024» өнер байқауы болып өткен-ді. Сайыстың негізі мақсаты жастар саясатын жүзеге асыру, шығармашылық ізденістерін дамыту, сахна мәдениетін қалыптастыру, талантты дарынды жастарға қолдау көрсету болып табылады.
Байқаудың бірінші кезеңі 12 ауылдық округті қамтып, оның ішінде 33 елді мекеннен 60-қа жуық жас іріктеуге қатысты. 2 айға жалғасқан іріктеу кезеңінен 21 жас соңғы кезеңге жолдама алды. Бүгін талантты жастар ақтық сыңға түсті. Шараны Қоғамдық даму басқармасы «Жастар ресурстық орталығы» КММ-нің басшысы Ернар Нұралыұлы және Сауран аудандық мәслихатының депутаты Хуршид Бахтиярұлы ашып берді. Байқауда 2022-2023 жылғы жеңімпаздар және ауданымыздың жас белсенділері келіп өнер көрсетті.
Байқау нәтижесінде бас жүлдені Шохзод Бабаханов иеленді. І орынды Құмабай Жарылқасын алса, ІІ орын Ақтолқын Қалдыбекке бұйырды. Ал, ІІІ орын Шапағат Сапарбай атты аруға табысталды. Номинация бойынша, «АЛТЫН ДАУЫС», «КҮМІС КӨМЕЙ», “ЖАС ӘНШІ”, “ДАРА ДАУЫС” пен “КӨРЕРМЕН КӨЗАЙЫМЫ” сынды номинациялар үздіктерге табысталған болатын.
«ANYQ.KZ»-ақпарат.
