Өңірдегі техникалық және кәсіптік білім беру ұйымдары ұстаздары арасында өткен «Өнерлі ұстаз – 2024» байқауы өз мәресіне жетті.
Байқау ұстаздың тарихи танымын, педагогикалық-психологиялық сауаттылығын, шығармашылық талантын анықтауды көздейді. Тәрбие жүйесінде ұстаздардың жаңа технологиялардың дамуы кезеңінде болашақ ұрпақтың тәрбиесі мен білім алуына ерекше көңіл бөлуі, жаңартылған білімдегі тәжірибесімен өзара бөлісуі, сонымен қатар ұлттық және жалпыадамзаттық тәжірибені іске асырудың феноменальды құралы ретінде ән шығармашылығын өзектендіру, зерделеу және насихаттау арқылы олардың музыкалық-теориялық пәнге деген қызығушылығын арттыру да аталмыш сайыстың түпкі мұрат-мақсаты саналады.
Сонымен, сайыс қорытындысы бойынша бас жүлдені Арыс қаласында орналасқан №17 колледждің ұстазы Әділжан Сұлтанбек жеңіп алды. Қос І орын Түркістан қаласындағы Көпсалалы индустриалды-техникалық колледж ұстазы Ақбота Бектасова мен Төлеби ауданындағы №8 колледж ұстазы Дина Садибековаларға бұйырса, қос ІІ орынды Бәйдібек ауданындағы №19 колледж ұстазы Айжамал Құралбек пен Қазығұрт ауданындағы №11 колледж ұстазы Қырмызы Абиловалар иемденді. Ал ІІІ орынды Кентау қаласындағы №7 колледж ұстазы Дидар Төлбасы қанжығалады.
Жеңімпаздар «Облыстық қосымша білім беруді дамыту орталығы» мекемесі атынан Алғыс хатпен марапатталды.
Айта кетейік, «Өнерлі ұстаз-2024» байқауы мамандандырылған «Дарын» мектеп-интернаттары, мектеп-интернат, арнайы мектеп-интернаттар, балалар үйлері ұстаздары арасында 30 қазан күні, ал аудандық һәм қалалық іріктеуден жеңімпаз атанған жалпы білім беру ұйымдарының ұстаздары арасында 31 қазан күні Түркістан қаласындағы «Ақжайық» музыка мектебінде өткізіледі.
«ANYQ.KZ»-ақпарат.
