Түркістан қаласының әкімі Нұрбол Тұрашбеков тамыз айының әр екінші аптасында аталып өтетін «Құрылысшылар күнімен» сала қызметкерлерін құттықтады.
Бұл туралы Түркістан қаласы әкімінің баспасөз қызметі хабарлайды.
Шаһар басшысы өз сөзінде: «Сіздердей мамандардың арқасында қаламыз күн сайын көркейіп, дамып келеді. Тарихи шаһардың шығыстық үлгідегі кескін-келбеті келуші азаматтарды таңырқатып жатқан болса, қағазға түскен жобаны сапалы түрде жүзеге асыру — Сіздердің еңбектеріңіз. Облыс орталығын жандандырудағы жанашыр істеріңіз берекесін берсін», — дей келе, қалада құрылыс саласында қызмет көрсетіп жүрген мердігер мекемелерге де алғыс білдіріп, сый-сияпат тапсырды.
Жалпы, марапатқа ие болғандар қатарында «Ақжол», «Bazis construction” «Mataibekov architects”, “Феб строй», «Inter Construction”, “Ныш-Ер», «Темир и К», «Тамыз Құрылыс ББК» сынды жалпы 50-ге жуық мердігер мекеме бар.
Айта кету керек, құрылысшылардың кәсіби айшықты мерекесі біздің елде 1998 жылдан бері аталып өтуде. Сәйкесінше, қоғамда құрылысшыларға деген құрмет те жыл өткен сайын артып келеді.
«ANYQ.KZ» — ақпарат
