Шымкент қаласы бойынша Сауда және тұтынушылардың құқықтарын қорғау департаменті 2024 жылдың 9 айында айтарлықтай жұмыс атқарды. Осы кезеңде департамент 3908 өтінішті қарады, оның ішінде 3274 өтініш қанағаттандырылып, жалпы сомасы 198,5 млн теңге тұтынушыларға қайтарылған. Бұл туралы Өңірлік коммуникациялар қызметінде өткен брифингте Шымкент қаласы сауда және тұтынушылардың құқықтарын қорғау Департаменті бастығының орынбасары Оспан Әбиев мәлімдеді.
Сонымен қатар, 381 өтінішке қатысты тұтынушыларға түсіндірмелер беріліп, 116 өтініш басқа органдарға бағытталды. 41 өтініш иелері тарапынан кері қайтарылса, 18 талап-арыз бойынша сотқа жүгінілді, оның 9-ы бойынша оң шешім қабылданып, 3 млн теңгеден астам қаражат өндірілген.
Сондай-ақ, департамент «Тұтынушылардың құқықтарын қорғау туралы» заңның негізінде 10-нан астам азаматтың құқықтары бұзылған екі жағдайды анықтап, олардың құқығын қорғау үшін сотқа жүгінді. Нәтижесінде 280 мың теңге тұтынушыларға қайтарылды.
2024 жылдың қаңтар-қыркүйек айларында Шымкент қаласының Сауда және тұтынушылардың құқықтарын қорғау департаменті тұтынушылардың құқығын қорғау мақсатында көптеген талап-арыздар бойынша сот отырыстарына қатысты. Нәтижесінде бірнеше жағдай бойынша тұтынушылардың құқықтары қалпына келтіріліп, сот оң шешім шығарды, ал жалпы сомасы 2 774 750 теңге тұтынушыларға қайтарылды.
Сот шешімімен қанағаттандырылған негізгі істер:
- «Орынбасар-Сұлтан» ЖШС қызметі бойынша – департамент сотқа тұтынушылар тобының атынан талап-арыз беріп, 115 000 теңге сомасында өтемақы қайтарылды.
- «SC CRAND» ЖШС қызметі бойынша – тұтынушылар тобының арызы бойынша сот шешімімен 165 000 теңге қайтарылды.
- ЖК «Samurug Grup» және С.К. Алтынбекова арасындағы іс – сапасыз аяқ массажы құрылғысы үшін 343 000 теңге қайтарылды.
- «Компания Эврика» ЖШС және В.В. Марков арасындағы іс – жарамсыз теледидар үшін 375 000 теңге өтемақы төленді.
- «Белый Ветер» ЖШС-мен болған дау – сапасыз компьютер үшін 506 750 теңге, моральдық залал үшін 50 000 теңге, және өкілдік шығындар үшін 150 000 теңге қайтарылды және т.б.
Бұл істерде Шымкент қаласының Сауда және тұтынушылар құқықтарын қорғау департаменті белсенді түрде тұтынушылар құқығын қорғап, тұтынушылардың материалдық шығындарын қайтаруға елеулі үлес қосты.
Айта кету керек, Шымкентте тұтынушылардың құқықтық сауаттылығын арттыру бойынша 4000-нан астам ақпараттық жұмыс жүргізілген.
2024 жылдың алғашқы 9 айында Шымкент қаласының Сауда және тұтынушылардың құқықтарын қорғау департаменті құқықтық сауаттылықты арттыру мақсатында 4069 ақпараттық-түсіндіру іс-шараларын өткізді. Оның ішінде БАҚ-та сөз сөйлеулер саны – 161, жарияланымдар саны – 254. Әлеуметтік желілерде де белсенділік жоғары болды: Инстаграмда 1818, Фейсбукта 1817 жазба жарияланып, жалпы саны 3635-ке жетті. Бұдан бөлек, тұрғындар мен кәсіпкерлерге түсіндіру мақсатында 19 брифинг өткізілді.
Сонымен қатар, тұтынушылардың құқықтарын қорғауды жеңілдету үшін «Е-тұтынушы» ақпараттық жүйесі арқылы белсенді жұмыс атқарылды. Осы платформада тіркелген пайдаланушылар саны 5774-ке жетіп, 1206 кәсіпкерлік субъектісі тіркелді. Тұтынушылардың өтініштерін қарастыру мақсатында біріңғай жүйе арқылы 178 өтініш түсіп, тиісті шаралар қолданылды.
Маңызды ескерту: Шымкентте «Тұтынушыларды бақылау» атты бірнеше қоғамдық бірлестік бар екенін ескеріп, оларды департаменттің ресми өкілдерімен шатастырмауларыңызды сұраймыз. Егер осы бірлестіктер тарапынан заңсыз әрекеттер байқалса, 8 7252 53-07-04 және 8 7172 74-98-32 сенім телефондарына хабарласуыңызға болады.
«ANYQ.KZ-ақпарат»
