Шымкент қаласының Әл-Фараби ауданы аумағында 75 көшеге QR-коды бар тақтайшалар ілу жұмыстары жүргізілді. Атап айтқанда, жаңа үлгідегі тақтайшалар Ақжайық, Наурыз, Сәуле, Отырар, Бадам, Забадам, Химфарм, Самал-2, Түркістан шағынаудандары мен аудан орталығында орналасқан көшелерге ілінді.
Бұл жұмыстар «Цифрлық Қазақстан» мемлекеттік бағдарламасы аясында қолға алынып отыр. Былтыр QR-код индексі бар тақтайшалар аудан аумағындағы 672 көп қабатты үйге орнатылған болатын.
Сонымен қатар, аудан аумағында орналасқан атауы жоқ көшелерге уақытша нөмір беру жұмыстары атқарылды.
QR-код мобильді қосымшаны ақпараттық көмек құралы ретінде пайдаланады. Бұл бірегей қосымша орнатылған нысан жайында кеңінен таныстырып, бірнеше функционалдық қызмет түрін көрсетеді.
Сондай-ақ, Шымкент қаласында мәдениет, тілдерді дамыту және архивтер саласын дамыту масатында 2020-2024 жылдарға арналған тұжырымдамасы әзірленді. Онда 2022 жылға дейін қаланың құрамдас бөліктері мен атауы жоқ және қайталанатын көшелерге толығымен жаңа атау беру жоспарланып отыр.
«ANYQ.KZ»-ақпарат
