«Әділетті Қазақстан: заң мен тәртіп, экономикалық өсім, қоғамдық оптимизм». Түркістан облысының әкімі Дархан Сатыбалдының төрағалығымен өткен мәжілісте өңір басшысы Мемлекет басшысы Қасым-Жомарт Тоқаевтың Қазақстан халқына Жолдауының маңыздылығы мен басымдықтарына жан-жақты тоқталып, белгіленген міндеттер мен мақсаттарды жүзеге асыру үшін жауапты орынбасарлары мен басқарма басшыларына нақты тапсырмалар берді. Жолдауда жүктелген міндеттердің орындалуының қатаң қадағалауда болатынын айтты.
Бұл жолғы стратегиялық құжаттың тақырыбы – «Әділетті Қазақстан: заң мен тәртіп, экономикалық өсім, қоғамдық оптимизм». Айқындалған 9 міндеттің әрқайсысы еліміздің бүгіні мен ертеңі үшін аса маңызды.
– Мемлекет басшысы «Әділетті Қазақстан: құқық тәртібі, экономикалық өрлеу, қоғамдық оптимизим» атты Қазақстан халқына Жолдауында негізгі 9 бағытты айқындап берді десек, ондағы міндеттерді жүзеге асыруға бәріміз жұмыла атсалысуға тиіспіз. Президент айқындап берген бағыттар әрбір азаматтың өмір сүру сапасын жақсартуға қызмет етеді. Мемлекет басшысы балаларды құмар ойынға тартқандарға және кәмелетке толмаған балаларға зорлық-зомбылық көрсеткені үшін берілетін жазаның күшейтілгенін ескертті. Сондықтан білім басқармасы, аудан, қала әкімдері және полиция департаментімен бірлесе отырып, балалардың қауіпсіздігін қамтамасыз ету мақсатында нақты шаралар қабылдау қажет, — деді облыс әкімі.
Сонымен қатар облыс әкімі Жолдауда қай бағыттарға басымдық берілгеніне де тоқталды.
– Ақша-несие саясаты мен фискалды саясаттың арасындағы үйлесімсіздікті жою бойынша Жолдаудың бірінші бағытында қазір нақты секторға несие әлі де ойдағыдай берілмей жатқанын атап өтті. Шағын және орта бизнесті жеткілікті қаржыландыру мәселесі де шешілмегенін ескертті. Үкімет пен Ұлттық Банкке, оңтайлы шешімдер қабылдауды тапсырды. Осы бағыттағы жұмыстарды жандандыруымыз керек. Сонымен қатар экономикамыздың көлемін арттыруды және өңіріміздің жалпы ішкі өнімін өсіруді тапсырды. Бюджетті тиімді игеру және бөлу тәртібі, салық саясатының тиімділігін арттыру — біздің басты міндетіміз. Мемлекет басшысы жеке табыс салығының мөлшерлемесін азаматтардың кірісіне қарай дифференциациялау жасауды тапсырды. Осы бағытта салық саласын жітілдіруіміз қажет. Бұл бағытта аудан, қала әкімдері, Мемлекеттік кірістер департаментімен бірлесіп, нәтижелі жұмыс жүргізуді тапсырамын. Салық жүйесін толық цифрландыру қажет. Жолдаудың екінші бағытында Президентіміз инвестициялық ахуалды және бизнес жүргізуге қажетті жағдай жасауды, мемлекеттік-жекеменшік әріптестік арқылы іске асырылатын жобаларды сапалы әзірлеуді тапсырды. Жергілікті әкімдердің инвестор тарту бойынша атқарылып жатқан жұмыстарының төмендігін атап өтті. Аймаққа жеке инвестиция тарту – әкімдердің ең басты міндеті. Әр аудан, қала әкімдері мен облыстық басқарма басшыларына инвестиция тарту бойынша бекітілген іс-шара жоспарының орындалуын қамтамасыз етуді тапсырамын. Инвестиция тартпаған аудан, қала әкімдері, басқарма басшылары бойынша кадрлық шешім қабылданатынын ескертемін, — деді Дархан Сатыбалды.
Сондай-ақ облыс әкімі Мемлекет басшысының агроөнеркәсіп кешенін тікелей субсидиялау тәсілінен арзан несие беру тәсіліне көшуді тапсырғанын атады.
– Осы орайда Мемлекет басшысы мемлекеттен субсидия алу үшін заңсыздық фактілері орын алатынын атап өтті. Басқарма басшысына мемлекеттен бөлінген қаражаттың тиімді жұмсалуын тапсырамын. Субсидия бөлуді ашық түрде заңды құқықтардың бұзылмауын қамтамасыз ету қажет. Сонымен қатар Жолдауда көрсетілгендей, ауыл шаруашылығы дақылдарын өсіруді үйрететін орталық ашу қажет. Еліміздің өнеркәсіп әлеуетін толық пайдалану үшін жан-жақты шаралар қабылдау. Облыста жұмыс істеп тұрған өндірістерді жаңғыртумен қатар, жаңа өндіріс орындарын ашуға баса мән беру керек. Облыстағы пайдалы қазбаларды пайдалану үшін нақты шаралар қабылдауды тапсырамын. Сондай-ақ инфрақұрылымға қатысты өзекті мәселелерді шешіп, құрылыс сапасына жасалатын бақылау жұмыстарын күшейтуді тапсырамын, — деді өңір басшысы.
Айқындалған жаңа міндеттерді түсіндірген басшысы облыс жұртшылығы тарапынан Мемлекет басшысының Жолдауы үлкен қолдауға ие болғанын айтты. Жолдауда айқындалған әр бағыт бойынша жауапты басшылар нақты тапсырмалар алды. Өңірдің кадрлық әлеуетін арттыруды, Ұлт саулығын нығайту үшін кешенді шараларды қолға алуды және бұқаралық спортты дамытуға ерекше мән беруді, тұрғындарға медициналық нысандардың қолжетімділігін қамтамасыз ету үшін жеке инвесторларды тартып, жеке медициналық нысандарды салу жұмыстарын күшейтуді, спорт саласын дамытуды, экологиялық ахуалды жақсартуды, Мемлекеттік басқару ісінің тиімділігін арттыруды, облыс тұрғындарының қауіпсіздігін қамтамасыз ету бағытында жұмыстарды күшейтіп, нақты шаралар қабылдауды тапсырды.
Еске салайық, кеше Қасым-Жомарт Тоқаев Парламент палаталарының бірлескен отырысында «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына арнаған Жолдауын жариялады.
Президент сөзінің басында Парламент өткен сессияда 102 заң қабылданғанын атап өтті. Олардың қатарында қоғамдық бақылауға, адам саудасына қарсы күреске, ғылым және технология саясатына, жылу энергетикасына қатысты және басқа да заңдар бар.
Мемлекет басшысының айтуынша, әлеуметтік салаға, соның ішінде балаларды қорғау ісіне айрықша көңіл бөлінген.Президент халықтың әл-ауқатын жақсартуға септігі тиетін басқа да көптеген шара қолға алынғанына назар аударып, арқаны кеңге салуға болмайтынын, алдымызда әлі талай ауқымды жұмыс тұрғанын айтты.
– Қазақстан халқы қазір мүлде жаңа саяси жағдайда өмір сүруде. Соңғы 5 жылда ауқымды реформалар жасалды. Еліміздің саяси жүйесі түбегейлі өзгерді. Жұрттың сана-сезімінде бетбұрыс болып жатыр. Халықтың құқықтық мәдениеті артып келеді. Азаматтардың бойында жаңа әдеттер, дағдылар қалыптасып, жаңа құндылықтар орнығуда. Саяси және қоғамдық болмысымыз, менталитетіміз және мәдени кодымыз өзгере бастады. Бір сөзбен айтсақ, Әділетті Қазақстан құрылып жатыр. Мұның бәрі, ең алдымен, халықтың қалауымен жасалуда. Сондықтан біз алған бетімізден қайтпаймыз, бағытымыздан таймаймыз, – деді Қасым-Жомарт Тоқаев.
Мемлекет басшысы Қазақстан халқына Жолдауында елімізді әлеуметтік-экономикалық тұрғыдан одан әрі дамытуды, ақша-несие саясаты мен фискалды саясаттың арасындағы үйлесімсіздікті жоюды, инвестициялық ахуалды және бизнес жүргізуге қажетті жағдайды жақсартуды, өнеркәсіп әлеуетін толық пайдалануды, инфрақұрылымға қатысты өзекті мәселелерді шешуді, еліміздің кадрлық әлеуетін біртіндеп арттыруды, ұлт саулығын нығайту үшін кешенді шараларды қолға алып, халықты әлеуметтік қолдау жүйесін жаңғыртуды, экологиялық ахуалды жақсартып, қоршаған ортаны қорғаудың мән-маңызын кеңінен дәріптеуді, мемлекеттік басқару ісінің тиімділігін барынша арттыруды, сондай-ақ қоғамда заң мен тәртіп идеологиясын терең орнықтыруды көздейтін бірқатар бастаманы ортаға салды.Президент тұрақты әлеуметтік-экономикалық өрлеуді қамтамасыз ету, азаматтардың жасампаздық әлеуетін толық ашу және халықтың әл-ауқатын арттыру мемлекеттің маңызды міндеті екенін атап өтті.
– Біз – берекелі бірліктің арқасында түрлі сынақтан сүрінбей өткен халықпыз. Алдағы уақытта да солай болмақ. Бәріміз бір ел болып, әділетті және дамыған Қазақстанды бірге құрайық. Сонда әркім өз елінің кірпіші болып қаланып, арман-мұратына жете алады. Әр адамға және баршаға бірдей мүмкіндік беретін мемлекетті, яғни Әділетті Қазақстанды болашақ ұрпаққа аманат ету – баршамызға ортақ міндет. Мен Мемлекет басшысы ретінде осы міндетті орындауға бар күш-жігерімді саламын. Сіздер де ортақ мақсатқа жету үшін табанды еңбек етесіздер деп сенемін, – деді Қасым-Жомарт Тоқаев.
«ANYQ.KZ»-ақпарат.
