Шымкент: 100 жастағы әжей туған күнінде пневманиядан жазылып шықты. Бұл туралы Шымкент қаласы денсаулық басқармасы баспасөз қызметі мәлім етті.
Қызтай Дүйсебекова жүзінші күзін жұқпалы аурулар ауруханасында дәрігерлермен бірге қарсы алды. Екі ғасырдың куәсі болған қарт кісіні медицина мамандары 100 жасқа толған күнінде ауруханадан шығарып салды.
Қызтай әжей 7 қыркүйек күні Асар шағынауданындағы жұқпалы аурулар орталығына ауыр халде жедел жәрдем көлігімен жеткізілген еді. Дәрігерлер науқасқа өкпенің компьютерлік томографиясын жасап, әжейдің өкпе тінінің 55% зақымдалғаны анықталды. Бұған қоса қарт кісіні асқазанындағы жарасы мазалапты.
Ақ халатты абзал жандар науқасты бөлімшеге жатқызып, вирусқа қарсы терапиялық ем жүргізді. Соның нәтижесінде қарт ана толығымен айығып, дәл туған күнінде ауруханадан үйіне шықты. Дәрігерлерге алғысын білдіріп, ақ батасын берді. “Түскен кезде жағдайы ауыр болатын. Хаттамаға сәйкес ем жүргіздік. Қазір жағдайы бір қалыпты”, — деді емдеуші дәрігері Тіленшина Ләззат.
«ANYQ.KZ»-ақпарат
