Жуырда Келес ауданының Жүзімдік ауылдық округінде орналасқан «Балдырған» ЖШС бөбекжай-балабақшасында «Жазғы сауықтыру кезеңін балаларға тиімді ұйымдастыру» тақырыбында өңірлік семинар болып өтті.
Жазғы сауықтыру кезеңін өткізу барысында бұл семинардың берері мол болды, басқа бақшалардан ерекшелігі сол — балаларды жастайынан еңбекке баулу мақсатында арнайы “Шеберхана” ашылған. Онда тігін машинасы мен тоқыма орталығы жұмыс істеп тұр. Сондай-ақ саз балшықтан құмыра жасау тәсілдерін үйретіп қыздарды қамыр жаю әдістерін үйрететін орталықтар бар.
— Аптаның әр сәрсенбісін ұлттық құндылықтарға арнап тәрбиеленушілерді жан-жақты дамыған, жеке пікірі бар, өмірге бейім тұлға етіп тәрбиелеуде бұл ұжымның үнемі ізденісте екендігінің куәсі болдық. Заман талабына сай білім мен тәрбие беру жолында тың жаңалықтарды ендіріп, өз саласының маманы болған меңгеруші Урниса Қарсыбайқызы мен ұжымның ұсыныстарына қолдау көрсетіп отыратын құрылтайшысының еңбегі ерен екені көрініп тұр, — дейді семинар қатысушылары.
Айта кету керек, семинарда мектепалды даярлық тобымен өткізілген «Жүзден жүйрік» интелектуалды сайыс ойыны, ересек тобымен өткізілген «Ұлттық ойындар» жаңа тәсілдерді топтастырған әрекеттер болып қатысушыларды қатты қызықтырды. Бұдан басқа топтарда өткізілген түрлі спорттық іс-шаралар мектепке дейінгі жастағы бүлдіршіндердің дамуы кезеңдерінде оң нәтиже беретін әрекеттер екендігі көрініп тұрды.
Сонымен қатар “Болашақ” лагерінде де балалардың өз қолымен жасаған еңбектерін кәдеге жарататынын айта кеткенді жөн көріп отырмыз. №1 Оқушылар үйіне қарасты жазғы сауықтыру лагерінде 314 бала демалуда. Қазір демалыстың екінші ауысымы бастау алып, аяқталуына жақын қалды. Демалушылар күніне 5 мезгіл, құрамында дәруменге бай, диеталық тағамдармен тамақтандырылады.
Жазғы маусымның 7 ауысымында 2198 баланы демалыспен қамту жоспарлануда. Олардың жас ерекшеліктеріне қарай, 7-ден 14 жасқа дейін қабылданады. Әр ауысымның ұзақтығы — 10 күн. Жазғы сауықтыру орнына бюджет есебінен аз қамтылған отбасылар, мектепішілік есепке тіркелген балалар, ата-ананың қамқорлығынсыз қалған және патронат балалар, мектеп-интернатында оқитындар қамтылса, ақылы негізде де балалар тыныға алады.
Лагерьде жасөспірімдердің бос уақытын тиімді пайдалану мақсатында танымдық әрекеттері мен интеллектуалдық қабілеттерін дамыту, шығармашылыққа баулу, еңбекқорлық пен достыққа тәрбиелеу мақсатында қажетті жағдай жасалған. Олар футбол, волейбол жəне баскетбол алаңдары, жаттығулар кешені, əткеншектер, кинотеатр, спорттық жəне мəдени шаралар өткізуге арналған жабық зал жəне жабық жүзу бассейні бар. Сонымен қатар, аумағында 4 жатақхана, 314 орындық асхана, фельдшерлік пункт, кір жуатын және жууну бөлмелері қарастырылған.
Оқушылардың демалысын ойдағыдай өткізуге байланысты қызықты, мазмұнды бағдарлама әзірленген. Жоспарлы түрде түрлі спорттық сайыстар, кездесулер мен танымдық ойындар ұйымдастырылады.
Таңертең алаңға жиналған балалар флешмоб түрінде би билеп, жаттығулар жасайды. Мұндай денсаулығына пайдалы таңғы сергітуден кейін, ән-би өнерін көрсетуге, сахналық көріністерді қоюға және спорттық ойындарға кезек беріледі. Атап айтқанда, «Фокустар күні», «Екі жұлдыз» ән байқауы, «Би алаңының жұлдыздары» би жарысы, «Қалпақ» кеші, «Фотоквест ойыны», «Ұлттық ойындар» секілді жарыстар өтеді.
Бөлімге қарасты «Оқушылар үйі» мемлекеттік коммуналдық қазыналық кәсіпорнын басқаратын В.Якупованың сөзінше, тәрбиеленушілердің өз қолымен жасалған көптеген дүниелер лагерьде қолданылады. Солардың ішінде шахмат түрінде тігілген жер төсеніштері мен жастықтары, допты ұстауға арналған қалың қолғаптар және тағы басқалары.
Демалыстың әр күні жастардың қызығушылықтарын артып, көңіл-күйлерін көтеруде. Балалық шақтың бал дәмін әрбір демалушы сезінуде.
Тағы бір атап өтерлігі, биылғы жылы қала сыртындағы лагерьге Арыс қаласы бойынша 2010 баланы жазғы сауықтыру лагеріне жіберу жоспарлануда. Осы мақсатта ағымдағы жылдың 22 маусым күні арыстық балалар Кентау маңындағы «URKER» жазғы сауықтыру лагерінің І кезеңіне жіберілді. Енді 400 оқушы осында демалмақ. Сондай-ақ, олардың жас ерекшеліктеріне қарай 3-10-ші сынып оқушылары, лагерьге қабылданды. Әр аусымның ұзақтығы — 10 күн.
Бұдан бөлек ағымдағы жылы қала сыртындағы лагерьге Қазығұрт ауданы бойынша 2262 бала жазғы сауықтыру лагеріне жоспарлануда. Осы мақсатта ағымдағы жылдың 19 маусым күні Төле би ауданындағы «Изуми-Тау» сауықтыру лагеріне 250 оқушы жіберілді. Балалардың жас ерекшеліктеріне қарай 5-10 сынып оқушылары лагерьге қабылданады. Әр ауысымның ұзақтығы — 10 күн.
Жазғы сауықтыру орнына облыстық бюджет есебінен аз қамтылған отбасылар, мектепішілік есепке тіркелген балалар, ата-ананың қамқорлығынсыз қалған және патронат балалар қамтылады.
«ANYQ.KZ»-ақпарат.
