Тамыздың 24-інде Түркістанда ҚР Ұлттық кітапханасының директоры Бакытжамал Оспановамен «Махаббатым – кітап, мамандығым – кітапханашы» тақырыбында кездесу өтті. Қазақстан кітапханасы одағының төрайымымен кездесуге облыс кітапханашылары қатысты.
Бенефис кеші форматындағы жиын тақырыпқа сай көрме инсталляциясын таныстырумен басталды. Кешті басқарма басшысының орынбасары Ержан Исатаев ашып берді. Кеш кейіпкерінің кітапхана жолында атқарып жатқан еңбегіне тоқталды. Содан соң облыс әкімінің арнайы құттықтау хатын табыстап, сәттілік тіледі.
Кездесу барысында зиялы қауым өкілдерінің және мемлекет қайраткерлерінің кейіпкер жайлы естеліктері, құттықтау сөздері басылған бейне жолдауы көрсетілді. Жиналған кітапханашылардың көкейіндегі қызықты әрі салалық сұрақтарға жауап беріп, өзінің еңбек жолы туралы естеліктерін әңгемелеп берді.
Іс-шарада Бақытжамал Қайырбекқызы түркістандық үздік кітапханашыларға Қазақстандық кітапханалық одақтың «Кітапхана ісінің ардагері», «Қазақстанның құрметті кітапханашысы» және «Кітапхана ісінің үздігі» төсбелгілерін табыстап, өз атынан арнайы алғыс хатпен марапаттады.
Кеш соңында «Фараб» кітапханасының директоры Жанат Шардарбекова қорытынды сөз алып, бүгінгі кештің маңызына тоқталды. Сондай-ақ қонақтар мен қатысушыларға алғысын білдірді.
Айта кетейік, аталған мазмұнды кешті облыстық мәдениет басқармасының қолдауымен «Фараб» әмбебап ғылыми кітапханасы ұйымдастырған.
Бәйдібек ауданындағы кітапханаға 1 мыңнан астам кітап сыйға тартылды
ҚР Ұлттық кітапханасының директоры Бақытжамал Оспанова Бәйдібек ауданына барып, аудандық кітапханашылармен кездесті. Сондай-ақ, ол «Кітапханаға кітап сыйла» акциясы аясында аудандық кітапхана қорына 1500 кітап сыйға тартты.
Тағылымды шараға облыстық «Фараб» әмбебап ғылыми кітапханасының директоры Жанат Шардарбекова, Қазақстан жазушылар одағының мүшесі Бағдат Қалаубай және аудан әкімінің орынбасары Бақыт Қырғызалиев қатысып, акцияның маңыздылығына тоқталды.
Жиын барысында Бақытжамал Оспанова Жүзімдік ауылдық кітапханасының кітапханашысы Фатима Елемесқызын «Кітапхана ісінің үздігі» төсбелгісімен марапаттады.
«ANYQ.KZ»-ақпарат.
