Облыс орталығында жастардың уақытын тиімді пайдалану, орта қалыптастыру және талантты жастарды қолдауға арналған көңілді кеш өтті. Бейресми шара аясында қатысушылар Жастар саябағынан бастау алған экскурсияға қатысып, жаңадан іске қосылған “Red Bus” экскурсиялық автобусымен Түркістан қаласының көрікті және тарихи орындарын тамашалады.
Экскурсиядан кейін жастар Қолөнершілер орталығында өткен мерекелік кеште бас қосты. Бағдарлама барысында қызықты ойындар ұйымдастырылып, белсенділік танытқан қатысушыларға естелік сыйлықтар табысталды.
Кештің көркін “Alem Band” тобының өнер көрсетуі аша түсті. Танымал топ өздерінің әсерлі әндерін орындап, қатысушыларға көтеріңкі көңіл күй мен ерекше атмосфера сыйлады.
Айта кетейік, шараның мақсаты – жастардың бос уақытын тиімді ұйымдастыру, олардың өзара қарым-қатынасын нығайту, белсенді өмір салтын насихаттау, шығармашылық әлеуетін дамыту және қоғамдық белсенділігін арттыру.
Түркістан қалалық Жастар ресурстық орталығы алдағы уақытта да жастардың бос уақытын тиімді ұйымдастыруға бағытталған мәдени-танымдық және ойын-сауық іс-шараларын тұрақты түрде жалғастырады және қала жастарын да қатарына қосылуға шақырады.
Президент Қасым-Жомарт Тоқаев жастардың жан-жақты дамуына қолайлы орта қалыптастыруды мемлекеттік саясаттың негізгі басымдықтарының бірі ретінде айқындап келеді. Мемлекет басшысы «жастардың бос уақыты мазмұнды ұйымдастырылса, қоғамның интеллектуалдық әрі мәдени әлеуеті де артады» екенін бірнеше рет атап өткен. Бүгінде Қазақстан халқының үштен біріне жуығын 35 жасқа дейінгі азаматтар құрайды. Сондықтан олардың шығармашылық қабілетін ашатын, туған өлкенің тарихы мен мәдениетін танытатын әрі қоғамдық белсенділігін арттыратын жобалардың маңызы артып келеді. Түркістандағы мұндай мәдени-танымдық кештер жастардың уақытын тиімді өткізумен ғана шектелмей, олардың туған қалаға деген мақтаныш сезімін күшейтіп, жаңа достық байланыстар орнатуына және қоғамдық бастамаларға белсенді араласуына мүмкіндік береді. Бұл өз кезегінде Мемлекет басшысы көтеріп жүрген «Адал азамат» тұжырымдамасының өміршең құндылықтарын қалыптастыруға, белсенді, білімді әрі отаншыл жас буынды тәрбиелеуге қызмет етеді.
«ANYQ.KZ»-ақпарат.
