Бүгін Сауран ауданының Қарашық ауылдық округіндегі Мәдениет үйінде Халықаралық нашақорлыққа және есірткі бизнесіне қарсы күрес күніне орай, «Өміріңді сақта, болашағыңды қорға» тақырыбында тағылымдық іс-шара ұйымдастырылды.
Іс-шараның негізгі мақсаты — жастар арасында салауатты өмір салтын насихаттау, нашақорлықтың алдын алу, есірткі заттарының адам денсаулығына, отбасы мен қоғамға тигізетін зияны туралы түсіндіру жұмыстарын жүргізу, сондай-ақ өскелең ұрпақтың зиянды әдеттерден аулақ болып, өмірлік дұрыс таңдау жасауына ықпал ету. Аталған шараға Сауран ауданы әкімінің орынбасары Б.Букебаев, облыстық мәслихат депутаты Б.Сүлейменов, аудандық мәслихат депутаты Х.Шарапов, Қарашық ауылдық округінің әкімі С.Оразбаев, зиялы қауым өкілдері, жастар, спортшылар және аудан тұрғындары қатысты.
Жиын барысында сөз сөйлеген аудан әкімінің орынбасары Б.Букебаев жастар тәрбиесі, олардың денсаулығы мен қауіпсіздігін қамтамасыз ету мемлекет пен қоғамның ортақ міндеті екенін атап өтті. Сонымен қатар, жастарды салауатты өмір салтын ұстануға шақырып, есірткінің адам өміріне, болашағына және қоғам дамуына тигізетін зардаптары туралы атап өтті.
Өз кезегінде облыстық мәслихат депутаты Б.Сүлейменов пен аудандық мәслихат депутаты Х.Шарапов нашақорлықтың алдын алу бағытындағы жұмыстарды күшейтудің маңыздылығына тоқталып, жастарды білімге, еңбекке, спорт пен рухани құндылықтарға ұмтылуға шақырды. Сонымен бірге, есірткіге тәуелділіктің жеке адамның ғана емес, тұтас қоғамның қауіпсіздігіне қауіп төндіретін өзекті мәселе екенін жеткізді.
Іс-шара аясында аудандық мәдениет үйінің өнерпаздары арнайы дайындаған нашақорлыққа қарсы тәрбиелік көріністер көпшілік назарына ұсынылды. Көріністер арқылы зиянды әдеттердің адам тағдырына тигізетін кері әсері көркем түрде бейнеленіп, жастарға ой салатын маңызды мәселелер көтерілді.
Іс-шара соңында концерттік бағдарлама ұсынылып, қатысушыларға көтеріңкі көңіл күй сыйлады. Осындай тағылымды кездесулер мен профилактикалық шаралар жастардың бойында жауапкершілік сезімін қалыптастырып, олардың саналы таңдау жасауына, өз өмірі мен болашағына бейжай қарамауына ықпал етеді. Өйткені ұлттың болашағы — дені сау, білімді әрі саналы жастардың қолында.
Президент Қасым-Жомарт Тоқаев есірткінің заңсыз айналымы мен нашақорлықты ұлттық қауіпсіздікке төнген елеулі қатердің бірі ретінде бағалап, бұл бағыттағы жұмысты күшейтуді тұрақты түрде талап етіп келеді. Мемлекет басшысы жастарды есірткіге тартудың жаңа тәсілдері, әсіресе синтетикалық есірткінің таралуы мен интернет арқылы саудалануы қоғам үшін аса қауіпті екенін атап өтіп, алдын алу жұмыстарын құқық қорғау шараларымен ғана шектемей, тәрбие, білім, мәдениет және спорт салаларымен ұштастырудың маңызын айтқан болатын.
Соңғы жылдары елімізде бұл бағыттағы заңнамалық талаптар да күшейтілді. Синтетикалық есірткіні өндіру мен өткізуді ұйымдастырушыларға, есірткі зертханаларын ашуға және есірткі бизнесіне қатысы бар тұлғаларға қатысты жауапкершілік қатаңдатылып, есірткі қылмыстарына қарсы күрестің құқықтық тетіктері жаңартылды. Сонымен қатар құқық қорғау органдары интернет кеңістігіндегі есірткі жарнамасы мен «закладка» жасау фактілерін анықтау жұмыстарын жүйелі түрде жүргізіп келеді.
Алайда мамандардың пікірінше, мәселені тек жазалау арқылы шешу мүмкін емес. Жастардың бос уақытын тиімді ұйымдастыру, спорт пен шығармашылыққа баулу, отбасы институтын нығайту және психологиялық қолжетімді көмекті дамыту – нашақорлықтың алдын алудың ең тиімді жолдарының бірі. Сондықтан Сауран ауданында өткен осындай тағылымды кездесулер қоғамда есірткіге қарсы иммунитет қалыптастыруға, жастардың құқықтық сауатын арттыруға және олардың өмірлік ұстанымын нығайтуға қызмет етеді.
Есірткіге қарсы күрес – бір күндік акция емес, мемлекеттің, ата-ананың, мектептің, құқық қорғау органдары мен бүкіл қоғамның ортақ жауапкершілігі. Өйткені дені сау, білімді әрі саналы жас ұрпақ қана Президент айқындаған Әділетті Қазақстанды құрудың берік тірегі бола алады. Ал әрбір жасалған профилактикалық шара – бір адамның ғана емес, тұтас ұлттың болашағын сақтауға бағытталған маңызды инвестиция.
«ANYQ.KZ»-ақпарат.
