Бүгін Түркістан қаласындағы «Достық үйінде» Ұлттық домбыра күніне орай этнос жастары арасында «Үкілі домбыра» республикалық байқауы өтті.
Байқаудың басты мақсаты – этнос өкілдері арасында қазақ халқының ұлттық өнері мен мәдениетін кеңінен насихаттау, талантты жас домбырашыларды қолдау және ұлттық құндылықтарды дәріптеу.
Өнер додасына еліміздің әр өңірінен келген талантты жастар қатысып, дәстүрлі ән, күй және терме жанрлары бойынша өз өнерлерін ортаға салды. Байқау барысында қатысушылардың орындаушылық шеберлігі мен сахна мәдениеті бағаланып, үздіктер арнайы марапатталды.
Аталған республикалық байқауда Сауран ауданының тумасы Юлдуз Бектемирова жоғары деңгейдегі өнерімен ерекшеленіп, І орын иеленді.
“Бұл – туған өлкеміздің мәдениеті мен өнерінің мерейін үстем еткен айтулы жетістік. Жас өнерпаздың жеңісі – еңбек пен таланттың, ұлттық өнерге деген сүйіспеншіліктің жарқын көрінісі”, — дейді көрермендер.
Юлдуз Бектемированы лайықты жеңісімен шын жүректен құттықтаймыз! Алдағы уақытта да шығармашылық табыс, биік белестер мен жаңа жеңістер тілейміз. Ұлттық өнеріміз ұлықталып, домбыраның қасиетті үні әрдайым халқымыздың рухын асқақтата берсін!
Президент Қасым-Жомарт Тоқаев домбыраны халқымыздың рухани болмысы мен ұлттық бірегейлігінің символы деп бағалап, Ұлттық домбыра күні ұлттың мәдени мұрасын дәріптейтін маңызды мереке екенін атап келеді. Мемлекет басшысы дәстүрлі өнерді дамыту, талантты жастарды қолдау және мәдени мұраны кейінгі ұрпаққа жеткізу – елдің рухани дамуының басты бағыттарының бірі екенін үнемі айтып келеді.
Саурандық жас өнерпаз Юлдуз Бектемированының республикалық байқаудағы жеңісі – жеке жетістік қана емес, өңірдегі өнер мектебінің әлеуетін танытқан маңызды нәтиже. Мұндай табыстар жастардың ұлттық өнерге қызығушылығын арттырып, дәстүрлі күй мен терме өнерінің өміршеңдігін айғақтайды. Өйткені домбыра – өткен мен бүгінді жалғайтын рухани көпір, ұлттың тарихы мен тағылымын ұрпақ санасына сіңіретін баға жетпес мұра. Осындай жеңістер ұлттық мәдениеттің өрісін кеңейтіп, қазақ өнерінің абыройын асқақтата түседі.
«ANYQ.KZ»-ақпарат.
