Кентау қаласында қоғамдық кеңістіктердің тазалығын сақтау, санитарлық мәдениетті қалыптастыру және тұрғындар мен кәсіпкерлердің қоршаған ортаға деген жауапкершілігін арттыру бағытындағы жұмыстар жүйелі түрде жалғасуда. Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» республикалық экологиялық бағдарламасы аясында бұл жолы қаладағы орталық базар аумағында кезекті рейдтік іс-шара ұйымдастырылды.
Қала әкімінің орынбасары Болысбек Шәріпбеков арнайы құрылған жұмыс тобымен бірге орталық базарды аралап, санитарлық тазалықтың сақталуын, сауда орындарының айналасының күтіп ұсталуы мен тұрмыстық қалдықтарды жинау және шығару жұмыстарының ұйымдастырылуын бақылап шықты. Сонымен қатар абаттандыру талаптарының орындалуына да ерекше назар аударылды.
Рейд барысында бірқатар кемшіліктер анықталды. Атап айтқанда, кейбір сауда орындарының іргелес аумақтарында тазалық талаптарының толық сақталмауы, тұрмыстық қалдықтардың ретсіз орналастырылуы және санитарлық нормалардың бұзылу деректері тіркелді. Осыған байланысты кәсіпкерлерге қолданыстағы талаптар түсіндіріліп, әрбір сауда нысаны өзіне тиесілі аумақтың тазалығын тұрақты қамтамасыз етуге міндетті екені ескертілді.
Мұндай түсіндіру жұмыстары жазалау шараларымен ғана шектелмей, қоғамдық жауапкершілік мәдениетін қалыптастыруды көздейді. Қаланың тазалығы мен көркі тек коммуналдық қызметтердің еңбегіне емес, әрбір тұрғын мен кәсіпкердің азаматтық ұстанымына тікелей байланысты. Сондықтан қоғамдық орындарды таза ұстау – заманауи қалалық мәдениеттің маңызды өлшемдерінің бірі.
Таза әрі ұқыпты сауда орындары тұрғындарға қолайлы орта қалыптастырып қана қоймай, қалаға келетін қонақтар мен туристердің алғашқы әсеріне де ықпал етеді. Осы тұрғыдан алғанда санитарлық талаптарды сақтау, абаттандыру мәдениетін нығайту және қоғамдық кеңістіктердің тартымдылығын арттыру – қаланың оң имиджін қалыптастырудағы маңызды бағыттардың бірі.
“Кентау қаласында «Таза Қазақстан» бағдарламасы аясындағы бақылау, түсіндіру және профилактикалық жұмыстар алдағы уақытта да жүйелі түрде жалғасады. Бұл бастамалар қоғамдық мәдениетті нығайтуға, тұрғындардың экологиялық жауапкершілігін арттыруға және жайлы, таза қалалық ортаны қалыптастыруға қызмет етеді”, — деп отыр жергілікті билік өкілдері.
«ANYQ.KZ»-ақпарат.
