Бүгін Шорнақ ауылдық округіне қарасты Аша елді мекенінде «Арақсыз ауыл» жобасы және «Нашақорлыққа жол жоқ» тақырыптары аясында кездесу өтті. Жиынды Сауран ауданының әкімі Мақсат Таңғатаров ашып, жүргізді. Кездесуге аудандық ақсақалдар мен ардагерлер, құқық қорғау органдарының өкілдері, дін қызметкерлері, қоғамдық ұйымдар, ауыл тұрғындары мен кәсіпкерлер қатысты.
Аудан әкімі Мақсат Таңғатаров «Арақсыз ауыл – берекелі ауыл» бастамасы аясында аудан көлемінде атқарылып жатқан жұмыстарға тоқталып, бүгінде Сауран ауданындағы 20 елді мекеннің тұрғындары алкогольдік ішімдіктерден бас тарту жөнінде ортақ шешім қабылдағанын мәлімдеді. Аудан басшысы бұл бастаманың негізгі мақсаты ішімдікке тәуелділіктің алдын алу, отбасылық құндылықтарды нығайту, жастарды зиянды әдеттерден қорғау, тұрғындар арасында салауатты өмір салтын қалыптастыру және қоғамдық тәртіпті сақтау екенін атап өтті.
Сондай-ақ бұл бағыттағы жұмыстар Мемлекет басшысы айқындаған «Заң мен тәртіп» қағидатымен сабақтасып, қоғамдағы жауапкершілікті арттыруға бағытталғаны айтылды.
Сауран ауданы құрылғаннан бері бес ауыл аталған бастаманы қолдап, алкогольдік ішімдіктерден бас тартқан болатын. Соңғы кезеңде аудан көлеміндегі қоғамдық ұйымдар мен ақсақалдардың бастамасымен жүргізілген жұмыстар нәтижесінде жобаға қосылған елді мекендердің қатары артты.
Бүгінгі таңда Үлгілі, Шыпан, Шекербұлақ, Нұртас, Серт, Құмтүйін, Абай, Ескі Сауран, Қаражон, Егізқара, Игілік, Ойық, Мәшһүр Жүсіп, Шойтөбе, С.Қожанов, Жалаңтөс, Бершінтөбе, Қосқорған, Қосмезгіл және Аша ауылдары алкогольдік ішімдіктерден бас тарту туралы шешім қабылдаған. Аталған шешімдер жергілікті қоғамдастық пен ауыл ақсақалдарының қатысуымен өткізілген жиындардың хаттамалары негізінде қабылданған. Жиындарға тұрғындармен бірге сауда нысандарының иелері де қатысып, алкоголь өнімдерін сатудан бас тарту мәселесі бойынша ортақ келісімге келген.
Кездесу барысында алкогольдік ішімдіктер мен есірткі заттарының таралуының алдын алу, жастар тәрбиесі, отбасылық жауапкершілікті арттыру, қоғамдық тәртіпті сақтау және құқық бұзушылықтардың алдын алу мәселелері де кеңінен талқыланды. Жиында аудандық ақсақалдар алқасының төрағасы Жарылқасын Балтабай Ермекбайұлы, аудан прокурорының орынбасары Ержан Ахметов және аудандық полиция бөлімі бастығының орынбасары Данияр Түймебаев сөз сөйлеп, күн тәртібіндегі мәселелер бойынша пікірлерін білдірді.
С. Қожанов ауылы «Арақсыз ауыл» бастамасын қолдады
Бұдан бөлек Үшқайық ауылдық округіне қарасты С. Қожанов ауылында да тұрғындар мен ауыл ақсақалдарының бастамасымен «Арақсыз ауыл» жобасы аясында жиын өтті. Іс-шараға Сауран ауданы әкімінің орынбасары Серік Садибаев, Сауран ауданының бас имамы Е. Полатов, Үшқайық ауылдық округінің әкімі Болат Сенбеков, тиісті сала мамандары, кәсіпкерлер, ұстаздар, ауыл ақсақалдары мен тұрғындар қатысты.
Жиын барысында салауатты өмір салтын қалыптастыру, алкогольдік ішімдіктердің зиянын түсіндіру, құқықбұзушылықтардың алдын алу, қоғамдық тәртіпті сақтау және жастарды зиянды әдеттерден қорғау мәселелері талқыланды.
Сондай-ақ ауданның бас имамы Е.Полатов ішімдіктің адам денсаулығына, отбасы тәрбиесіне және қоғамға тигізетін кері әсері жөнінде айтып, тұрғындарды салауатты өмір салтын ұстануға шақырды.
Жиында ауыл ақсақалдары, тұрғындар мен кәсіпкерлер аталған бастамаға қолдау білдіріп, елді мекенде алкогольдік ішімдіктерден бас тартуға бағытталған жұмыстарды бірлесіп жүргізуге ниетті екендерін жеткізді. Кездесу қорытындысында тұрғындардың ортақ қолдауымен С. Қожанов ауылы «Арақсыз ауыл» бастамасына қосылды.
«ANYQ.KZ»-ақпарат.
