Шымкент қаласының Тұран елді мекеніндегі №122 «Ақ көгершін» бөбекжай-балабақшасы – алпыс жылдан астам тарихы бар тәрбие мен тағылым ордасы. Бүгінде мұнда 345 бүлдіршінге арналған 16 топ жұмыс істейді. Ұзақ жылдар бойы талай ұрпаққа тәлім берген балабақша қазір жаңарған келбетпен жаңа кезеңге қадам басып отыр.
Мектепке дейінгі ұйым үшін маңызды жаңалықтың бірі – ғимараттың күрделі жөндеуден өтуі. Бірнеше ондаған жыл пайдаланылған нысан толық жаңартылып, оның материалдық-техникалық жағдайы жақсартылды. Жөндеу жұмыстары нәтижесінде балалардың қауіпсіздігі мен жайлылығына қойылатын талаптарға сай қолайлы орта қалыптасты.
Балабақша аумағы да абаттандырылып, бүлдіршіндердің бос уақытын тиімді өткізуіне мүмкіндік беретін ойын және спорт алаңдары қажетті құралдармен жабдықталды. Мұнда балалардың жан-жақты дамуына жағдай жасауға бағытталған музыка, психолог, логопед, медицина және әдістемелік кабинеттері жұмыс істейді.
Балабақша меңгерушісі Жұмагүл Шегебайқызының айтуынша, күрделі жөндеу жұмыстары ұжым үшін ғана емес, тәрбиеленушілер үшін де маңызды өзгеріс болған.
«Жаңарған орта – бала үшін өте маңызды. Балабақшаның күрделі жөндеуден өтуі ұжымымызға үлкен қуаныш сыйлады. Ендігі мақсатымыз – жасалған жағдайды тиімді пайдаланып, әр бүлдіршінге сапалы тәрбие мен білім беруге бар күшімізді жұмсау», – дейді балабақша меңгерушісі.
Мектепке дейінгі кезең – баланың тұлғалық қалыптасуы мен алғашқы дағдылары орнығатын маңызды уақыт. Сондықтан бүлдіршіндерге жайлы әрі қауіпсіз орта қалыптастырудың мәні зор. Жаңарған ғимарат пен жабдықталған алаңдар осы мақсатқа қызмет етеді.
Алпыс жылдан астам тарихы бар «Ақ көгершін» балабақшасының жаңаруы – мекеме өміріндегі жаңа кезеңнің бастауы. Бастысы, жасалған өзгерістердің барлығы балалардың қауіпсіздігіне, жайлылығына және олардың сапалы тәрбие алуына бағытталған.
«ANYQ.KZ»-ақпарат.
