Шардара: Шаруалар жанармайдан таршылық көрмейді

admin — 07.08.2021 582 комментария

Аудандық ауыл шаруашылығы бөлімінің ұйымдастыруымен, ауыл шаруашылығы тауар өндірушілерді қолдау мақсатында күзгі дала жұмыстарын жүргізуге бөлінген дизель отынмен қамтамасыз ету бойынша тасымалдау, жеткізіп беру, жанар-жағармай (дизель отыны) қорының көлемі және оның бағасын нақтылау жөнінде Достық, Ақшеңгелді, Сүткент, Алатау батыр ауыл округтерінде шаруалармен кездесулер өткізілді.

Кездесуге аудандық ауыл шаруашылығы бөлімінің басшысы Т.Әлімқұл, жанар-жағармай тасымалдаушы оператор «Майсс» ЖШС-ның директоры Т.Алисат, аталған ауылдардың әкімдері Р.Ануарбек, С.Бейсенов, О.Айдосов, Қ.Қарабаевтар, кооператив, шаруа қожалық төрағалары, ауыл округтеріндегі жанар-жағар май бекетінің иелері қатысты.

Аудандық ауыл шаруашылығы бөлімінің басшысы Т.Әлімқұл аталған ауылдарда жиындарды жүргізе отырып, өз сөзінде Түркістан облысы әкімінің бірінші орынбасары А.Жетпісбаевтің бекіткен кестесіне сәйкес, Шардара ауданына 2021 жылы аудандағы күзгі дала жұмыстарын жүргізуге бөлінген жанар-жағар майды (дизель отыны) агроқұрылымдардың уақтылы алу, бағасын 1 литрін 172,0 теңгеден сатылу керектігін, сол үшін өздеріңізбен келісім жасау жөнінде оператордың өзі арнайы келіп отырғандығындығын жеткізді.

Өз кезегінде жанар-жағармай тасымалдаушы оператор «Майсс» ЖШС-ның директоры Т.Алисат қажетті жанар-жағармайды уақтылы жеткізуді тиісті деңгейде ұйымдастыруды қолға алатындығын, калькуляцияға сәйкес, бекітілген бағада әр литрін 172,0 теңгеден жергілікті жанар-жағар май бекеттері иелерінің шығынын қоса есептегенде ауданға тасымалдап беретінін, шаруаларға барынша қолдау білдіретінін, шілде айына бөлінген жанар-жағармайды осы айдың 10 тамызына тасымалдап алу керектігін жеткізді. Кездесуде әртүрлі ұсыныстар айтылып, бір шешімге келіп, аталған 4 ауыл округіндегі агроқұрылымдар өкілдері бұл мәселеге қосылатындықтарын жеткізді.

Аудандық ауыл шаруашылығы бөлімінің басшысы Т.Әлімқұл Үкімет тарапынан күзгі дала жұмыстарын жүргізуге бөлінген 4030,0 тонна жанар-жағар май (дизель отыны) жөнінде халыққа кеңінен хабарлауды осы тұрғыда ауыл әкімдігімен бірлесіп тиісті жұмыстарды атқару, қадағалау керектігі жөнінде атап өтіп, мәжілісті қорытындылады.

«ANYQ.KZ» — ақпарат