Түркістан облысының әкімі Нұралхан Көшеровтің төрағалығымен облыс әкімдігі жанындағы Құқық бұзушылық профилактикасы жөніндегі ведомствоаралық комиссияның кезекті отырысы өтті. Жиында екі мәселе қаралды. Атап айтқанда, Ұрлықтарға қарсы іс-қимылдың 2024-2026 жылдарға арналған бағдарламасын іске асыру аясында мүліктік қылмыстардың, оның ішінде пәтер, автокөлік, мал, қалта және ұялы телефон ұрлығының алдын алу жұмыстары сараланды. Сонымен қатар заңсыз ойын бизнесіне, онлайн-казинолар мен қаржылық пирамидалардың қызметіне қарсы күрес және олардың алдын алу шаралары талқыланды.
Облыс әкімі Нұралхан Көшеров жауапты мемлекеттік органдарға нақты міндеттер жүктеді.
– Өңірімізде қылмыстың алдын алу мақсатында аудан, қала әкімдіктері құқық қорғау органдарымен бірлесіп нақты іс-шараларды жүйелі түрде жүзеге асыруы тиіс. Ұрлық жиі тіркелетін аудан-қалаларда бірлескен рейдтік шараларды күшейтіп, ұрлықтың алдын алу жұмыстарын жандандыру қажет. Сонымен қатар қаржылық пирамидалардың алдын алу, қаржылық алаяқтық пен лудоманияға қарсы күресті күшейтіп, экономикалық қылмыстардың деңгейін төмендетуге бағытталған нақты шаралар қабылдансын. Заңсыз ойын алаңдары бойынша аудан, қалаларда жан-жақты талдау жүргізіліп, алдын алу жұмыстары күшейтілуі керек. Барлық берілген тапсырмалар белгіленген мерзімде сапалы орындалып, атқарылған жұмыстардың нәтижесі туралы облыс әкімі аппаратына ақпарат ұсынылсын, – деді Нұралхан Көшеров.
Алғашқы мәселелер бойынша Түркістан облысы полиция департаменті бастығының орынбасары Бауыржан Жанаев баяндама жасады. Мәжілісте өңірдегі жалпы қылмыс деңгейінің төмендегені айтылды. Сондай-ақ ұялы телефон мен мал ұрлығының арту себептері талданып, Қазығұрт, Ордабасы, Сарыағаш, Сауран, Созақ, Келес және Төлеби аудандарындағы ахуал қаралды.
Облыс әкімі аталған мәселелер бойынша аудан және қала әкімдіктері мен құқық қорғау органдарының бірлескен жұмысының тиімділігін арттыру қажеттігін айтып, жауапты басшылардың пікірлерін тыңдалды.
Күн тәртібіндегі екінші мәселе бойынша Түркістан облысы бойынша Экономикалық тергеп-тексеру департаменті бірінші жедел басқармасының бастығы Диас Тобатаев баяндама жасап, заңсыз ойын бизнесі, онлайн-казинолар, қаржылық пирамидаларға қарсы жүргізіліп жатқан жұмыстар туралы ақпарат берді. Мәжілісте тұрғындар арасында қаржылық сауаттылықты арттыру, лудоманияның алдын алу, сондай-ақ құмар ойындарға тәуелді азаматтарға қатысты талдау жүргізу мәселелері қозғалып, нақты міндеттер жүктелді. Бұл бағыттағы жұмыстар жалғасады.
Құқық бұзушылықтың алдын алу – бүгінгі мемлекеттік саясаттың басым бағыттарының бірі. Мемлекет басшысы Қасым-Жомарт Тоқаев құқықтық мемлекет құрудың басты шарты – қылмыспен күресу ғана емес, оның алдын алу екенін үнемі айтып келеді. Президент жариялаған «Заң мен Тәртіп» қағидаты бүгінде құқық қорғау жүйесінің негізгі идеологиялық тұғырына айналып, азаматтардың қауіпсіздігін қамтамасыз ету, қоғамдық тәртіпті нығайту және құқықтық мәдениетті қалыптастыру бағытындағы жұмыстарға жаңа серпін берді. Әсіресе интернет-алаяқтық, қаржылық пирамидалар, лудомания, мал ұрлығы және өзге де мүліктік қылмыстарға қарсы күрес мемлекет назарындағы маңызды мәселелердің бірі болып отыр.
Президент тапсырмасына сәйкес Үкімет құқық қорғау органдарының материалдық-техникалық базасын нығайтып, қылмыстың алдын алу жүйесін цифрландыруға, бейнебақылау желілерін кеңейтуге, жасанды интеллект негізіндегі талдау құралдарын енгізуге және құқық бұзушылық профилактикасын күшейтуге бағытталған кешенді реформаларды жүзеге асыруда. Сонымен қатар қаржылық алаяқтық пен заңсыз ойын бизнесіне қарсы заңнамалық талаптар күшейтіліп, азаматтардың қаржылық сауаттылығын арттыруға бағытталған республикалық ақпараттық-түсіндіру жұмыстары тұрақты жүргізілуде. Лудоманияға қарсы қабылданған заңнамалық өзгерістер де қоғамдағы әлеуметтік қатерлерді азайтуға бағытталған маңызды қадамдардың бірі болды.
Түркістан облысында да қоғамдық қауіпсіздікті қамтамасыз ету және құқық бұзушылықтың алдын алу мәселелері тұрақты бақылауда. Облыс әкімдігі, полиция департаменті, Экономикалық тергеп-тексеру департаменті және өзге де мемлекеттік органдардың өзара үйлесімді жұмысының нәтижесінде өңірде жалпы қылмыс деңгейінің төмендеу үрдісі байқалады. Сонымен бірге жекелеген қылмыс түрлері бойынша тәуекелдер сақталғандықтан, профилактикалық жұмыстарды күшейту, цифрлық бақылау жүйелерін жетілдіру және тұрғындармен түсіндіру жұмыстарын жандандыру басты міндет ретінде белгіленіп отыр.
Комиссия отырысында Созақ ауданы бойынша ахуалдың арнайы қаралуы да осы талаптардың жергілікті жерде орындалуына ерекше мән берілетінін көрсетеді. Мал ұрлығының алдын алу, қаржылық пирамидалар мен онлайн-казинолардың заңсыз қызметіне тосқауыл қою, тұрғындардың қаржылық сауаттылығын арттыру және құқық қорғау органдары мен жергілікті атқарушы органдардың өзара іс-қимылын күшейту – аудан үшін де өзекті бағыттардың бірі. Соңғы уақытта Созақ ауданында жастар арасында құқықтық мәдениетті қалыптастыру, қаржылық алаяқтық пен лудоманияның алдын алу, жол қауіпсіздігін күшейту және қоғамдық тәртіпті қамтамасыз етуге бағытталған іс-шаралардың жүйелі өткізіліп келе жатқаны бұл жұмыстың нақты нәтижеге бағытталғанын көрсетеді.
Қазіргі жағдайда құқық бұзушылықпен күрестің ең тиімді жолы – оның салдарымен емес, себептерімен жұмыс істеу. Сондықтан халықтың құқықтық және қаржылық сауаттылығын арттыру, жастарды салауатты өмір салтына баулу, цифрлық қауіпсіздік мәдениетін қалыптастыру және мемлекеттік органдардың үйлесімді әрекеті қоғамдағы қауіпсіздікті қамтамасыз етудің негізгі кепілі болып қала береді. Осы тұрғыдан алғанда, Түркістан облысы әкімдігі жанындағы ведомствоаралық комиссияның кезекті отырысында қабылданған шешімдер мен берілген нақты тапсырмалар Президент айқындаған «Заң мен Тәртіп» қағидатын өңірлерде тиімді жүзеге асыруға, құқық бұзушылық деңгейін төмендетуге және тұрғындардың қауіпсіздігін нығайтуға бағытталған маңызды қадамдардың бірі болып саналады.
«ANYQ.KZ»-ақпарат.
