“Заң мен тәртіп” қағидаты аясында Шымкент қаласында Молда Мұса атындағы №5 жалпы орта білім беретін мектепте ерекше сыныптың салтанатты ашылу рәсімі өтті.
Бүгін тоғызыншы сынып оқушылары кадеттер қатарына қабылданды, олар «Жас сақшы» деп аталатын жас полицейлер сыныбының оқушылары болды. Мұндай сыныпты құрудың мақсаты балалардың әскери-патриоттық тәрбиесі мен кәсіби бағдарын нығайту, сондай-ақ болашақ мамандықты таңдауға көмектесу болды.
Іс-шараға Шымкент қаласы Полиция департаменті бастығының орынбасары, полиция полковнигі Мәулен Ахметов, оқушылардың ата-аналары мен мектеп ұжымы қатысты.
Кадеттер үшін полицейлердің үлгісі бойынша нысанды киім әзірленіп, тігілгенін атап өткен жөн. Сынып бөлмесі арнайы стендтермен және жабдықтармен жабдықталған. «Балалар болашақта құқықтық тәртіпті сақтауда елдің лайықты азаматтары болатынына сенімдіміз, өйткені олар — қазірдің өзінде дұрыс жолда», — дейді ұстаздары.
Ал Шымкент қаласындағы М.Х.Дулати атындағы үш тілде оқытатын №8 мамандандырылған гимназиясында оқушыларға профилактикалық түсіндірме жұмыстары, яғни балалардың қауіпсіздігін, денсаулығын, құқықтық сауаттылығын арттыруға, сондай-ақ теріс қылықтардың алдын алуға бағытталған шаралар жиынтығы жүргізілді. Мұндай жұмыстарды мектеп әкімшілігі, мұғалімдер, полиция инспекторлары, дәрігерлер мен психологтар бірге жүргізеді.
Негізгі бағыттары:
- Құқықтық түсіндіру жұмыстары
- Балалардың құқықтары мен міндеттерін түсіндіру;
- Әкімшілік және қылмыстық жауапкершілік туралы айту;
- Заңды бұзудың салдарына мысалдар келтіру.
- Қауіпсіздік ережелері
- Жол қозғалысы ережелері («Абайлаңыз, балалар!» акциясы);
- Өрт қауіпсіздігі, электр құралдарын дұрыс пайдалану;
- Су айдындарында және көшеде өзін ұстау ережелері.
- Денсаулық пен салауатты өмір салты
- Темекі, ішімдік, есірткі сияқты зиянды заттардың зияны туралы әңгіме;
- Дұрыс тамақтану, спортпен шұғылдану, жеке бас гигиенасы;
- Инфекциялық аурулардың алдын алу.
- Киберқауіпсіздік және интернет мәдениеті
- Әлеуметтік желілердегі алаяқтық түрлері;
- Жеке мәліметті қорғау;
- Интернеттегі буллингтің (қорқыту, мазақ ету) алдын алу.
- Психологиялық қолдау
- Қиын жағдайда кімге жүгіну керектігін түсіндіру;
- Қақтығыстарды бейбіт шешу жолдары;
- Өзін-өзі бағалау мен достық қарым-қатынасты нығайту.
«ANYQ.KZ»-ақпарат.
