«Bala Protect» жобасын іске асыру аясында Абай ауданының прокуратурасы буллингтің алдын алу мақсатында профилактикалық іс-шара өткізді. Бұл туралы Шымкент қаласының прокуратурасы хабарлады.
Іс-шара арнайы дайындалған бейнероликпен басталды. Бейнероликте құқық бұзушылықтың салдары мен адамның өмірге деген көзқарасының өзгеруі туралы сұхбаттар көрсетілді. Іс-шараға буллинг фактілері бойынша есепте тұрған кәмелетке толмағандар мен олардың ата-аналары қатысты.
Кездесу барысында жасөспірімдер арасындағы құқық бұзушылықтардың алдын алу, буллинг пен кибербуллингтің зияны, сондай-ақ заңнамада көзделген жауапкершілік мәселелері түсіндірілді. Прокуратура өкілдері балаларға өзара сыйластық пен адам құқықтарын құрметтеудің маңыздылығын атап өтіп, ата-аналарға бала тәрбиесіндегі жауапкершілік пен бақылауды күшейту қажеттігін жеткізді.
Айта кету керек, балалардың қауіпсіздігін қамтамасыз ету және олардың құқықтарын қорғау мемлекеттік саясаттың басым бағыттарының бірі болып табылады. Мемлекет басшысы Қасым-Жомарт Тоқаев балаларға қатысты кез келген зорлық-зомбылыққа, әлімжеттік пен қорлауға қоғамда мүлдем төзбеушілік қағидаты қалыптасуы тиіс екенін бірнеше рет атап өткен болатын. Президенттің тапсырмасына сәйкес соңғы жылдары кәмелетке толмағандардың құқықтарын қорғау тетіктері күшейтіліп, білім беру ұйымдарында психологиялық қолдау қызметтерінің жұмысы жетілдірілуде.
Оқу-ағарту министрлігінің мәліметінше, бүгінде еліміздегі барлық мектептерде буллингтің алдын алуға бағытталған профилактикалық бағдарламалар кезең-кезеңімен енгізілуде. Сонымен қатар балалардың құқықтарын қорғау жөніндегі өңірлік уәкілдер институты мен арнайы байланыс арналарының жұмысы күшейтілді. Бұл шаралар жасөспірімдердің қауіпсіздігін қамтамасыз етуге және құқық бұзушылықтардың алдын алуға бағытталған.
Осы тұрғыдан алғанда, «Bala Protect» жобасы аясында ұйымдастырылған мұндай кездесулер жасөспірімдердің құқықтық сауаттылығын арттырып қана қоймай, олардың бойында жауапкершілік, өзара құрмет және заңға бағыну мәдениетін қалыптастыруға ықпал етеді. Баланың қауіпсіз әрі қолайлы ортада тәрбиеленуі – қоғамның ортақ міндеті. Сондықтан мемлекеттік органдардың, ата-аналардың, педагогтердің және қоғамның бірлескен жұмысы ғана буллингтің алдын алып, өскелең ұрпақтың жарқын болашағын қамтамасыз ете алады.
«ANYQ.KZ»-ақпарат.
