Жүйнек ауылдық округінде тұрғындардың құқықтық сауаттылығын арттыру және интернет-алаяқтық қылмыстарының алдын алу мақсатында халық арасында кең көлемде түсіндіру жұмыстары жүргізілуде.
Іс-шара барысында тұрғындарға интернет арқылы жасалатын алаяқтықтың түрлері, күмәнді сілтемелер мен жалған хабарламалардың қауіптілігі, банк карталарының деректерін бөгде адамдарға бермеу, әлеуметтік желілер мен мессенджерлердегі қауіпсіздік шараларын сақтау жөнінде ақпараттар берілді.
Сонымен қатар, азаматтарға белгісіз нөмірлерден түскен қоңырауларға сақтықпен қарау, онлайн несие рәсімдеу кезінде жеке мәліметтерді қорғау және алаяқтық әрекеттерге тап болған жағдайда дереу құқық қорғау органдарына хабарласу қажеттігі түсіндірілді.
“Мұндай профилактикалық жұмыстар алдағы уақытта да тұрақты түрде жалғасын табатын болады. Тұрғындарды қырағылық танытып, өздерінің жеке және қаржылық деректерінің қауіпсіздігін сақтауға шақырамыз”, — дейді жауаптылар.
Бұдан бөлек маусымның 12-сінде Сауран ауданында жастардың құқықтық сауаттылығын арттыру және интернет-алаяқтықтың алдын алу мақсатында “дөңгелек үстел” ұйымдастырылған-ды. Іс-шара барысында қазіргі таңда белең алып тұрған интернет-алаяқтықтың түрлері, алаяқтардың қолданатын айла-тәсілдері және олардан қорғану жолдары жан-жақты түсіндірілді. Қатысушылармен пікір алмасу жүргізіліп, өзекті сұрақтарға жауап берілді. Кездесу соңында жастарға ақпараттық жадынамалар таратылып, жеке деректерді қорғауға, күмәнді сілтемелерге өтпеуге және қаржылық қауіпсіздік ережелерін сақтауға шақырылды.
Иә, сақтық – алаяқтықтың алдын алудың ең тиімді жолы!
Президент Қасым-Жомарт Тоқаев цифрландыру дәуірінде интернет-алаяқтықтың ұлттық деңгейдегі өзекті қатерлердің біріне айналғанын бірнеше рет атап өтіп, құқық қорғау органдарына азаматтарды киберқылмыстан қорғау тетіктерін күшейтуді тапсырды. Мемлекет басшысы технологиялық даму халықтың өмірін жеңілдетумен қатар жаңа қауіптерді де көбейткенін айтып, мұндай қылмыстарға қарсы күресте құқықтық бақылаумен қатар азаматтардың цифрлық және қаржылық сауаттылығын арттырудың шешуші маңызға ие екенін ерекше айтты.
Соңғы жылдары елімізде интернет және телефон арқылы жасалатын алаяқтық қылмыстары құқық қорғау органдарының басты назарындағы бағыттардың біріне айналды. Ішкі істер министрлігі мен басқа да мемлекеттік органдардың мәліметінше, мұндай қылмыстардың басым бөлігі өзін банк қызметкері, құқық қорғау органы немесе мемлекеттік мекеме өкілі ретінде таныстыратын алаяқтардың әрекетімен байланысты. Сондай-ақ жалған инвестициялық жобалар, мессенджерлердегі фишингтік сілтемелер, әлеуметтік желілердегі жалған хабарландырулар мен онлайн несие рәсімдеуге қатысты алаяқтық тәсілдері де жиілеп отыр. Осыған байланысты елімізде киберқылмысқа қарсы арнайы бөлімшелердің жұмысы күшейтіліп, банктермен және байланыс операторларымен өзара іс-қимыл тетіктері жетілдірілуде.
Дегенмен сарапшылар кибералаяқтықпен күрестегі ең тиімді қорғаныс – азаматтың өзінің қырағылығы екенін айтады. Бір ғана ойланбай басылған сілтеме, бейтаныс адамға берілген SMS-код немесе банк картасының деректері бірнеше минуттың ішінде қаржылық шығынға әкелуі мүмкін. Сондықтан халықтың, әсіресе жастар мен егде жастағы азаматтардың цифрлық сауаттылығын арттыру – қауіпсіз қоғам қалыптастырудың маңызды шарты.
Сауран ауданында ұйымдастырылып жатқан түсіндіру кездесулері мен ақпараттық акциялар дәл осы мақсатқа қызмет етеді. Мұндай профилактикалық жұмыстар тұрғындардың интернет кеңістігіндегі қауіп-қатерлерді ерте танып, алаяқтардың айласына алданбауына, жеке және қаржылық деректерін қорғау мәдениетін қалыптастыруға ықпал етеді. Бұл – қылмыс орын алғаннан кейін әрекет етуден гөрі, оның алдын алуға бағытталған тиімді тәсіл.
Президент Қасым-Жомарт Тоқаев айқындаған «Заң және Тәртіп» қағидаты бүгінде тек қоғамдық орындардағы құқықтық тәртіппен ғана өлшенбейді. Ол цифрлық кеңістіктегі қауіпсіздікті қамтамасыз етуді де қамтиды. Сондықтан интернет-алаяқтыққа қарсы күрес мемлекеттік органдардың ғана емес, әрбір азаматтың жауапкершілігіне айналуға тиіс. Қырағылық, құқықтық сауаттылық және цифрлық мәдениет ұштасқанда ғана қоғам киберқылмыстың жаңа қатерлеріне төтеп беріп, қауіпсіз әрі сенімді ақпараттық орта қалыптастыра алады.
«ANYQ.KZ»-ақпарат.
