Аудандық орталық кітапханада Қазақстан полициясы күніне арналған салтанатты жиын өтті. Іс-шара аясында құқық қорғау саласының ардагерлері мен қызметкерлері бас қосып, «Созақ сақшылары» атты жаңа кітаптың тұсаукесер рәсімі ұйымдастырылды.
Мерекелік жиын Қазақстан Республикасының Мемлекеттік Әнұранымен басталды. Жиында аудан әкімінің орынбасары Серік Маманов құттықтау сөз сөйлеп, бірқатар сала қызметкерлеріне аудан әкімінің Алғыс хатын табыстады. Сонымен қатар аудандық мәслихат төрағасының, аудан прокурорының Алғыс хаттарымен полиция қызметкерлері марапатталды.
Созақ аудандық полиция бөлімінің бастығы, полиция полковнигі Нұрлан Мұратов ізгі тілегін арнап, Түркістан облысы Полиция департаментінің бастығы, полиция генерал-майоры Арыстанғани Заппаровтың бұйрығымен бірнеше қызметкерге кезекті арнаулы атақтар табыстады.
Еліміздің тыныштығы мен қоғамдық тәртіпті сақтауда абыройлы қызмет атқарып жүрген полиция қызметкерлерін тәрбиелеп өсірген ата-аналар да назардан тыс қалмай, арнайы марапаттарға ие болды. Сондай-ақ Созақ аудандық полиция бөлімі бастығының Алғыс хаттарымен бірқатар қызметкерлер марапатталды.
Мерекелік жиында Қазақстан Республикасы Ұлттық қауіпсіздік комитетінің Түркістан облысы бойынша департаментінің Созақ аудандық бөлімінің бастығы Дәулет Тастанов, аудандық ардагерлер кеңесінің төрағасы Қабылбек Еспенбетов құттықтау лебіздерін білдірді. Ұлттық ұлан ардагерлер ұйымының Алғыс хаттарымен де сала үздіктері марапатталды.
Шара аясында ақын, жазушы, халықаралық «Алтын қалам» сыйлығының иегері Мақсат Жеңісұлының «Созақ сақшылары» атты жаңа кітабының тұсаукесер рәсімі өтіп, көпшілік назарына ұсынылды.
Салтанатты жиын концерттік бағдарламамен жалғасып, полиция қызметкерлеріне арналған патриоттық әндер орындалды.
Осы ретте Созақ ауданының әкімі Мұхит Тұрысбеков те “Фейсбук” әлеуметтік желісі арқылы ізгі тілегін жеткізгенін айта өтейік.
“Құрметті полиция қызметкерлері! Ардақты сала ардагерлері!
Сіздерді кәсіби мерекелеріңіз – 23 маусым Қазақстан Республикасы Полициясы күнімен шын жүректен құттықтаймын!
Қоғамдық тәртіп пен азаматтардың қауіпсіздігін қамтамасыз ету жолында аянбай еңбек етіп жүрген сіздердің қызметтеріңіз – ел тыныштығы мен тұрақтылығының берік кепілі. Заң мен тәртіпті сақтау, құқық бұзушылықтың алдын алу, халықтың қауіпсіздігі мен тыныштығын қамтамасыз ету – үлкен жауапкершілік пен жоғары кәсібилікті талап ететін абыройлы міндет.
Сіздердің адал қызметтеріңіз бен антқа беріктіктеріңіздің арқасында қоғамда заң үстемдігі нығайып, азаматтардың мемлекетке деген сенімі арта түсуде. Тәулікпен санаспай, ел тыныштығы жолында қызмет етіп жүрген барша полиция қызметкерлерінің еңбегі қашанда құрметке лайық.
Осы айтулы мереке күні баршаңызға зор денсаулық, отбасыларыңызға амандық, қызметтеріңізге табыс, ел игілігі жолындағы жауапты міндеттеріңізге толағай жетістіктер тілеймін. Еліміздің тыныштығы мен қауіпсіздігі жолындағы қызметтеріңіз әрдайым жемісті болсын!”, — деді ол өз құттықтауында.
Бұл мерекелік жиынның тағылымдық мәні – полиция қызметкерлерінің еңбегін ұлықтаумен ғана шектелмейді. Ол қоғамдағы заң үстемдігін нығайтуға, құқық қорғау қызметінің беделін арттыруға және жас буынның бойында отансүйгіштік пен жауапкершілік құндылықтарын қалыптастыруға бағытталған маңызды қадам. Мемлекет басшысы Қасым-Жомарт Тоқаев құқық қорғау жүйесін жаңғырту мәселесіне айрықша назар аударып, полиция халыққа жақын, кәсіби әрі сервистік модель бойынша жұмыс істеуі тиіс екенін үнемі атап келеді. Президенттің бастамасымен елімізде «Заң мен Тәртіп» қағидаты мемлекеттік саясаттың негізгі басымдықтарының біріне айналып, құқық қорғау органдарының материалдық-техникалық базасын нығайту, цифрландыру, қызметкерлердің әлеуметтік қорғалуын арттыру және азаматтардың қауіпсіздігін қамтамасыз ету бағытындағы реформалар жүйелі жүзеге асырылуда.
Бүгінде Үкімет құқық қорғау жүйесінің тиімділігін арттыруға, қоғамдық қауіпсіздікті күшейтуге және құқық бұзушылықтың алдын алуға бағытталған кешенді шараларды іске асырып келеді. Заманауи бейнебақылау жүйелері, интеллектуалды талдау құралдары, цифрлық сервистер, учаскелік полиция институтын күшейту, интернет-алаяқтыққа, есірткі қылмысына және тұрмыстық зорлық-зомбылыққа қарсы пәрменді жұмыстар құқық қорғау органдары қызметінің жаңа сапалық деңгейге көтерілгенін көрсетеді. Бұл реформалардың түпкі мақсаты – әрбір азамат өзін қауіпсіз сезінетін, заң үстемдігі орныққан әділетті қоғам қалыптастыру.
Түркістан облысында да қоғамдық қауіпсіздікті қамтамасыз ету, қылмыстың алдын алу және құқықтық мәдениетті қалыптастыру бағытындағы жұмыстар тұрақты түрде жүргізіліп келеді. Облыс көлемінде полиция мен жергілікті атқарушы органдардың өзара іс-қимылы күшейіп, профилактикалық жобалар, жастармен кездесулер, құқықтық түсіндіру акциялары мен қауіпсіздікке бағытталған кешенді бағдарламалар жүйелі ұйымдастырылуда. Бұл жұмыстар өңірдегі қоғамдық тұрақтылықты сақтауға және халықтың құқық қорғау органдарына деген сенімін нығайтуға оң ықпал етуде.
Осындай игі бастамалардың қатарында «Созақ сақшылары» кітабының жарық көруі ерекше маңызға ие. Бұл еңбек – аудан полициясының қалыптасу тарихын, қызметтік жолын, ел тыныштығы жолында еңбек еткен азаматтардың өнегелі өмірін кейінгі ұрпаққа жеткізетін рухани шежіре. Мұндай кітаптар құқық қорғау қызметінің шынайы болмысын танытып қана қоймай, жастардың бойында Отанға адал қызмет ету, антқа беріктік пен азаматтық жауапкершілік сияқты асыл қасиеттерді дәріптейді.
Қоғамдық тыныштық пен қауіпсіздік – ел дамуының ең басты кепілі. Сондықтан Созақ ауданында полиция қызметкерлеріне көрсетілген құрмет пен олардың еңбегін насихаттауға бағытталған мұндай тағылымды іс-шаралар құқық қорғау саласының абыройын арттырып қана қоймай, Президент айқындаған «Әділетті Қазақстан» және «Заң мен Тәртіп» қағидаттарының өңірлерде нақты жүзеге асып жатқанын айқын аңғартады. Ел тыныштығын күзеткен сақшылардың жанқияр еңбегі әрдайым құрметке лайық, ал олардың кәсібилігі мен адалдығы мемлекет тұрақтылығының, азаматтардың қауіпсіздігі мен қоғамның берекелі дамуының берік тірегі болып қала береді.
«ANYQ.KZ»-ақпарат.
