Қоғамдағы тұрақтылық пен тұрғындардың қауіпсіздігін қамтамасыз ету ең алдымен заң талаптарының мүлтіксіз сақталуына байланысты. Осы бағытта Сауран ауданында құқық бұзушылықтардың алдын алу, қоғамдық тәртіпті нығайту және жер қатынастары мен құрылыс саласындағы заңдылықты қамтамасыз етуге бағытталған жұмыстар жүйелі түрде жүргізілуде.
Аталған мәселелер аудан әкімдігі жанындағы құқық бұзушылықтардың алдын алу жөніндегі мәжілісте және заңсыз құрылыс пен жер пайдалану мәселелері бойынша кәсіпкерлермен өткен кездесуде кеңінен талқыланды. Жиындарға аудан әкімі Мақсат Таңғатаров, аудан прокуроры Алмаз Асылбеков, полиция бөлімінің басшылары, жауапты бөлім жетекшілері, ауылдық округ әкімдері және кәсіпкерлік нысандарының өкілдері қатысты.
Құқық бұзушылықтардың алдын алу жөніндегі мәжілісте аудандағы қоғамдық қауіпсіздіктің жай-күйі сараланып, профилактикалық шаралардың тиімділігін арттыру жолдары қаралды. Қоғамдық тәртіпті сақтау, құқық бұзушылыққа ықпал ететін себептер мен жағдайларды анықтау, олардың алдын алу, тұрғындар арасында түсіндіру жұмыстарын күшейту мәселелеріне басымдық берілді.
Жасөспірімдер арасындағы құқық бұзушылықтың алдын алу да назардан тыс қалған жоқ. Бұл бағыттағы жұмыстың нәтижелі болуы тек құқық қорғау органдарының емес, білім беру ұйымдары, ата-аналар, жергілікті атқарушы органдар мен жалпы қоғамның бірлескен әрекетіне байланысты. Сондықтан профилактикалық жұмысты формалды шаралармен шектемей, нақты себептерге бағыттау қажеттігі айтылды.
Мәжілісте жауапты сала басшылары атқарылған жұмыстар жөнінде есеп беріп, құқық бұзушылықтың туындауына әсер ететін факторларды жою бойынша ұсыныстарын ортаға салды. Аудан әкімі қоғамдық қауіпсіздікті қамтамасыз етудегі ведомствоаралық байланысты күшейтіп, профилактикалық жұмыстарды тұрақты жүргізудің маңызын атап өтті.
Заңдылықты қамтамасыз етудің тағы бір маңызды бағыты – жерді тиімді әрі заң талаптарына сай пайдалану және құрылыс саласындағы тәртіпті сақтау. Осы мәселеге байланысты аудан аумағындағы заңсыз құрылыс нысандары мен жер учаскелерін тиісті құжаттарсыз немесе нысаналы мақсатына сай пайдалануға қатысты кәсіпкерлермен арнайы кездесу өткізілді.
Кездесуде жер учаскелерін белгіленген нысаналы мақсаты бойынша пайдалану, тиісті рұқсат құжаттарынсыз құрылыс жұмыстарын жүргізуге жол бермеу, мемлекеттік жерлерді өз бетінше иелену фактілерінің алдын алу мәселелері қаралды.
Аудан әкімі кәсіпкерлік қызметтің заң талаптарына толық сәйкес жүргізілуі қажеттігін атап өтті. Кәсіпкерлерге анықталған заң бұзушылықтарды белгіленген тәртіппен жою, қажетті құжаттарды уақытылы рәсімдеу және жер мен құрылысқа қатысты талаптарды қатаң сақтау жөнінде түсіндірме берілді. Сонымен қатар кәсіпкерлердің ұсыныс-пікірлері тыңдалып, жауапты мамандар тарапынан нақты түсіндіру жұмыстары жүргізілді.
Бұл ретте заңсыз құрылыс пен жерді рұқсатсыз пайдалану мәселесі тек жеке нысанның немесе кәсіпкердің мәселесі ретінде қаралмайды. Мұндай әрекеттер елді мекендердің жоспарлы дамуына, инфрақұрылымның дұрыс орналасуына және жер ресурстарының тиімді пайдаланылуына кері әсер етуі мүмкін. Сондықтан оның алдын алу – жергілікті атқарушы органдардың тұрақты бақылауындағы бағыттардың бірі.
Жиындар қорытындысында жауапты бөлімдер мен ауылдық округ әкімдеріне құқық бұзушылықтардың алдын алу жұмыстарын күшейту, заңсыз құрылыс пен жерді заңсыз пайдалану фактілеріне тұрақты мониторинг жүргізу, анықталған кемшіліктерді заң аясында ретке келтіру тапсырылды.
Заң талаптарын сақтау – қоғамдық тәртіпті қамтамасыз етудің ғана емес, ауданның орнықты дамуының да негізі. Осы тұрғыдан алғанда, Сауранда профилактикалық жұмыстарды күшейту, тұрғындармен ашық түсіндіру жүргізу және заң бұзушылыққа жол бермейтін орта қалыптастыруға бағытталған шаралардың маңызы зор.
«ANYQ.KZ»-ақпарат.
