Кентау көпсалалы колледжінде ақын, ұстаз, композитор, бірқатар тағылымды кітаптардың авторы Әкім Ысқақпен «Тұтқасы жоқ есік» атты әдеби-танымдық кездесу ұйымдастырылды. Рухани жүздесуге колледж студенттері мен оқытушылары қатысып, қаламгердің шығармашылығымен жақынырақ танысуға, өмірлік тәжірибесі мен ой-толғамдарын тыңдауға мүмкіндік алды.
Әдеби кештің негізгі мақсаты – жастардың кітап оқуға деген қызығушылығын арттыру, көркем әдебиеттің тәрбиелік мәнін түсіндіру, ақын шығармалары арқылы адамгершілік құндылықтарды дәріптеу және ұрпақтар арасындағы рухани байланысты нығайту. Осындай кездесулер жас буынның әдебиетке ықыласын оятып қана қоймай, өмірге деген көзқарасын қалыптастыруға, жақсы мен жаманды ажыратып, әрбір ісіне жауапкершілікпен қарауға бағыт береді.
Кеш барысында Әкім Ысқақ студенттермен еркін сұхбат құрып, олардың көкейінде жүрген сауалдарға жауап берді. Жастар ақынның шығармашылық жолы, ұстаздық қызметі, өмірлік ұстанымы мен кітап жазудағы ізденістері туралы сұрақтарын қойып, өз ойларын ортаға салды. Қаламгер әр сауалға байыппен жауап беріп, өмірден түйген тәжірибесі мен тағылымды оқиғаларын әңгімеледі. Сонымен қатар өлең шумақтарын оқып, сөз өнерінің адам жанына әсері, әдебиеттің қоғамдағы орны мен жас ұрпақ тәрбиесіндегі маңызы жөнінде ой бөлісті.
Кездесудің ең әсерлі сәттерінің бірі – ақынның мектеп бітіргеніне қырық жыл болған сыныптас досының арнайы ауылдан келуі еді. Арада ондаған жыл өтсе де, бала күннен басталған достықтың үзілмегенін аңғартқан бұл жүздесу кешке ерекше жылылық сыйлады. Сыныптас досын көрген сәтте Әкім Ысқақтың қуанышы жүзінен байқалып, бір сәтке жастық шағына, балалық шақтың естеліктеріне қайта оралғандай әсер қалдырды. Кездесу барысында достықтың қадірі, уақыт сынынан өткен адамдық қарым-қатынастың маңызы айқын сезілді. Бұл тосынсый кеш қонақтары мен қатысушыларына да ерекше әсер етіп, рухани жүздесудің мазмұнын тереңдете түсті.
Әдеби кездесуде ақынның шығармашылығымен қатар, адам өміріндегі ізгілік, сыйластық, адалдық пен достық секілді асыл қасиеттердің орны да көрініс тапты. Әкім Ысқақтың өмірлік әңгімелері мен өлеңдері жастарды айналасына құрметпен қарауға, үлкенді сыйлап, кішіні қадірлеуге, алға қойған мақсатына табандылықпен ұмтылуға үндеді. Студенттер үшін бұл жүздесу белгілі бір қаламгердің шығармашылығын танып-білумен ғана шектелмей, өмірлік құндылықтар туралы ойлануға мүмкіндік берген мазмұнды басқосу болды.
Кездесу соңында Әкім Ысқақ студенттерге өзінің авторлық кітаптарын сыйға тартып, әрқайсысына қолтаңбасын қалдырды. Сондай-ақ жастарға ақ батасын беріп, ізгі тілегін жеткізді. Кітап сыйлау сәті кештің мәнін одан әрі аша түсті. Өйткені кітап – адамды білім мен ізденіске жетелейтін, ой-өрісін кеңейтетін, рухани дүниесін байытатын құнды қазына. Ал автордың өз қолтаңбасымен табыстаған еңбегі — жас оқырман үшін ерекше естелік әрі кітаппен жақынырақ танысуға берілген мүмкіндік.
«Тұтқасы жоқ есік» атты әдеби-танымдық кездесу мазмұнды әңгімесімен, жүрекке жеткен жырларымен және әсерлі сәттерімен есте қалды. Бұл кеш әдебиет пен адамгершілікті ұлықтап, достықтың қадірін танытқан, аға буынның өмірлік тәжірибесін жас ұрпаққа жеткізген тағылымды жүздесу болды.
Осындай шығармашылық кездесулердің ұйымдастырылуы Кентау қаласындағы мәдени-рухани ортаның дамуына, әдеби мұраны насихаттауға және жастардың кітап оқу мәдениетін қалыптастыруға ықпал етеді. Әсіресе, қаламгерлермен тікелей жүздесіп, олардың ой-пікірін тыңдау жас оқырманның әдебиетке деген қызығушылығын арттырып, сөз өнеріне құрметін қалыптастырады. Кітаппен қауышқан ұрпақтың рухы биік, танымы терең, болашағы жарқын болмақ.
«ANYQ.KZ»-ақпарат.
