Шомылу маусымына байланысты Сауран ауданы аумағындағы өзен-көлдер, су айдындары және жеке меншік бассейндерде тұрғындардың қауіпсіздігін қамтамасыз ету мақсатында рейдтік-түсіндіру жұмыстары жүргізілді.
Іс-шара барысында жауапты мекеме өкілдері тұрғындарға судағы қауіпсіздік талаптарын түсіндіріп, рұқсат етілмеген орындарда шомылудың қауіптілігі жөнінде ескертті. Сондай-ақ ата-аналарға балаларды қараусыз қалдырмау, жасөспірімдердің су айдындарына ересектердің бақылауынсыз баруына жол бермеу қажеттігі айтылды.
Рейд кезінде жеке меншік бассейн иелеріне де қауіпсіздік талаптарын сақтау, құтқару құралдарының болуы, келушілерге қауіпсіздік ережелерін түсіндіру және санитарлық талаптарды қатаң сақтау жөнінде түсіндіру жұмыстары жүргізілді.
Мамандар тұрғындарды арнайы белгіленген және рұқсат етілген орындарда ғана шомылуға шақырып, қауіпсіздік талаптарын сақтамау адам өмірі мен денсаулығына үлкен қауіп төндіретінін ескертті.
Мемлекет басшысы Қасым-Жомарт Тоқаев азаматтардың өмірі мен денсаулығын қорғау – мемлекеттің басты міндеттерінің бірі екенін үнемі атап келеді. Осыған сәйкес, елімізде шомылу маусымы кезінде су айдындарындағы қауіпсіздікке бақылау күшейтіліп, профилактикалық рейдтер мен түсіндіру жұмыстары үздіксіз жүргізілуде. Түркістан облысында да бұл бағыттағы жұмыстар жүйелі жалғасып, Төтенше жағдайлар департаменті, полиция және жергілікті атқарушы органдардың қатысуымен өзен-көлдер мен су қоймаларында тұрақты рейдтер ұйымдастырылуда.
Республика көлемінде де жазғы маусымда қауіпсіздік шаралары күшейтіліп, өңірлерде рұқсат етілген жағажайлар мен демалыс орындары тұрақты бақылауға алынып, халыққа кең көлемде түсіндіру жұмыстары жүргізілуде. Құтқарушылардың тәжірибесі көрсеткендей, судағы қайғылы оқиғалардың басым бөлігі қауіпсіздік талаптарын сақтамаудан, балаларды қараусыз қалдырудан және тыйым салынған орындарда шомылудан орын алады. Сондықтан Сауран ауданында ұйымдастырылып жатқан рейдтік іс-шаралар мен профилактикалық жұмыстардың басты мақсаты – әкімшілік жаза қолдану ғана емес, ең алдымен адам өмірін сақтап қалу. Себебі қарапайым қауіпсіздік қағидаларын сақтау – әр азаматтың өз өмірі мен жақындарының амандығына деген жауапкершілігінің айқын көрінісі.
«ANYQ.KZ»-ақпарат.
