Сауран ауданындағы «Малшылар ауылы» шағын шаруашылықтарды ірі өндіріс жүйесіне біріктіреді

Loading

Түркістан облысында мал шаруашылығының өндірістік әлеуетін арттыруға, шағын шаруа қожалықтарын қолдауға және ет өнімдерін өндіру көлемін ұлғайтуға бағытталған ауқымды жобалар жүзеге асырылуда. Солардың ішіндегі ерекше бастамалардың бірі – Сауран ауданына қарасты Ескі Иқан ауылдық округінде салынып жатқан «Малшылар ауылы» заманауи кешені. Қазақстанда баламасы жоқ бұл жоба мал өсірумен айналысатын шағын шаруашылықтарды бір орталыққа біріктіріп, өнім өндіру, бордақылау, сою, өңдеу және өткізу үдерістерін өзара сабақтастыра ұйымдастыруды көздейді. Бастама облыс әкімі Нұралхан Көшеровтің тапсырмасымен қолға алынған.

Жобаның негізгі мақсаты – жеке шаруалардың өндірістік мүмкіндіктерін кеңейтіп, олардың нарыққа шығу жолындағы мәселелерін ортақ инфрақұрылым арқылы шешуге жағдай жасау. Көп жағдайда шағын шаруашылықтар малды өсіргенімен, оны қажетті деңгейде бордақылау, ветеринариялық талаптарға сай сою, сақтау және өткізу үшін тиісті базаға мұқтаж. «Малшылар ауылы» осы жұмыстарды бір кешенге шоғырландырып, шаруалардың өзара кооперациялануына және өндіріс тізбегінің тиімділігін арттыруға бағытталған.

Жоба үшін жалпы аумағы 40 гектар жер бөлінген. Кешен 25 мың басқа дейін мал бордақылауға есептелген. Мұнда 74 шаруа қожалығына 50 соттықтан жер телімі берілген. Қазіргі уақытта 39 қораның құрылысы жүргізілуде. Бұл әр шаруашылықтың мал өсіру және бордақылау жұмысын жеке ұйымдастыра отырып, ортақ өндірістік инфрақұрылымды пайдалануына мүмкіндік береді. Жоба толық іске қосылған кезде жылына 25 мың бас мал бордақыланып, 5 мың тонна ет өндіру жоспарланып отыр. Мұндай өндірістік қуат ауданның ғана емес, өңірдің де ет шаруашылығын дамытуға серпін беретін маңызды көрсеткіш болмақ.

Кешеннің басты ерекшелігі – мал шаруашылығының негізгі кезеңдерін қамтамасыз ететін инфрақұрылымның бір жерде шоғырлануы. Мұнда сағатына 120 басқа дейін қызмет көрсетуге қауқарлы орталықтандырылған мал сою желісі қарастырылған. Сонымен қатар сыйымдылығы 1000 текше метр тоңазытқыш қоймасы мен ветеринариялық-санитариялық зертхана болады. Бұл нысандар малды белгіленген талаптарға сай союға, ет өнімдерінің сапасы мен қауіпсіздігін бақылауға және дайын өнімді тиісті температуралық жағдайда сақтауға мүмкіндік береді. Кешенде ветеринар дәрігер мен бухгалтерлік қызмет те жұмыс істейді. Ал келушілерге арналған қонақ үйдің қарастырылуы шаруашылық жұмысына қатысты мамандар мен серіктестерді қабылдауға қолайлы жағдай қалыптастырмақ.

Өндірістік тиімділікті арттыруда қалдықсыз немесе қалдығы барынша аз өндіріс қағидаты да ескерілген. Сойылған малдың қаны, сүйегі мен ішкі ағзалары арнайы цехта қайта өңделіп, балық шаруашылығына арналған құнарлы жем әзірленеді. Дайын өнім балық өсіру кешендеріне өткізіледі. Осылайша, негізгі өндірістен шығатын қосалқы шикізат та кәдеге жарап, қосымша өнім өндіруге жол ашылады. Бұл тәсіл ресурстарды ұтымды пайдалануға, өндірістік қалдық көлемін азайтуға және мал шаруашылығы мен балық өсіру салалары арасындағы өзара байланысты дамытуға мүмкіндік береді.

«Малшылар ауылы» жобасында әлеуметтік инфрақұрылымға да айрықша мән берілген. Кешен аумағында малшыларға арнап жалпы ауданы 4 мың шаршы метр болатын 74 типтік тұрғын үй салу көзделген. Бұл шаруашылық иелері мен мал өсірушілердің өндіріс орнына жақын тұруына, еңбек үдерісін тұрақты ұйымдастыруына жағдай жасайды. Бұдан бөлек, кешенде еңбек ететін азаматтардың отбасылық қажеттіліктері де назардан тыс қалмаған. Атап айтқанда, малшылардың балаларын мектепке тасымалдау ұйымдастырылады. Мұндай шешім ауылдық жерде тұрақты еңбек етуге қолайлы орта қалыптастыруға бағытталған.

Жалпы, Ескі Иқандағы «Малшылар ауылы» – тек мал бордақылау нысаны емес, шағын шаруашылықтарды ортақ өндірістік жүйеге біріктіретін кешенді жоба. Оның іске асуы шаруалардың өнім өндіруден бастап, дайын етті нарыққа жеткізуге дейінгі мүмкіндіктерін кеңейтіп, ауылдағы кәсіпкерліктің дамуына ықпал етуі тиіс. Сонымен бірге жаңа жұмыс орындарын құру, мал шаруашылығындағы кооперацияны нығайту және ауыл тұрғындарының әлеуметтік жағдайын жақсарту міндеттері де осы бастаманың маңызды бөлігі саналады.

Жоба толық қуатына шыққан жағдайда жылына 5 мың тонна ет өндіру жоспарланып отыр. Бұл ішкі нарықты отандық өніммен қамтамасыз етуге, ет өндірісінің тұрақтылығын нығайтуға және экспорттық әлеуетті арттыруға мүмкіндік беретін көрсеткіш. Осы тұрғыдан алғанда, Сауран ауданында қолға алынған «Малшылар ауылы» өңірдің агроөнеркәсіптік әлеуетін көтеріп, ауыл шаруашылығын жаңа өндірістік деңгейге шығаруға бағытталған маңызды бастама болмақ.

«ANYQ.KZ»-ақпарат.

Ad Widget

Recommended For You