Шымкент қаласындағы Оңтүстік тұрғын алабын сапалы ауыз сумен қамтамасыз ету мақсатында су құбырының құрылыс жобасы іске асырылуда.
Қазіргі таңда нысанда құрылыс-монтаж жасалып, барлық жұмыс бекітілген өндірістік-күнтізбелік жоспарға сәйкес орындалуда. Жоба аясында ауыз су құбырларын төсеу, құбыр желілерін тарту және үйлерді орталық ауыз су жүйесіне қосу жұмысы жүзеге асырылуда. Нәтижесінде жалпы 956 үйді орталық ауыз су жүйесіне қосу көзделген. Жоба іске асырылғанда Оңтүстік тұрғын алабының тұрғындары сапалы әрі үздіксіз орталықтандырылған ауыз сумен қамтамасыз етіліп, аумақтың инженерлік-коммуналдық инфрақұрылымы жақсартылады, халыққа көрсетілетін коммуналды қызметтердің сапасы артады.
Жалпы, Шымкентте халықты инженерлік инфрақұрылыммен толық қамту бағытындағы жұмыстар кезең-кезеңімен жалғасып келеді. Қалада жаңа тұрғын алаптарының аумағы кеңейген сайын ауыз су, электр, табиғи газ және жол инфрақұрылымын дамытуға басымдық берілуде. Бұл жұмыстар тұрғындардың өмір сүру сапасын арттырумен қатар, елді мекендердің тұрақты дамуына негіз қалайды. Мемлекет басшысы халықты сапалы ауыз сумен қамтамасыз ету стратегиялық міндеттердің бірі екенін бірнеше рет атап өткен болатын. Осыған сәйкес елімізде сумен жабдықтау жүйелерін жаңғыртуға, тозған инженерлік желілерді ауыстыруға және жаңа су құбырларын салуға бағытталған ауқымды жобалар жүйелі жүзеге асырылып келеді. Оңтүстік тұрғын алабындағы жоба да осы міндеттердің нақты көрінісі. Нысан толық пайдалануға берілгеннен кейін жүздеген отбасының орталықтандырылған ауыз суға қолжетімділігі артып, тұрғындардың тұрмыс сапасы жақсарады әрі ауданның әлеуметтік-экономикалық дамуына оң серпін береді.
«ANYQ.KZ»-ақпарат.
