Шымкент қаласында құқықтық тәртіпті нығайту және сыбайлас жемқорлыққа қарсы мәдениетті қалыптастыру бағытындағы жұмыстар жүйелі түрде жалғасып келеді. Осы орайда қала полиция департаментінде ұйымдастырылған тағылымдық әрі тәжірибелік кездесуде құқық қорғау саласындағы адалдық қағидаттарын нығайту, жас қызметкерлердің кәсіби жауапкершілігін арттыру және заңдылықты сақтау мәселелері кеңінен талқыланды.
«Ұрпақтар сабақтастығы: Сыбайлас жемқорлыққа қарсы іс-қимыл – әрбір буын міндеті» тақырыбында өткен жиынға ішкі істер органдарының ардагерлері, ҚР Ұлттық қауіпсіздік комитетінің Шымкент қаласы бойынша департаменті, Мемлекеттік қызмет істері агенттігінің Шымкент қаласы бойынша департаменті, ҚР ІІМ Б.Момышұлы атындағы оқу орталығының басшылары арнайы шақырылып, жас полиция қызметкерлері, оқу орталығының тыңдаушылары және «Жас сақшы» сыныптарының оқушылары қатысты. Кездесу барысында қоғамдағы заң үстемдігін қамтамасыз етудегі ішкі істер органдарының рөлі, азаматтардың сенімін арттырудағы ашықтық пен әділдіктің маңызы жан-жақты сөз болды.
Іс-шараның негізгі мақсаты – сыбайлас жемқорлықтың алдын алу бағытындағы тетіктерді жетілдіру, құқық бұзушылықтарға төзбеушілік қағидатын қалыптастыру және жас мамандардың бойына кәсіби әдеп пен адал қызмет мәдениетін сіңіру болды. Мамандардың айтуынша, құқық қорғау саласында қызмет ететін әрбір азамат ең алдымен заңға құрметпен қарап, қоғам мүддесіне адал қызмет етуі тиіс.
Кездесу барысында ішкі істер органдарындағы тәртіп пен заңдылықты сақтау мәселесіне ерекше назар аударылды. Қатысушылар сыбайлас жемқорлық тәуекелдерінің алдын алу, құқық бұзушылықтарды ерте анықтау және олардың жолын кесу бағытында атқарылып жатқан жұмыстарға тоқталды. Сонымен қатар құқықтық мәдениетті қалыптастыруда профилактикалық іс-шаралардың маңызы зор екені айтылды.
Жиынға қатысқан ардагерлер жас қызметкерлермен тәжірибе алмасып, қызмет барысындағы жауапкершілік, тәртіп пен адамгершілік қағидаттарының маңызы туралы ой бөлісті. Олар құқық қорғау органдарындағы қызмет тек кәсіби біліктілікті ғана емес, жоғары моральдық ұстаным мен ел алдындағы адалдықты талап ететінін атап өтті.
Кездесу аясында жас мамандар да пікір білдіріп, алғашқы қызметтік тәжірибелері, тәлімгерлердің қолдауы және кәсіби қалыптасу кезеңіндегі маңызды құндылықтар туралы әңгімеледі. Олардың айтуынша, тәжірибелі қызметкерлердің ақыл-кеңесі мен қолдауы жас мамандардың жауапкершілігін арттырып, қызметке деген сенімін нығайта түседі.
Жиында «Заң мен Тәртіп» қағидаты құқық қорғау органдары қызметінің негізгі бағдары екені ерекше атап өтілді. Қоғам сеніміне ие болу үшін құқық қорғау саласында ашықтық пен әділдік басты орында тұруы қажет екені айтылды. Сондай-ақ азаматтардың құқықтық сауаттылығын арттыру мен сыбайлас жемқорлыққа қарсы мәдениетті қалыптастыруда ведомствоаралық өзара іс-қимылдың маңызы жоғары екеніне назар аударылды.
Кездесу қорытындысында қатысушылар құқықтық тәртіпті қамтамасыз ету, сыбайлас жемқорлыққа қарсы профилактикалық жұмыстарды күшейту және қоғамдағы заңдылық қағидаттарын нығайту бағытындағы бірлескен жұмыстар алдағы уақытта да жалғасатынын жеткізді. Мамандар мұндай тағылымдық кездесулер жас буынның кәсіби көзқарасын қалыптастырып қана қоймай, мемлекеттік қызметке деген жауапкершілікті арттыруға да оң әсер ететінін атап өтті.
«ANYQ.KZ»-ақпарат.
