Шымкент қаласында 200 орынды ірі перинаталдық орталықтың құрылысы қарқынды жалғасуда. Қазіргі таңда нысанның қазаншұңқырын қазу жұмысы аяқталып, іргетасына бетон құйылуда. Бұл туралы Шымкент қаласы әкімінің баспасөз қызметі хабарлады.
Үш қабатты ғимаратта лаборатория, тамақтану блогы, бақылау-өткізу пункті, қазандық, медициналық газ станциясы және шаруашылық аймағы қарастырылған. Сонымен қатар, 123 автокөлікке, 16 әкімшілік көлігіне және 8 жедел жәрдем көлігіне арналған автотұрақтар, 120 текше метр су резервуары, автокөліктерді дезинфекциялау алаңы мен саябақ болады.
Жоба Мемлекет басшысының тапсырмасы аясында жүзеге асырылып, ана мен баланы қорғау жүйесін нығайтуға бағытталған. Себебі, қалада тұрғындар санының артуына байланысты заманауи медициналық нысанға қажеттілік туындап отыр. Жаңа перинаталдық орталық ұлттық және халықаралық стандарттарға сай жоғары білікті акушерлік және неонаталдық көмек көрсететін болады.
Сонымен қатар, нысан іске қосылғаннан кейін Шымкент қаласы мен Түркістан облысының іргелес аудандарының тұрғындары үшін медициналық көмектің қолжетімділігі мен сапасын арттыруға мүмкіндік береді.
Атап өтерлігі, Президент Қасым-Жомарт Тоқаев халық денсаулығын сақтау мен медициналық инфрақұрылымды жаңғыртуды мемлекеттік саясаттың негізгі басымдықтарының бірі ретінде белгілеп келеді. Осы бағытта Үкімет соңғы жылдары денсаулық сақтау нысандарын жаңарту, медициналық қызметтердің қолжетімділігін арттыру және ана мен бала денсаулығын қорғау жүйесін күшейту бойынша кешенді шараларды жүзеге асыруда. Шымкентте салынып жатқан жаңа перинаталдық орталық осы міндеттердің өңірлік деңгейдегі нақты көрінісі болып табылады. Демографиялық өсімі жоғары мегаполис үшін мұндай мамандандырылған медициналық мекеменің іске қосылуы жүкті әйелдер мен нәрестелерге көрсетілетін көмектің сапасын жаңа деңгейге көтеруге мүмкіндік береді. Ең бастысы, заманауи талаптарға сай жабдықталған орталық өңірдегі ана мен бала өлімін төмендетуге, жоғары технологиялық медициналық көмектің қолжетімділігін кеңейтуге және халықтың өмір сүру сапасын арттыруға елеулі үлес қоспақ.
«ANYQ.KZ»-ақпарат.
