Қоғамдағы тұрақтылық пен азаматтардың қауіпсіздігін қамтамасыз ету – құқық қорғау органдары қызметінің басты бағыттарының бірі. Әсіресе, отбасылық-тұрмыстық қатынастар саласындағы құқық бұзушылықтардың алдын алу, тұрмыстық зорлық-зомбылыққа қарсы күресті күшейту және құқықтық мәдениетті қалыптастыру бүгінде мемлекеттік саясаттың маңызды басымдығына айналып отыр. Осы мақсатта Қазақстан Республикасы Ішкі істер министрлігінің тапсырмасына сәйкес, 17–19 шілде күндері Созақ ауданы аумағында «Қауіпсіз үй» жедел-профилактикалық іс-шарасы өткізілді.
Іс-шараның негізгі мақсаты – отбасылық-тұрмыстық саладағы құқық бұзушылықтардың алдын алу, қоғамдық тәртіпті нығайту, тұрғындардың құқықтық сауаттылығын арттыру және азаматтардың қауіпсіздігін қамтамасыз ету.
Үш күнге жоспарланған кешенді шара барысында Созақ аудандық полиция бөлімінің қызметкерлері прокуратура өкілдерімен, «Отбасын қолдау орталығы» коммуналдық мемлекеттік мекемесінің мамандарымен және өзге де мүдделі мемлекеттік органдармен бірлесіп, профилактикалық жұмыстарды күшейтті. Әсіресе, профилактикалық есепте тұрған азаматтармен, сондай-ақ шартты түрде мерзімінен бұрын босатылған 50-ге жуық тұрғынмен жеке кездесулер ұйымдастырылды.
Кездесу барысында құқықтық талаптар түсіндіріліп, қайта қылмысқа жол бермеу, қоғамдық тәртіпті сақтау, заң талаптарын бұлжытпай орындау мәселелері кеңінен сөз болды. Сонымен қатар әрбір азаматтың мәселесі жеке қаралып, құқықтық кеңестер беріліп, қажетті жағдайда әлеуметтік және психологиялық қолдау көрсету тетіктері түсіндірілді.
Профилактикалық жұмыстар тек кездесулермен шектелген жоқ. Полиция қызметкерлері есепте тұрған азаматтардың тұрғылықты мекенжайларын аралап, олардың әлеуметтік жағдайымен танысып, құқық бұзушылықтардың алдын алуға бағытталған түсіндіру жұмыстарын жүргізді. Мұндай тәсіл азаматтардың қоғамға бейімделуіне қолдау көрсетіп, құқықтық жауапкершілікті арттыруға мүмкіндік береді.
Акция аясында тұрғындардың құқықтық сауаттылығын арттыруға ерекше көңіл бөлінді. Созақ ауданының орталық көшелеріндегі LED экрандар арқылы тұрмыстық зорлық-зомбылықтың алдын алу жөніндегі әлеуметтік бейнероликтер көрсетіліп, «Қауіпсіз үй» іс-шарасының мақсаты кеңінен насихатталды. Сондай-ақ тұрғындарға құқық қорғау органдарына жедел хабарласуға арналған 102 арнасы, сондай-ақ 111 және 150 сенім телефондары туралы ақпарат жеткізілді.
Құқық қорғау органдары аудан тұрғындарын отбасындағы зорлық-зомбылық фактілерін жасырып қалмауға шақырады. Егер азаматтар өздері немесе жақындары құқыққа қайшы әрекеттердің құрбаны болса немесе мұндай жағдайдың куәсі атанса, құқық қорғау органдарына уақытылы хабар беру маңызды. Әрбір өтініш қолданыстағы заңнамаға сәйкес қаралып, азаматтардың құқықтары мен заңды мүдделерін қорғауға бағытталған барлық қажетті шаралар қабылданады.
«Қауіпсіз үй» жедел-профилактикалық іс-шарасы қоғамдағы құқықтық мәдениетті нығайтуға, тұрмыстық зорлық-зомбылықтың алдын алуға және азаматтардың қауіпсіздігін қамтамасыз етуге бағытталған маңызды бастамалардың бірі болып табылады. Өйткені қауіпсіз отбасы – тұрақты қоғамның, ал заңға құрмет – елдегі қоғамдық келісім мен тыныш өмірдің басты кепілі.
«ANYQ.KZ»-ақпарат.
