Созақ ауданында «TUR WORKOUT» жобасы аясында «Тәртіпке тартыл» атты белтемірге тартылу сайысы ұйымдастырылды. Іс-шараның басты мақсаты жастар арасында салауатты өмір салтын насихаттау, құқықтық мәдениетті қалыптастыру, тәртіп пен жауапкершілік қағидаттарын дәріптеу, сондай-ақ қоғамда заң мен тәртіп идеологиясын нығайту болып табылады.
Сонымен қатар, жастар арасында құқық бұзушылықтың, лудоманияның, қаржылық алаяқтықтың және өзге де теріс әлеуметтік құбылыстардың алдын алу көзделді.
Сайыстың ашылу салтанатында Созақ ауданы әкімінің орынбасары Алтын Күнтуқызы мен Түркістан облысы бойынша Экономикалық тергеп-тексеру департаментінің қаржылық мониторинг басқармасының басшысы, экономикалық тергеу қызметінің подполковнигі Абай Қадыров және аталған департаменттің аса маңызды істер жөніндегі офицері, экономикалық тергеу қызметінің капитаны Гүлзия Нұрғалиқызы сөз сөйлеп, қатысушыларға сәттілік тіледі.
Жарыс барысында қатысушылар белтемірге тартылу және күштік жаттығулар бойынша өзара бақ сынап, спорттық шеберліктерін көрсетті. Турнир қорытындысы бойынша үздік нәтиже көрсеткен Асылсұлтан Анарбай, Асхат Жаңбырбай және Алишер Тулимов облыстық кезеңге жолдама алды.
Мұндай бастамалардың мәні бір реттік спорттық жарыспен өлшенбейді. Бүгінде Қазақстанда жастар саясатының негізгі басымдықтарының бірі – заңға құрметпен қарайтын, қаржылық сауаты жоғары, жауапкершілігі мол әрі салауатты өмір салтын ұстанатын азамат қалыптастыру. Мемлекет басшысы Қасым-Жомарт Тоқаев Ұлттық құрылтай отырыстарында және құқық қорғау органдарының кеңейтілген алқаларында сөйлеген сөздерінде «Заң мен Тәртіп» қағидатын мемлекеттік саясаттың басты ұстанымдарының бірі ретінде айқындап, құқықтық мәдениет қоғамның күнделікті өмір салтына айналуы керектігін бірнеше рет атап өтті. Президенттің бастамасымен елімізде жастарды лудоманиядан қорғау, қаржылық алаяқтыққа қарсы иммунитет қалыптастыру, есірткі қылмысы мен интернет-алаяқтықтың алдын алу бағытындағы заңнамалық және институционалдық жұмыстар кезең-кезеңімен күшейтілуде.
Осы бағытта Үкімет те кешенді шараларды жүзеге асырып келеді. Ел көлемінде құқық бұзушылықтың алдын алу жөніндегі мемлекеттік бағдарламалар жаңартылып, жастар арасында құқықтық сауаттылықты арттыруға, бұқаралық спортты дамытуға, еріктілер қозғалысын қолдауға және қауіпсіз цифрлық орта қалыптастыруға басымдық берілуде. Сонымен қатар қаржылық мониторинг органдары халықтың қаржылық қауіпсіздігін күшейту, интернет және телефон арқылы жасалатын алаяқтық әрекеттердің алдын алу бойынша түсіндіру жұмыстарын жүйелі жүргізіп келеді. Лудоманияға қарсы заңнаманың күшеюі де жастарды әлеуметтік қатерлерден қорғауға бағытталған маңызды қадамдардың біріне айналды.
Түркістан облысында да бұл бағыттағы жұмыстар нақты нәтижесін беріп келеді. Өңірде бұқаралық спортпен тұрақты айналысатын тұрғындар саны жыл сайын артып, жастардың спорттық инфрақұрылымға қолжетімділігі кеңеюде. Ауылдық жерлерде ашық спорт алаңдары, workout кешендері мен әмбебап спорт нысандары көбейіп, жастарды бос уақытын тиімді ұйымдастыруға бағытталған жобалар жүзеге асырылуда. Бұл тек дене шынықтыруды дамыту ғана емес, жас буынды құқық бұзушылықтан, зиянды әдеттерден және түрлі әлеуметтік тәуекелдерден қорғаудың тиімді тетігі ретінде қарастырылып отыр.
Созақ ауданында өткен «Тәртіпке тартыл» сайысы осы мемлекеттік саясаттың жергілікті деңгейдегі нақты көрінісі деуге толық негіз бар. Себебі бүгінгі таңда күш пен тәртіпті, спорт пен заңға құрметті, жеңіс пен жауапкершілікті қатар дәріптейтін осындай жобалардың қоғамдық маңызы артып келеді. Белтемірге тартылған жастардың ертең өмірдің түрлі сынақтарына да нық тұра алуы – дәл осындай тәрбиелік мазмұндағы бастамалардың басты нәтижесі. Ал облыстық кезеңге жолдама алған жастардың жетістігі өзге қатарластарына үлгі болып, Созақ жастарының белсенділігі мен әлеуетін тағы бір мәрте айғақтай түседі. Өйткені заң үстемдігі орныққан қоғам – ең алдымен тәртіпті, білімді және дені сау жастардың қолымен қалыптасады.
«ANYQ.KZ»-ақпарат.
