Осы ретте атап өтерлік жайт, жастар мен кәмелетке толмағандар арасындағы құқықбұзушылықтың алдын алу, олардың түнгі уақытта заңсыз жүруінің жолын кесу мақсатында қала аумағында түнгі рейдтік іс-шара өткізілді. Рейд барысында ойын-сауық орындары, көшелер мен қоғамдық орындар бақылауға алынып, анықталған жасөспірімдермен және олардың заңды өкілдерімен профилактикалық түсіндіру жұмыстары жүргізілді.
Іс-шара аясында ата-аналардың бала тәрбиесіндегі жауапкершілігі түсіндіріліп, балалардың қауіпсіздігін қамтамасыз ету және заң талаптарын сақтау қажеттігі жөнінде ескерту жасалды. “Мұндай рейдтік шаралар құқықбұзушылықтың алдын алу және қоғамдық тәртіпті сақтау мақсатында тұрақты түрде жалғасады”, — дейді жауаптылар.
Түркістан қаласында кәмелетке толмағандар арасындағы құқықбұзушылықтың алдын алуға бағытталған түнгі рейдтер – құқықтық мәдениетті қалыптастыруға және жастардың қауіпсіздігін қамтамасыз етуге арналған кешенді жұмыстың маңызды бөлігі. Мемлекет басшысы Қасым-Жомарт Тоқаев қоғамдағы «Заң және тәртіп» қағидатын мемлекеттік саясаттың негізгі басымдықтарының бірі ретінде айқындап, әсіресе балалардың қауіпсіздігі мен жасөспірімдер тәрбиесіне ерекше көңіл бөлуді тапсырды. Президенттің айтуынша, құқық бұзушылықпен күрес тек жазалау шараларымен шектелмеуі тиіс, ең алдымен оның алдын алуға, отбасы, мектеп және қоғамның ортақ жауапкершілігін күшейтуге негізделуі қажет.
Осы бағытта республика көлемінде профилактикалық жұмыстар жүйелі түрде жүргізілуде. Ішкі істер министрлігінің мәліметінше, елімізде жыл сайын мыңдаған профилактикалық рейд ұйымдастырылып, түнгі уақытта заңсыз жүрген жасөспірімдер анықталып, олардың ата-аналарына заңнама талаптары түсіндіріледі. Сонымен қатар білім беру ұйымдары, полиция, прокуратура және жергілікті атқарушы органдардың қатысуымен балалардың жазғы демалысын қауіпсіз ұйымдастыруға, интернеттегі қауіп-қатердің, буллингтің, вандализмнің және жасөспірімдер арасындағы құқық бұзушылықтың алдын алуға бағытталған бірлескен жобалар жүзеге асырылуда.
Түркістан облысында да бұл жұмыс тұрақты бақылауда. Өңірде полиция, прокуратура, білім беру ұйымдары мен әкімдіктердің қатысуымен профилактикалық іс-шаралар, түнгі рейдтер және түсіндіру кездесулері жүйелі түрде өткізіліп келеді. Мұндай шаралар тек заң бұзушылықтарды анықтауға емес, ата-аналардың жауапкершілігін арттыруға, жастардың бос уақытын тиімді ұйымдастыруға және құқықтық сауаттылығын көтеруге бағытталған.
Сондықтан Түркістан қаласында ұйымдастырылған түнгі рейдтің басты нәтижесі – анықталған құқық бұзушылықтар саны емес, олардың алдын алу арқылы қауіпсіз қоғамдық орта қалыптастыру. Бұл – Президент Қасым-Жомарт Тоқаев ұсынған «Заң және тәртіп» қағидатын жергілікті деңгейде іске асырудың нақты көрінісі. Жастардың тәрбиесіне қоғам болып жауапкершілікпен қарау, құқықтық мәдениетті қалыптастыру және профилактикалық жұмысты күшейту – қауіпсіз әрі өркениетті қоғам құрудың басты алғышарттарының бірі болып қала береді.
«ANYQ.KZ»-ақпарат.
