Шымкентте халық санының көбеюі инфрақұрылымды дамытуға деген қажеттілікті арттырды
Шымкент қаласының қарқынды өсуі әлеуметтік инфрақұрылымды дамытуға деген қажеттілікті арттырып отыр. Әсіресе, халық санының көбеюі денсаулық сақтау саласына түсетін жүктемені күшейтіп, ана мен балаға көрсетілетін медициналық көмектің қолжетімділігін кеңейтуді талап етеді. Осы бағытта қаладағы Ақжайық шағын ауданында жаңа перинаталдық орталықтың құрылысы жүргізілуде.
Шымкентте жыл сайын 30 мыңнан астам сәби дүниеге келеді. Қазіргі таңда босандыру қызметін төрт медициналық ұйым көрсетеді. Сондықтан жаңа орталықтың іске қосылуы қаланың медициналық инфрақұрылымын нығайтып, жүкті әйелдер мен жаңа туған нәрестелерге көрсетілетін көмектің мүмкіндіктерін кеңейтуге жол ашады.
Жаңа перинаталдық орталық 200 төсек-орынға есептелген. Медициналық мекеме жылына 7 мыңға дейін босануды қабылдай алады. Бұл қолданыстағы перзентханаларға түсетін жүктемені азайтып, төсек-орын қорын ұлғайтуға мүмкіндік береді. Сонымен қатар ана мен балаға мамандандырылған медициналық көмек көрсету ауқымы кеңейеді.
Жобаның тағы бір маңызды қыры – жаңа жұмыс орындарын ашу. Орталықтың қызметін ұйымдастыру барысында шамамен 800–1 000 жұмыс орнын құру жоспарланып отыр. Бұл медицина мамандары мен өзге де қызметкерлерді жұмыспен қамтуға мүмкіндік береді.
Жалпы, жаңа перинаталдық орталықтың құрылысы Шымкенттің әлеуметтік инфрақұрылымын қала қажеттілігіне сай дамытуға бағытталған. Халық саны мен туу көрсеткіштерін ескере отырып, медициналық мекемелердің қуатын арттыру тұрғындарға сапалы әрі уақтылы көмек көрсету үшін маңызды. Орталықтың іске қосылуы ана мен бала денсаулығын қорғау жүйесін нығайтуға және қаланың болашақтағы қажеттіліктерін қамтамасыз етуге үлес қосады.
«ANYQ.KZ»-ақпарат.
