Келес ауданының «Құрметті азаматы» атағы берілді.
Әлемді шарлаған індетке байланысты салтанатты жиын карантин талаптарын сақтай отырып өткізілді. Бүгінде жас ұрпақтың бойында патриоттық сезімді дамытуға үлес қосып жүрген, сонымен қатар ауданның әлеуметтік-экономикалық дамуы мен өсіп-өркендеуіне, достық пен ынтымақтастықты нығайтуға үлес қосқан азаматтарға «Келес ауданының құрметті азаматы» атағы берілді. Сондай-ақ жұмыс барысында қол жеткізген табыстары мен жоғары көрсеткіштері үшін бірқатар қызметкерлер алғысхаттарға ие болды. Салтанатты жиынға қатысушыларды аудан басшысы Ақментай Есбаев айтулы мерекемен құттықтап, жүрекжарды лебізін жеткізді.
– Елордамыз Нұр-Сұлтан қаласы бүгінгі таңда бүкіл елді нық жетелеп, жаңа өзгерістердің қозғаушысы, қалыптасқан саяси орталығы бар, Қазақстанның басты брендіне айналды. Бұл қаланың қалыптасып, не бары 23 жыл ішінде халықаралық аренада беделінің артып, төрткүл дүниенің тамсанған мекеніне айналуы Елбасымыз Нұрсұлтан Әбішұлының сарабдал саясатының жемісі. Сарыарқа төсіндегі сәні мен салтанаты жарасқан елорда бүгінде озық идеяларды іске асырып, сәулет өнерінің озық үлгісі қалыптасқан замануи мегополиске айналып отыр, – деген Ақментай Үсенұлы барлық өңірлер бас қалаға қарап бой түзеп, елордамен бірге гүлденіп келе жатқанын атап өтті.
Салтанатты шара соңы Ә.Кенжеев атындағы аудандық мәдениет үйінің өнерпаздары дайындаған концерттік бағдарламаға ұласты.
ANYQ.KZ-ақпарат
