Түркістан облысында ауыл шаруашылығында жалпы өнім көлемі 802,6 миллиард теңгені құрап, республика бойынша 1-ші орынға шықты. Жыл қорытындысына орай жалпы өнім көлемі 1 триллион 127,3 миллиард теңгеге, нақты көлем индексі 103 пайызға жеткізіледі деп күтіліп отыр. Еңбегімен дараланған өңір жұртшылығы бүгін «Алтын күз-2023» мерекелік іс-шарасын өткізді. Жәрмеңке өткізіліп, тұрғындарға арзан бағада азық-түлік өнімдері саудаланса, көпшілікке мемлекеттік бағдарламалар арқылы алынған ауыл шаруашылығы техникалары, облыс өндірушілерінің өнімдері және өзге де жетістіктер көрмесі ұсынылды.
Ауыл шаруашылығы қызметкерлері күніне арналған салтанатты жиынға Түркістан облысының әкімі Дархан Сатыбалды арнайы қатысып, еңбек адамдарына құрмет көрсетті. Алдымен жәрмеңке мен көрмені тамашалап, «Тұран су» мекемесіне заманауи 15экскаваторды табыс етті. Одан кейін «Конгресс холл» кешенінде өткен жиында ауыл шаруашылығы саласы өкілдерін құттықтады.
– Сіздерді жыл сайынғы тұрақты дәстүрімізге айналған «Алтын күз» салтанатты мерекесімен шын жүректен құттықтаймын. Сіздердің еңбектеріңіздің арқасында облыстың агроөнеркәсіп кешені тұрақты дамып келеді. Осы салада жалпы өнім көлемін ұлғайту бойынша республикада алғашқы орынға шықтық. Ауыл шаруашылығы, тамақ өндірісінің негізгі капиталына тартылған инвестициялар 2 есеге дейін артты. Ауыл шаруашылығы дақылдары орналастырылған алқап өткен жылдан 9 мың гектарға ұлғайды. Көкөніс, бақша өнімдерінен рекордтық 3,3 миллион тонна өнім жиналды. Мал шаруашылығы көрсеткіштерінің өсімі 5 пайыздық деңгейде қамтамасыз етілді. Ет экспорты бойынша облыс республикада көш басында келеді. Экспортқа шығарылатын ірі қара мал етінің 85 пайызы, ұсақ мал етінің 60 пайызы — біздің өңірдің үлесінде. Биыл біз жылыжайларды көмірмен қамту мәселесін реттедік. «Тұран су» кәсіпорнының жұмысын жүйелеп, техникасын жаңартып, су нысандарын қалпына келтіру және төтенше жағдайлардың алдын алу жұмыстарын мерзімінде атқара білдік. Мемлекет басшысы Қасым-Жомарт Кемелұлы ауыл шаруашылығында өнімділікті арттыруды тапсырды. Біз қайта өңдеу, өнімдерді сақтау, су үнемдеу технологиясын енгізу, «Ауыл аманаты» жобасын сәтті жүзеге асыру бағытында жұмысты күшейтеміз. Сіздерді бүгінгі мерекемен құттықтай отырып, зор денсаулық, отбасыларыңызға амандық, береке мен бірлік тiлеймiн! – деді Дархан Сатыбалды.
Салтанатты шарада облыс әкімі бір топ азаматты Қазақстан Республикасы Ауыл шаруашылығы министрлігінің «Еңбек ардагері» медалімен, «Ауыл шаруашылығы саласының үздігі» төсбелгісімен марапаттады. Сонымен бірге облыстың агроөнеркәсіптік кешенінде даму көрсеткіштерін орындауда алғашқы үштікке енген аудан, қала әкімдерін марапаттады. Бірінші орынды 9 айда 53,4 миллиард теңгенің өнімін өндіріп, агроөнеркәсіптік кешенінің негізгі капиталына 8,4 миллиард теңге, тамақ өндірісіне 2.3 миллиард теңге инвестиция тартып, көш бастаған Қазығұрт ауданы әкімдігі жеңіп алды. Екінші орын Жетісай ауданының еңбеккерлеріне бұйырса, үшінші орынға Сайрам ауданы лайық деп танылды. Сонымен қатар, Сайрам ауданы ет өндіруден, сүт өндіруден және мал шаруашылығы өнімдерін қайта өңдеу саласын дамытудан озат аудан болып марапатталды. Бұдан басқа, озат агроқұрылымдар да марапатқа ие болды. Олар: АӨК тамақ өндірісіне инвестиция тартуда озат агроқұрылым — «Рассвет» ӨК, «Озат сүт өндіруші» — «Шерзад-1» ШҚ және «Мал шаруашылығы өнімдерін қайта өңдеуден озат агроқұрылым» — «Давуд Мастер» ЖШС.
Биыл Сарыағаш ауданының шаруалары да алтын күзді мол жетістіктермен қарсы алды. Оның бір дәлелі, Сарыағаш ауданы құс шаруашылығын дамытуда озат аудан атанды. Сонымен қатар, Қабланбек ауылдық округінде орналасқан “Жабай ата” шаруа қожалығы жылыжай шаруашылығын дамытуда озат агроқұрылым номенациясымен марапатталды.
Ал биыл Арыс қаласының диқандары жыл басынан бері 19,4 миллиард теңгенің ауыл шаруашылығы өнімдерін өндірген. Ала жаздай жер емген арыстық ағайынның еңбегі ескеріліп, облыста өткен «Алтын күз-2023» салтанатты жиынында Арыс қаласы «Шет елден асыл тұқымды ірі қара малды асылдандырудан» озат атанды.
Салтанатты кеште Арыс қаласының тұрғыны, жеке кәсіпкер Мамытхан Әлімханұлы Айдағарев облыс әкімі Дархан Амангелдіұлының Алғыс хатымен марапатталды.
Аталған іс — шара аясында шаруалар өндірген көкөністер және «Ауыл аманаты» жобасы бойынша несие алып, өз кәсіптерін кеңейтіп, жаңа кәсіп ашқан азаматтардың өнімдері көрмеде келушілердің назарына ұсынылды.
Жиында облыстың аграрлық саласының дамуына белсенді үлес қосып келе жатқан озат агроқұрылым басшылары мен өкілдеріне де құрмет көрсетілді. Ауыл шаруашылығы саласының еңбеккерлерінің құрметіне мазмұнды концерттік бағдарлама ұсынылды. Айдар Тұрғамбек, «Заман» тобы және Түркістандағы «Конгресс холдың» «Jana lep» әншілері мен өңірдегі танымал би топтары өнер көрсетті.
Түркістан облысының агроөнеркәсіптік кешені жалпы өңірлік өнімнің 30 пайызын құрайды. Өңірдің әлеуметтік-экономикалық дамуының негізгі драйвері. Биыл егістікті әртараптандыру нәтижесінде масақты дақылдар 10 мың гектарға артып, 273,4 мың гектарға орналастырылды, 493 мың тонна өнім жиналды. Малазықтық дақылдар 2 мың гектарға артып, 223,7 мың гектарды құрады, 5 миллион тонна мал азығы дайындалды. Мақта саласын кешенді дамыту мақсатында Түркістан облысының мақта-тоқыма кластерін құру жобасы әзірленді. Облыста су үнемдеу технологияларын пайдаланатын алқап 34 мың гектарды құрайды. Оның ішінде тамшылатып суғару технологиясы 23 мың гектарға, жаңбырлатып суғару технологиясы 10 мың гектарға орналастырылған.
Облыстың агроөнеркәсіптік кешен саласында биыл 16,7 миллиард теңгені құрайтын 25 инвестициялық жобаны іске асыру жоспарланса, бүгінгі таңда 22 жоба іске асырылып, 14,1 миллиард теңге инвестиция тартылды. Тоғыз айда ауыл шаруашылығының негізгі капиталына 82,2 миллиард теңге инвестиция тартылып, 145,9 пайызға ұлғайды. Ауыл шаруашылығы өнімдерінің экспорты 250,3 миллион АҚШ долларын құрап, 1,4 есеге артты.
«ANYQ.KZ»-ақпарат.
