Облыс әкімінің орынбасары Ертай Алтаев Түлкібас аудынына жұмыс сапарымен келіп, аудан аумағындағы өзі жетекшілік ететін мәдениет және спорт, ішкі саясат саласындағы өзекті мәселелермен танысты.
Бірінші кезекте облыс әкімінің орынбасары облыстық мәдениет басқармасының басшысы Әзімхан Қойлыбаев, аудан әкімі Нұржан Ізтілеуов және тиісті басқармалардың мамандарымен бірге ұлғайтуды қажет ететін Майтөбе ауылындағы балалар спорт мектебіне табан тіреді.
1995 жылы бой көтерген спорттық нысанда бүгінгі таңда футбол, баскетбол, волейбол және бокс үйірмелері ауыл жастарының бос уақытын тиімді өткізуге ықпал етуде.
Нысанды аралау барысында аудан әкімі аталған спорт мектебінің жанынан футбол клубын ашу ұсынысын жеткізіп, оған қажетті сол маңда бос тұрған ғимараттарды қайта жаңғыртуға және футбол алаңын заман талабына сай етуге ықпал жасауын сұранды. Ертай Кенжебекұлы ұсынысты назарға алып, тиісті мамандармен жан-жақты зерделенетіндігін жеткізіп, демеушілер есебінен жүзеге асыру жағын да қарастыруды керектігін атап өтті.
Содан соң, облыс әкімінің орынбасары Түлкібас кентіне ат басын бұрып, ол жердегі мәдениет үйінің бүгінгі жағдайымен танысты. Өткен ғасырдың 1927 жылы бой көтерген ғимаратқа бүгінгі таңда ағымдағы жөндеу жұмыстары басталған. Бұл жерде ғимараттың шатыры жаңартылып, жылыту жүйесі және ішкі-кем кетіктері реттелмек.
Келесі кезекте облыс әкімінің орынбасары Жәрімбетов ауылындағы балалар спорт мектебінің ғимаратына барды. 2015 жылы бой көтерген ғимарат сыртқы келбетін және шатырын реттеуді қажет етеді. Оған биыл қажетті қаржы қарастырылып, қазіргі таңда сатып алу конкурсы арқылы мердігерді анықтау жұмыстары жүргізілуде.
Ертай Кенжебекұлы аталған ғимаратты жауаптылармен бірге толық аралап шығып, ішіндегі біршама кем-кетік тұстарын реттеу бойынша нақты тапсырмалар жүктеді.
Бұдан бөлек, облыс әкімінің орынбасары іссапары барысында Шақпақ-баба ауылындағы тозығы жеткен балалар спорт мектебінде, Құлан ауылындағы апатты жағдайдағы мәдениет үйінде, орталық мешіт пен жастар ресурстық орталығында болып, жұмысымен танысты.
Аралау барысында өзінің жетекшілік ететін салаларына қатысты жауапты басшыларға біршама тапсырмалар жүктеп, оны шешу жолдары бойынша ұсыныстар беруді тапсырды.
Орайы келгенде атап өтер жайт, 10 тамыз – қазақтың бас ақыны Абай Құнанбайұлының туған күні. Бұл күн 2020 жылдан бастап Мемлекет басшысы Қасым-Жомарт Тоқаевтың бастамасымен «Абай күні» деп аталады. Ақыл мен ойдың асқар шыңына жеткен Абай атамыздың туған күні еліміздің барлық аймағында ерекше құрметпен аталып өтіледі. Абай мұрасын кейінгі ұрпаққа ғылыми тұрғыда дәлелдеп жүрген ғалымдарымыздың бірі және бірегейі Мекемтас Мырзахметұлы.
Жасы 97-ге қадам басқан абайтанушы Мекемтас Мырзахметұлын Абай күніне орай арнайы құттықтап, сый-құрмет көрсетуге Түлкібас ауданы, Майтөбе ауылына Түркістан облысы әкімінің орынбасары Ертай Алтаев, Түркістан облысы мәдениет басқармасының басшысы Әзімхан Қойлыбаев, Түлкібас ауданының әкімі Нұржан Ізтілеуов барды.
Бар саналы ғұмырын Ұлы Абайдың іліміне арнаған Мекемтас Мырзахметұлы кандидаттық, докторлық ғылыми атақтарын Абай шығармаларын зерттеп қорғаған.
Қарт ғалымға сәлем беріп, ақ батасын алған Түркістан облысы әкімінің орынбасары облыс аумағындағы идеология саласында атқарылып жатқан жұмыстар жайлы пікір білдіріп, ғылым мен руханият салаларында алдағы уақытта атқарылатын жұмыстарды жеткізді.
Ұлттық болмыс пен салт-дәстүр, тарих пен мәдениет мәйегі жөнінде сөз қылған ғалым Мекемтас Мырзахметұлы арнайы ат басын бұрып келген азаматтарға ризашылығын білдіріп, хакім Абай туралы жазылған кітаптарын сыйға тартты.
«ANYQ.KZ»-ақпарат.
